بۇگىن ناۋرىز مەرەكەسىن اتاپ ءوتۋ اياسىنداعى شاڭىراق كۇنىنە وراي الەۋمەتتىك جاعىنان وسال توپتاعى ازاماتتارعا، جەتىم بالالارعا، كوپبالالى وتباسىلارعا وبلىس ورتالىعىندا جاڭا 60 پاتەر بەرىلدى. تالدىقورعاندىقتارعا پاتەر كىلتتەرىن وبلىس اكىمى بەيبىت يسابايەۆ تاپسىردى،- دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جالپى «سامۇرىق قازىنا» ۇلتتىق ءال-اۋقات قورى» اق قارجىسىنا تۇرعىزىلعان بەس قاباتتى تۇرعىن ءۇيدىڭ قۇرىلىسى وتكەن جىلدىڭ ناۋرىز ايىندا باستالعان بولاتىن. بۇگىن پايدالانۋعا بەرىلگەن ءۇيدىڭ 15ء-ى - ءبىر بولمەلى، 15ء-ى – ەكى بولمەلى، 30-ى – ءۇش بولمەلى پاتەرلەر.
ءوڭىر باسشىسى «بىرلىك» شاعىن اۋدانىنداعى جاڭا قونىس يەلەرىن قۋانىشتارىمەن قۇتتىقتاپ، تالدىقورعان قالاسىنا جاسالىپ وتىرعان قولداۋلار شارالارىنا، سونىڭ ىشىندە تۇرعىن ءۇي قۇرىلىسىن جانداندىرۋعا قاتىستى جۇمىستارعا قىسقاشا توقتالدى.
- بۇگىن زاماناۋي ۇلگىدە سالىنعان، ادەمى، جايلى ءۇي وزدەرىڭىز سياقتى ءبىرشاما جىلدان بەرى كەزەكتە تۇرعان ازاماتتارعا بەرىلىپ وتىر. جالپى وبلىس كولەمىندە «سامۇرىق قازىنا» قورى بىزگە تالدىقورعان قالاسىندا، سول سياقتى پانفيلوۆ جانە كەربۇلاق اۋداندارىندا تۇرعىن ۇيلەر سالىپ بەرەدى. بۇگىن سول ۇيلەردىڭ العاشقى لەگى وزدەرىڭىزگە ۇسىنىلىپ وتىر. وتكەن جىلى تۇرعىن ءۇي بەرۋدىڭ بارلىق باعىتى بويىنشا تالدىقورعان قالاسىنىڭ وزىندە 1283 وتباسى باسپانالى بولسا، بيىلعى جىلى 1 500-گە جۋىق وتباسىعا باسپانا كىلتتەرى تابىستالاتىن بولادى. بۇل رەتتە جىل باسىنان بۇگىنگىنى قوسا العاندا 188 وتباسى ءۇيلى بولىپ وتىر، - دەپ اتاپ وتكەن ب. يسابايەۆ الداعى جوسپارلار جايىن تىلگە تيەك ەتىپ، جاڭا پاتەر يەلەرىنە ىزگى تىلەگىن ءبىلدىردى.
مۇگەدەك بالا اسىراپ وتىرعان انا گۇلايىم ابيلحامييەۆا دا - جاڭا قونىسقا يە بولعانداردىڭ ءبىرى.
- ءۇش بالام بار. كەمتار بالا ءوسىرىپ وتىرعاندىقتان، باسپانانىڭ جايلى بولۋى ءبىرىنشى كەزەكتە ماڭىزدى. بۇعان دەيىن ۇزاق جىل جەر ءۇي جالداپ تۇردىق، جايلى ءۇي جالداۋعا مۇمكىندىگىمىز بولمادى. ون ءۇش جىل ءۇي كەزەگىندە تۇردىق. بۇگىن قولىمىزعا جاڭا پاتەردىڭ كىلتى ءتيدى. بارىنەن دە بالامنىڭ كۇتىمىنە جايلى بولاتىنىن ويلاپ، ەرەكشە قۋانىپ تۇرمىن، - دەيدى ول قۋانىشىن جاسىرماي.
قونىس تويىن اتاپ ءوتىپ جاتقانداردىڭ ىشىندە كوپبالالى وتباسىلار دا بار.
- ءوزىم «كۇمىس القا» يەگەرىمىن. بالالارىم بايلىعىم دەپ بىلەمىن. بۇگىن ناۋرىز مەرەكەسى قارساڭىندا مەملەكەتتەن 3 بولمەلى جاڭا پاتەر بەرىلىپ وتىر. بۇكىل اۋلەتىمىزبەن قۋانىپ جاتىرمىز. تۇرعىن ۇيمەن قامتۋ ءىسىنىڭ باسى-قاسىندا جۇرگەن ازاماتتارعا العىسىم شەكسىز. بارشا قونىستوي يەلەرىن بۇگىنگى قۋانىشتارىمەن قۇتتىقتايمىن، - دەدى اقتوتى انكەجانوۆا.
تالدىقورعاندىق جالعىزباستى انا نادەجدا سۋحوملينوۆا دا جاڭا پاتەرگە قول جەتكىزگەنىنە ريزا:
- ءۇش بالانىڭ اناسىمىن. ۇلكەنىم ءقازىر پاتەراقى تولەمىنە، تۇرمىسىمىزعا جاردەمدەسۋ ءۇشىن باسقا قالاعا جۇمىسقا كەتكەن. ەندى ءوز باسپانامىزعا قول جەتكىزدىك، ءبارىمىز ءبىر شاڭىراق استىندا تۇراتىن بولامىز، - دەيدى ول.
ەسكە سالساق، «شاڭىراق كۇنىندە» بەلگىلەنگەن ءىس-شارالار وتباسى ينستيتۋتىن نىعايتۋعا، وتباسى قۇندىلىقتارىن ناسيحاتتاۋعا باعىتتالۋدا. وسىعان وراي وبلىستىڭ اۋدان-قالالارىندا ەلۋ جىل وتاسقان وتباسىلارمەن كەزدەسۋلەر، ۇلگىلى شاڭىراق يەلەرىمەن سىر-سۇحباتتار، جاس وتباسىلار بايقاۋلارى، نەكە قيۋ ءراسىمى، جاڭا تۋعان جاس نارەستەلەر مەن ولاردىڭ انالارىن قۇتتىقتاۋ، ت.ب. شارالار كەڭىنەن وتكىزىلۋدە.
