بۇگىندە جەتىساي اۋدانىندا جالپى 650 گەكتار جۇزىمدىك القابى بار بولسا، ونىڭ 82،5 گەكتارى بيىل وتىرعىزىلعان. قازىرگى تاڭدا جەتىسايلىق ديقاندار ءجۇزىم القاپتارىنان 2832 توننا ءونىم جيناپ ۇلگەردى. مول ءونىم جيناپ جاتقانداردىڭ قاتارىندا «ارسەنال-ساد» جشس-دە بار. جەتىساي اۋدانىنىڭ اكىمى جامانتاي بەيسەنبايەۆ اتالعان قوجالىقتىڭ جۇزىمدىك القابىندا بولىپ، جيىن-تەرىم جۇمىستارىنىڭ بارىسىمەن تانىسىپ شىقتى.
«ارسەنال-ساد» جاۋاپكەرشىلىگى شەكتەۋلى سەرىكتەستىگىنىڭ يەلەگىندە 75 گەكتار الما، 92 گەكتار جۇزىمدىك القابى بار. المانىڭ ءبىر كەلىسى 100-150 تەڭگە ال ءجۇزىمنىڭ ءبىر كەلىسى 80-100 تەڭگە ارالىعىندا ساتىلۋدا. وندىرىلگەن ءونىمنىڭ باسىم كوپشىلىگى ەلىمىزدىڭ سولتۇستىك وبلىستارى مەن كورشىلەس رەسەي ەلىنىڭ شەكارالاس ايماقتارىنا جونەلتىلۋدە.
سەرىكتەستىكتىڭ جۇمىسىنا جاڭا سەرپىن تىلەگەن اۋدان اكىمى الداعى ۋاقىتتا وڭىردە قارقىندى باۋ كولەمى مەن ءجۇزىم پلانتاسيالارىن ۇلعايتۋ كوزدەلىپ وتىرعاندىعىن جەتكىزدى.
ايتا كەتەيىك، جەتىساي اۋدانىنداعى ءجۇزىم القاپتارىنىڭ باسىم كوپشىلىگى كەڭەس زامانىندا الەمگە اتى ءمالىم بولعان اباي اۋىل وكرۋگىندە ورنالاسقان. اتالعان وكرۋگتە قازىرگى تاڭدا 293،5 گەكتار جۇزدىك القابى جايقالىپ تۇر. ءقازىردىڭ وزىندە ابايلىق ديقاندار 1362 توننا ءجۇزىم جيناپ، اۋداندا كوش باستادى.
جەتىساي اۋدانى اكىمىنىڭ باسپا ءسوز قىزمەتى
