تۋريستىك ينفراقۇرىلىمدى دامىتۋ اياسىندا جىل سوڭىنا دەيىن تەكەلى قالاسىندا ۆيزيت ورتالىعى اشىلماق. بۇل تۋرالى بۇگىن قالا تۇرعىندارىمەن كەزدەسۋ بارىسىندا وبلىس اكىمى بەيبىت يسابايەۆ ايتتى،- دەپ حابارلايدى Dalanews.kz
ءوڭىر باسشىسى ءوز سوزىندە تەكەلى قالاسىنىڭ ماڭىندا ورنالاسقان «بۇرقانبۇلاق» سارقىراماسىنىڭ تۋريستىك الەۋەتى جوعارى ەكەنىن اتاپ ءوتىپ، بيىل سارقىراماعا باراتىن جولدى جاڭعىرتۋ جۇمىستارى باستالعانىن جەتكىزدى.
- جول جوندەۋ جۇمىستارى اياقتالعاننان كەيىن تۋريستەر لەگى ارتىپ، «بۇرقانبۇلاق» ءوڭىردىڭ تانىمال كورىكتى ورىندارىنىڭ بىرىنە اينالادى دەپ كۇتىلۋدە. جالپى، تەكەلىنىڭ تابيعي-رەكرەاسيالىق الەۋەتى ءتۋريزمدى دامىتۋعا ۇلكەن مۇمكىندىك بەرەدى. سوندىقتان تۋريستىك ينفراقۇرىلىمدى دامىتۋ اياسىندا جىل سوڭىنا دەيىن قالادا دەمالىس ورىندارى مەن تۋريستىك قىزمەتتەر تۋرالى اقپارات بەرەتىن ۆيزيت ورتالىعى اشىلادى، - دەدى ب. يسابايەۆ.
بۇدان بولەك، بيىل جەكە كاسىپكەرلەر ءقوناقۇي، سول سياقتى جىلىنا 50 مىڭ كەلۋشى قابىلداي الاتىن سپورتتىق-تۋريستىك كەشەن قۇرىلىسى جوبالارىن ىسكە اسىرۋدا.
اتاپ وتسەك، تەكەلىدە 21 دەمالىس ورنى جۇمىس ىستەيدى، وندا بيىلعى جىلدىڭ ءبىرىنشى توقسانىندا 3 مىڭ كەلۋشىگە 88 ملن. تەڭگەگە اقىلى قىزمەت كورسەتىلگەن.
جالپى، جەتىسۋ وبلىسىنا وتكەن جىلى 2 ملن. تۋريست ادام كەلگەن، ياعني الدىڭعى جىلمەن سالىستىرعان 11،1 % وسكەن.
