قازىرگى كەزدە ناۋقاستىڭ جاعدايى ءبىر قالىپتى. ونىڭ تاراپىنان دەنساۋلىعىنا قاتىستى ەشقانداي شاعىم جوق دەيدى جاۋاپتى ماماندار. الداعى كۇندەرى قايتا سىناما الىنباق. ەگەر زەرتتەۋ ناتيجەسى ۆيرۋستىڭ جوق ەكەنىن دالەلدەسە وندا ناۋقاس اۋرۋحانادان شىعارىلاتىن بولادى.
كەزەكتى مارتە كەسەلدىڭ اۋماعىمىزدا اسىر سالۋى 20 ناۋرىزدا تىركەلگەن ەدى. ءدال وسى كۇنى وبلىس بويىنشا ينفەكسيا جۇقتىرعان ءۇش ازامات انىقتالعان. ۇشەۋىدە نۇر-سۇلتان قالاسىنا كەلگەن اۋە كەمەسىندە بولعان. ولار ىلە اۋدانىنداعى پروۆيزورلىق بولىمىنە جاتقىزىلىپ، كەيىننەن تالداۋ جاسالعان.
ەپيدەميانى جۇقتىرعانداردىڭ ءبىرى 1957 جىلعى ايەل ادام. الماتى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ەربوزىم ۇلىنىڭ ايتۋىنشا، جاعدايى جاقسى، ەم شارالارىنىڭ ءبارى تولىعىمەن ورىندالىپ جاتىر. كەلەسى كەسەلدىڭ كەساپاتىن تارتقان جان 1995 جىلى تۋىلعان اياعى اۋىر كەلىنشەك، جۇكىتلىك مەرزىمى 20-21 اپتا شاماسىندا ەكەن. ول 1991 جىلعى جولداسىمەن بىرگە 25 ناۋرىز كۇنى نيۋ-يورك قالاسىنان رەسەي ارقىلى ەلگە ورالعان.
ەكەۋىدە العاشقى دا ءۇي كارانتينىنە جابىلعان. كەيىن ەر ادام قۇرعاق جوتەل پايدا بولۋىنا بايلانىستى مەديسينا ماماندارىنا شاعىمىن جەتكىزگەن. سول ءۇشىن ونى پروۆيزورلىق بولىمگە جاتقىزعان. ءبىر وتباسى بولعاندىقتان ەكەۋىدە بارلىق تەكسەرىستەن وتكەننەن سوڭ ەر ادامنان ۆيرۋس تابىلماعان.
كوروناۆيرۋس كەلەسى كەزەكتە جامبىل اۋدانىنىڭ تۇرعىنى 1997 جىلعى قىز بالانى قاقپانىنا تۇسىرگەن. ارۋىمىز وڭتۇستىك كورەيادان كەلگەن. ەلگە ورالعاننان كەيىن وعان ساراپتاما جاساعان، تالداۋ ناتيجەلەرى وكىنىشكە وراي ءۆيرۋستىڭ بار ەكەنىن كورسەتكەن.
ءقازىر ناۋقاس ينفەكسيالىق اۋرۋحانادا سايكەسىنشە ەم قابىلداپ جاتىر. وسىمەن ىندەت ەل ءىشىن كەزگەنىن دوعارار دەپ ويلاعاندا 29 ناۋرىز دا قاراساي جانە ەڭبەكشىقازاق اۋداندارىندا ەپيدەميا ەتەگىنە جارماسقان ەكى ادام انىقتالدى.
ءبىرى 1979 جىلعى قاراساي اۋدانىنىڭ تۇرعىنى. جولداسى سانك-پەتەربۋرگتان ورالعان. العاشقىدا تۇتاس وتباسىن كارانتينگە جاپقان. كەيىن جانۇيا مۇشەلەرىننىڭ بىرىنەن دەنە قىزۋى كوتەرىلۋىنە بايلانىستى جەدەل-جاردەم قىزمەتىنىڭ ماماندارىنا قوڭىراۋ تۇسكەن. ءتارتىپ بويىنشا ناۋقاستى وقشاۋلاپ، وتباسى مۇشەلەرىنەن ۆيرۋستى انىقتاۋ ماقساتىندا سىناما الىنعان. ساراپتاما قورىتىندىسى ايەل ادامنىڭ بويىندا اتى جامان اۋرۋدىڭ بار ەكەنىن راستاعان. ال، اكە مەن بالا كەسەلدەن ءدىن امان بولىپ شىققان.
تاعى دا تىركەلگەن جاعداي توي تويلاۋدىڭ كەسىرىنەن بولىپ وتىر. ناۋقاس وزبەكستان رەسپۋبليكاسىنا قوناققا بارعان. كورشىلەس مەملەكەتكە بارعاندار سانى 14 ادامدى قۇراعان. ولاردىڭ الماتى وبلىسىنا بەت العاندىعى تۋرالى تۇركىستان وبلىسىنىڭ جاۋاپتى مەكەمەلەرى ارقىلى بىلگەن. وڭىرگە كەلگەن بارلىق 14 ادامنان تالداۋ الىنعان. ناتيجە بويىنشا ولاردىڭ ىشىندە بىرەۋىنىڭ ۆيرۋس جۇقتىرعانى ءمالىم بولدى.
سوڭعى تىركەلگەن ناۋقاس 1952 جىلى ومىرگە كەلگەن جامبىل اۋدانىنىڭ تۇرعىنى. بەلگىلى بولعانداي ول 17 ناۋرىزدا الماتى قالاسىنداعى جەكە ەمحانادا ەمدەلگەن.
اۋدانعا ورالعاننان سوڭ جاعدايىنىڭ ناشارلاۋىنا بايلانىستى جەرگىلىكتى مەديسينالىق مەكەمەگە قارالعان. ەرەجەگە سايكەس، دەنساۋلىعىنا شاعىمدانعان جاندى وقشاۋلاپ، تەكسەرگەن. وكىنىشتىسى سول ناتيجە وڭ كورسەتكىشتى كورسەتكەن. بارشا ۆيرۋس انىقتالعان ادامدارمەن بايلانىس ورناتقان جانداردا تەكسەرىستەن وتكىزىلگەن. باقىتتارىنا قاراي ولاردىڭ اعزالارىنان ىندەتتىڭ ءىزى تابىلماعان.
تاعى دا وبلىستا ءبىر ادامنىڭ دەرت جۇقتىرعانى انىقتالدى. وعان قاتىستى مالىمەتتەر تەكسەرىلۋ ۇستىندە. الداعى ۋاقىتتا قوسىمشا حابارلايتىن بولامىز.
انار سابىروۆا، الماتى وبلىسى
