جەرگىلىكتى اۋدان اكىمدەرىنىڭ سايلاۋىنىڭ ءوتۋى - جاڭا ساياسي پروسەسس. ويتكەنى بۇل جەرگىلىكتى اتقارۋشى بيلىكتى دەموكراتيالاندىرۋعا دەگەن نەگىزگى قادام. بۇل جوعارى بيلىكپەن جەرگىلىكتى بيلىكتىڭ اراسىنداعى ساباقتاستىقتىڭ ورناعانىن كورسەتەدى. ەكىنشى جاعىنان، جەرگىلىكتى اتقارۋشى ورگاننىڭ ءوزىن-وزى باسقارۋ مۇمكىندىگى جانە سول جەردەگى ماسەلەنى جاقسى بىلەتىن ازاماتتىڭ باسقارۋعا كەلۋى وعان ارتىقشىلىق بەرەدى. سەبەبى ءاربىر اۋماقتىڭ وزىندىك ەرەكشەلىگى بولادى. ءبىر اۋىلعا قولدانىلعان جوسپار (نەمەسە ءتاسىل) ەكىنشى ايماققا مۇلدەم كەلمەۋى مۇمكىن، سوندىقتان سول ايماقتى جاقسى بىلەتىن ادامنىڭ سايلانۋى ماسەلەلەردىڭ دۇرىس تا، تەز شەشىلۋىنە جول بەرەدى.
ستاتيستيكالىق مالىمەتتەرگە كەلەتىن بولساق، 2023 جىلعى سايلاۋدىڭ باستى ەرەكشەلىگى - بۇل ۇمىتكەرلەردىڭ 25% ءوزىن-وزى ۇسىنعان كانديداتتار بولۋى. سونداي-اق، سايلانعان اكىمدەردىڭ 57،4%-ى بۇرىن بۇل قىزمەتتە جۇمىس ىستەمەگەن. ياعني، اۋىل اكىمدەرىنىڭ كورپۋسى ايتارلىقتاي جاڭارعانىن كورەمىز.
سونىمەن قاتار، سايلاۋداعى باسەكەلەستىكتىڭ ساندىق اسپەكتىسى دۇرىس قۇرىلعان پارتيالىق جۇيەنى باعالاۋعا مۇمكىندىك بەرەدى. ماجىلىستە فراكسيالىق تۇردە ۇسىنىلعان بارلىق ساياسي پارتيالار دا ءوز وكىلدەرىن ۇسىندى. ولاردىڭ پايىزدىق ۇلەسى 75% قۇرادى.
بارلىعى 10 ايەل كانديدات تىركەلدى. ونىڭ ىشىندە، ايەلدەر اباي جانە جەتىسۋ وبلىستارىندا، سونداي-اق اقمولا، شىعىس قازاقستان، قاراعاندى، سولتۇستىك قازاقستان جانە پاۆلودار وبلىستارىندا وزدەرىنىڭ ساياسي بەلسەندىلىكتەرىن كورسەتتى. اكىم لاۋازىمىنا ۇمىتكەرلەردىڭ ەڭ كوپ سانى اباي جانە قاراعاندى وبلىستارىندا تىركەلگەن.
بۇل پروسەس ازاماتتاردىڭ كونستيتۋسيالىق قۇقىقتارىن تولىق ىسكە اسىرادى. حالىقتىڭ بيلىككە دەگەن سەنىمىن ارتتىرادى. سونىمەن بىرگە اكىمنىڭ حالىق الدىندا جاۋاپكەرشىلىگىن كۇشەيتەدى جانە ازاماتتىق قوعام مۇشەسى رەتىندە قوعامنىڭ داۋىس بەرۋ مۇمكىندىگى كوبەيەدى.
ەلميرا وتار، الەۋمەتتانۋشى، PHD دوكتورى
