جەتىسۋ وبلىسىندا بالالار مەكتەپتەگى ينفورماتيكا كابينەتىندەگى كومپيۋتەر ارقىلى ەرەسەكتەرگە ارنالعان سايتتارعا، سونداي-اق "يگرا ساتانى" اتتى ءدىني رەسۋرسقا كىرگەنى انىقتالدى، دەپ جازادى Dalanews.kz.
بۇگىن، 27 قاڭتاردا جەتىسۋ وبلىسىنىڭ پروكۋراتۋراسى بالالاردى قورعاۋ ماقساتىندا تىيىم سالىنعان سايتتاردى بۇعاتتاعانىن حابارلادى.
"بالالارعا قاتىستى زاڭعا قايشى ىس-ارەكەتتەرگە، سونىڭ ىشىندە ينتەرنەت رەسۋرستارى ارقىلى بولسا ەرەكشە نازار اۋدارىلادى. وسىلايشا، كوكسۋ اۋدانىنداعى 7 مەكتەپتە 4 مىڭ وقۋشى ينفورماتيكا كابينەتىندەگى تىيىم سالىنعان سايتتارعا، سونىڭ ىشىندە "يگرا ساتانى" ءدىني رەسۋرسىن جانە مازمۇنى ەرەسەكتەرگە ارنالعان سايتتارعا كىرگەن. پروكۋرورلىق قاداعالاۋ اكتىسىمەن بۇل سايتتار بۇعاتتالعان. 7 ءمۇعالىم جول بەرىلگەن بۇزۋشىلىقتارى ءۇشىن تارتىپتىك جاۋاپكەرشىلىككە تارتىلدى"، دەلىنگەن پروكۋراتۋرا حابارلاماسىندا.
پروكۋراتۋرا اتا-انالاردى بالالاردىڭ ۆيرتۋالدى بەلسەندىلىگىن ۇنەمى قاداعالاپ وتىرۋعا جانە ولاردىڭ مىنەز-قۇلقىنداعى وزگەرىستەرگە نازار اۋدارۋعا شاقىرادى.
