الماتىدا تۇرعىندار قاڭتاردا جەر سىلكىنىسىن سەزدى. وسى وقيعادان كەيىن توتەنشە جاعداي كەزىندە تۇرعىندارعا ەرتەرەك حابارلايتىن دابىل جۇيەسى ىستەن شىققانى تۋرالى اقپارات تارادى. كەيىن بۇل انتيكوردىڭ نازارىنا ىلىككەنى بەلگىلى بولدى. بۇگىن بريفينگتە توتەنشە جاعدايلار ءمينيسترى شىڭعىس ارىنوۆتەن الماتىداعى جەر سىلكىنىسىن حابارلايتى دابىل جۇيەسىنە قاتىستى تەرگەۋ بارىسى تۋرالى سۇرالدى، - دەپ حابارلايدى Dalanews.kz.
سۋ جاڭا مينيستر بۇل سۇراققا ماردىمدى جاۋاپ بەرمەدى.
"الماتى توتەنشە جاعداي دەپارتامەنتىنە بايلانىستى 23 قاڭتاردان كەيىنگى ءىس-قيمىلدارعا قاتىستى تەكسەرىس جۇرگىزىلىپ جاتىر ازىرگە قورىتىندى شىققان جوق. تەرگەۋ بارىسى، ناتيجەلەرى تۋرالى اياقتالعاننان كەيىن بىلەمىز. تەكسەرىس دابىل جۇيەسى بويىنشا جانە وسى جۇيەنى ساتىپ الۋ جونىندەگى ءىس-قيمىلدارعا بايلانىستى جۇرگىزىلەدى"، - دەدى ول.
بۇعان دەيىن "ادىلدىك جولى" قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ Facebook-تە الماتىداعى جەر سىلكىنىسى تۋرالى ەرتەرەك حابارلاۋعا جاۋاپتى جانە بۇل قىزمەتى ءۇشىن 1،1 ميلليارد تەڭگە العان كومپانيا نۇرالى الييەۆكە تيەسىلى دەپ مالىمدەگەن بولاتىن.
ال ودان كەيىن سىبايلاس جەمقورلىققا قارسى قىزمەت وكىلى الماتىداعى جەر سىلكىنىسىن حابارلايتىن دابىل جۇيەسىنە قاتىستى تەكسەرىس بولاتىنىن مالىمدەدى.
ءتيىستى ءوتىنىشتى ۆەدومستۆونىڭ الماتى قالاسىنداعى دەپارتامەنتى تىركەگەن بولاتىن.
