مەملەكەتتىك مەنشىككە تەمىرجول ينفراقۇرىلىمى نىسانى قايتارىلدى، دەپ حابارلايدى Dalanews.kz.
اسكەري پروكۋرورلار اسكەري مۇلىكتى ماقساتتى پايدالانۋىن قامتاماسىز ەتۋ باعىتىنداعى جۇيەلى جۇمىستى جالعاستىرۋدا.
سارىوزەك گارنيزونىنىڭ اسكەري پروكۋراتۋراسى جۇرگىزگەن تالداۋ ناتيجەسىندە جەر كوميسسياسىنىڭ شەشىمى جانە جەر قاتىناستارى جونىندەگى جەرگىلىكتى ورگانمەن جاسالعان ساتىپ الۋ-ساتۋ شارتى نەگىزىندە اسكەري بولىمدەردىڭ ءبىرىنىڭ تەمىرجولعا باراتىن تارماعىنىڭ ءبىر بولىگىن كوممەرسيالىق قۇرىلىمنىڭ مەنشىگىنە زاڭسىز بەرۋ فاكتىسى انىقتالدى.
قاداعالاۋ اكتىسى نەگىزىندە اسكەري ءبولىم جەتىسۋ وبلىسىنىڭ مامانداندىرىلعان اۋدانارالىق اكىمشىلىك سوتىنا اتالعان شەشىم مەن شارتتى زاڭسىز دەپ تانۋ تۋرالى تالاپ ارىزبەن جۇگىندى.
سوتپەن تالاپ ارىز قاناعاتتاندىرىلدى، قۇنى 75 ملن تەڭگەدەن اساتىن كىرمە جول قورعانىس ۆەدومستۆوسىنىڭ مەنشىگىنە قايتارىلدى.
اسكەري پروكۋراتۋرا ورگاندارى اسكەري نىسانداردىڭ ساقتالۋىن جانە ولاردى ءتيىستى پايدالانۋىن قامتاماسىز ەتۋ جونىندەگى قاداعالاۋ شارالارىنىڭ ىسكە اسۋىن ودان ءارى جالعاستىرادى.
