تاريحتان بەلگىلى اتا-بابالارىمىز ناۋرىز مەرەكەسىن ون كۇن بويى تويلاپ، ونى «ناۋرىزناما» دەپ اتاعان. وسى ورايدا ناۋرىز مەيرامىنا ءتان سالت-داستۇرلەر دە قالىپتاسقان. ونىڭ ىشىندە ەڭ ماڭىزدىسى – جاڭارۋعا، تازالىققا بەت بۇرۋ. ناۋرىز مەيرامىنىڭ ءمانى تەك تابيعاتتىڭ جاڭارۋى عانا ەمەس، سونىمەن قاتار ادامداردىڭ ءومىرىن، ورتاسىن تازارتۋعا دەگەن ۇمتىلىسى.
جاڭارۋ كۇنى ادامدار ءۇي-جايىن، اۋلالارىن قوقىستان تازارتىپ، بۇلاق كوزدەرىن اشادى، كوگالداندىرۋ جۇمىستارىن جۇرگىزەدى. بۇل – ناۋرىزدىڭ باستى ءداستۇرى، تابيعات پەن ادامنىڭ ۇيلەسىمدىلىگىن بىلدىرەدى.
بۇگىن جەتىسۋ ۋنيۆەرسيتەتىنىڭ ۇجىمى مەن ستۋدەنتتەرى ناۋرىزناما اياسىندا سەنبىلىككە شىعىپ، قورشاعان ورتانى تازالاۋعا ۇلەس قوستى.
– قورشاعان ورتانى تازا ۇستاۋ، ونىڭ ەكولوگيالىق جاعدايىن جاقسارتۋ – ءاربىر ادامنىڭ پارىزى. ءبىز سەنبىلىككە شىعۋ ارقىلى تابيعات الدىنداعى جاۋاپكەرشىلىگىمىزدى سەزىنىپ، تازالىقتى ءوز اينالامىزدان باستادىق. ناۋرىزناما اياسىندا وتكىزىلگەن وسى يگى شارالار ارقىلى جاستاردىڭ بويىندا ەكومادەنيەتتى قالىپتاستىرۋعا تىرىستىق، – دەدى ۋنيۆەرسيتەتتىڭ رەكتورى ەرمەك بورىبايەۆ.
سەنبىلىككە شىققان ستۋدەنتتەر ءبىلىم ورداسىنىڭ اينالاسىن قىستان قالعان قوقىستاردان تازارتىپ، جاڭارۋ كۇنىنە ۇلەس قوستى.
– بۇل سەنبىلىك مەن ءۇشىن تەك ەكولوگيالىق شارا عانا ەمەس، رۋحاني جاڭارۋ كۇنى بولدى. قورشاعان ورتانى تازا ۇستاۋ، ونى كۇتۋ – تەك تابيعاتتىڭ عانا ەمەس، ءوزىمىزدىڭ دە ءومىرىمىزدىڭ اجىراماس بولىگى ەكەنى انىق. ءبىز جاستار رەتىندە وسىنداي شارالارعا قاتىسا وتىرىپ، ءوز جاۋاپكەرشىلىگىمىزدى سەزىنىپ، تازا ءارى ادەمى الەمدە ءومىر سۇرۋگە دەگەن ۇمتىلىستى ارتتىرىپ وتىرمىز. وسىنداي باستامالار ەلىمىزدىڭ جاس ۇرپاعىنا ەكولوگيالىق مادەنيەتتى قالىپتاستىرۋدا ۇلكەن ماڭىزعا يە دەپ سانايمىن، – دەدى «تۋرزيم» ماماندىعىنىڭ 2ء-شى كۋرس ستۋدەنتى بەيسەنباي ماۋلەن.
جالپى، بۇل شارا تەك ەكولوگيالىق تازالىقتى قامتاماسىز ەتۋ عانا ەمەس، جاستاردىڭ تابيعاتقا دەگەن جاۋاپكەرشىلىك پەن سۇيىسپەنشىلىگىن ارتتىرۋعا مۇمكىندىك بەردى. سەنبىلىك ارقىلى قورشاعان ورتاعا دەگەن كوزقاراس وزگەرىپ، ءاربىر ادامنىڭ بۇل الەمدە ءوز ورنىن تابۋعا دەگەن قۇشتارلىعى ويانادى. الداعى ۋاقىتتا وسىنداي باستامالار مەن ءىس-شارالار ەلىمىزدە ۇلكەن ناتيجە بەرىپ، جاستار اراسىندا ەكولوگيالىق مادەنيەتتى قالىپتاستىرۋعا سەپتىگىن تيگىزەتىنى انىق.
جەتىسۋدا ۇلتتىق كيىمدەر كۇنىنە وراي ەتنودەفيلە، كورمەلەر، وتباسىلىق كونكۋرستار، بەينەچەللەندج وتكىزىلدى.
