قاروي جانە جاراسپاي اۋىلدىق وكرۋگتەرىنىڭ تۇرعىندارى جايىلىم تاپشىلىعىنا شاعىمداندى.
– ماسەلە وتە وزەكتى. مالعا ازىق تاپپاي وتىرمىز. اينالاداعى جەردىڭ بارلىعى جەكە مەنشىكتە. يەلەرى بۇل جەرگە مال جايۋعا رۇقسات بەرمەيدى، وزدەرى دە بۇل جەردى پايدالانبايدى، – دەدى اۋىل تۇرعىندارىنىڭ ءبىرى امانتاي قۇپانوۆ.
نۇرا اۋدانىنىڭ اكىمى ايان شالماعامبەتوۆتىڭ ايتۋىنشا، بۇگىنگى تاڭدا جايىلىمدىق جەرلەردى ءتيىمسىز پايدالانۋ فاكتىلەرى ورىن الىپ وتىرعانى راستادى.
اۋدان اكىمدىگى جۇرگىزگەن تالداۋ ناتيجەسى بويىنشا جەكە قوسالقى شارۋاشىلىقتاعى 75 مىڭ باس مال ءۇشىن 641 مىڭ گەكتار جايىلىم قاجەت ەكەنى انىقتالدى. بۇل رەتتە 261 مىڭ گەكتار جايىلىم جەر تاپشى. تەك التى اۋىلدىق وكرۋگ بويىنشا جايىلىم ماسەلەسى 100% شەشىلگەن.
– اۋىلداعى بىردەن-بىر تابىس كوزى جايىلىمعا تىكەلەي تاۋەلدى مال شارۋاشىلىعى ەكەنىن ءتۇسىنۋىمىز كەرەك. ءبىراق جەردىڭ كوپتىگىنە قاراماستان، ءار ايماقتا اۋىل تۇرعىندارىنا مال جايۋى ءۇشىن جەر جەتىسپەيدى. ال وسى ەلدى مەكەندەرگە جاقىن جەرلەردىڭ توزىعى جەتكەن.
بۇگىنگى تاڭدا ەلىمىزدەگى جايىلىمدىق جەرلەردىڭ جالپى قاجەتتىلىگى 22 ملن گەكتاردى قۇرايدى. اۋىلدىق جەرلەردە حالقىمىزدىڭ جارتىسىنا جۋىعى تۇراتىنىقتان، «AMANAT» بۇل ماسەلەگە ەرەكشە نازار اۋدارادى، – دەپ اتاپ ءوتتى پارتيا حاتشىسى ەلدار جۇماعازييەۆ.
ماسەلەنى جۇيەلى تۇردە شەشۋ ءۇشىن، پارتيالىقتار اۋىل اكىمدەرى ءوز دەڭگەيىندە سۋارۋ جانە جەردىڭ دەگراداسياسى پروبلەمالارىن شەشە الاتىنداي قولدانىستاعى زاڭناماعا وزگەرىستەر ەنگىزۋ قاجەتتىگىن اتاپ ءوتتى.
اتاپ ايتقاندا، جايىلىمداردىڭ توزۋىنا جانە شولەيتتەنۋىنە قارسى كۇرەس جونىندەگى بيۋدجەتتىك باعدارلامانى وبلىستىق دەڭگەيدەن اۋىلدىق وكرۋگتەر اكىمدەرىنىڭ دەڭگەيىنە بەرۋ، مال باسىن ەسكەرە وتىرىپ، جايىلىمداردىڭ جالپى الاڭىنا تۇسەتىن جۇكتەمە نورمالارىن جاڭارتۋ، ەلدى مەكەن شەكاراسىنان 5 شاقىرىم راديۋستا اۋىل شارۋاشىلىعى تاۋارىن وندىرۋشىلەرگە جايىلىم بەرۋگە تىيىم سالۋ ۇسىنىلادى.
نۇرا اۋدانىنداعى پروبلەمانى شەشۋ ءۇشىن اكىم ايان شالماعانبەتوۆكە جايىلىمدىق القاپتاردا حالىقتىڭ مال جايۋىن قامتاماسىز ەتۋگە اۋىل شارۋاشىلىعى تاۋارىن وندىرۋشىلەر، اۋىل اكىمدەرى جانە جەرگىلىكتى قوعامداستىق اراسىندا مەموراندۋم جاساسۋ تاپسىرىلدى.
سونداي-اق اۋىلدار مەن كەنتتەردىڭ اكىمدەرىنە شالعايداعى مال شارۋاشىلىعى ءۇشىن بوسالقى جەرلەردەن ۋاقىتشا اقىسىز جەر پايدالانۋ قۇقىعىمەن القاپتار بەرۋ تاپسىرىلدى.
بۇل ماسەلە «AMANAT» پارتياسىنىڭ ەرەكشە باقىلاۋىنا الىندى.
سۋرەتتى تۇسىرگەن رادمير فاحرۋتدينوۆ.
