تۇركىستان وبلىسىنىڭ جەتىساي اۋداندىق ورتالىق اۋرۋحاناسى كۇردەلى جوندەۋدەن ءوتىپ سۋ جاڭا «انگيوگراف» مەديسينالىق قۇرالى ورناتىلىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

اۋداندىق اۋرۋحانا «اۋىلدا دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى اياسىندا كۇردەلى جوندەۋ جۇمىستارى جۇرگىزىلگەن. جوندەۋ جۇمىسىنان كەيىن ەمدەۋ مەكەمەسىنە زاماناۋي قابىلداۋ ءبولىمى جانە «ماگنيتتى-رەزونانستى توموگراف (مرت)» عيماراتتارى سالىنعان.

كۇردەلى جوندەۋ جۇمىستارى رەسپۋبليكالىق بيۋدجەتتەن جاسالدى. سونداي-اق، زاماناۋي «انگيوگراف» مەديسينالىق قۇرالى ورناتىلىپ، اقحالاتتىلاردىڭ ءوز كاسىبىنە دەگەن ادالدىعىنىڭ ارقاسىندا ءقازىر ناۋقاستارعا جۇرەك-قان تامىرلارى اۋرۋلارىنا كۇردەلى وپەراسيالار جاسالىنۋدا.

ەم العاندار دەرتىنە داۋا تاۋىپ، بيلىك ورىندارىنا العىس ايتۋدا. بۇل كوروناروگرافيا جاسايتىن اپپارات اۋداندار اراسىندا تەك جەتىسايدا عانا بار. سوندىقتان، كورشىلەس اۋدان تۇرعىندارى دا بۇل قىزمەت ءتۇرىن الا الادى.

بۇگىندە اۋداندىق اۋرۋحانادا 1241 قىزمەتكەر جۇمىس جاسايدى. اۋرۋحاناعا تىركەلگەن حالىق سانى – 85 315 ادامدى قۇرايدى.

ايتا كەتۋ كەرەك، 2017 جىلدان بەرى كومپيۋتەرلىك توموگراف (كت) مەديسينالىق قۇرالى حالىققا مەديسينالىق قىزمەت كورسەتىپ كەلەدى.

2025 جىلعا «ماگنيتتى-رەزونانستى توموگراف (مرت)» مەديسينالىق قۇرال جابدىعىن ساتىپ الۋ جوسپارلانعان.

قازىرگى تاڭدا اۋرۋحانا كوپ بەيىندى اۋرۋحانا ستاتۋسىنا يە بولۋ ءۇشىن، سونداي-اق مەديسينا سالاسىن قالىپتى دامىتا وتىرىپ، ناۋقاستارعا قىزمەت كورسەتۋ ساپاسىن ارتتىرۋ ماقساتىندا جۇيەلى تۇردە جۇمىستار جاسالىنۋدا.