(جەر رەفورماسى جٶنٸندەگٸ رەسپۋبليكالىق كوميسسييانىڭ تٶراعاسى ب.ساعىنتاەۆتىڭ جەنە كوميسسييا مٷشەلەرٸ دوس كٶشٸم, جانۇزاق ەكٸم, ايدوس سارىم, مۇحتار تايجاننىڭ نازارىنا!)
ەڭ الدىمەن ايتىپ قويايىن, ٶز باسىم جەردٸ شەتەلدٸك كومپانييالارعا جالعا بەرۋگە دە, قازاقستاندىقتارعا ساتۋعا دا تٷبەگەيلٸ قارسىمىن!
جەر رەفورماسى جٶنٸندەگٸ رەسپۋبليكالىق كوميسسييانىڭ كٶكشەتاۋ قالاسىندا ٶتكەن كەزەكتٸ وتىرىسىندا اقمولا وبلىسىنىڭ ەكٸمٸ سەرگەي كۋلاگيننەن كوميسسييانىڭ مٷشەسi مۇحتار تايجان ناقتى قانشا جەرٸ بار ەكەنiن ايتۋدى ٶتiندi. «بارلىعى بٷگiندە 80 مىڭ گەكتار ەگiستiك جەر بار», - دەدi سەرگەي كۋلاگين.
ال, www.dalanews.kz سايىتى "كەيبٸر دەرەكتەردە كۋلاگيننٸڭ جەرٸ ميلليون گەكتارعا تاياۋ ەكەنٸ ايتىلادى" -دەپ جازىپتى.
[caption id="attachment_16293" align="alignright" width="373"]
كوميسسييانىڭ تاعى بٸر مٷشەسٸ مىرزاتاي جولداسبەكوۆ اقساقال جەردٸ شەتەلدٸك كومپانييالارعا جالعا بەرۋ جەنە قازاقستاندىقتارعا ساتۋ تۋرالى: «مەن ويلايمىن, باسىمىزعا سونشاما نە كٷن تۋدى ٶزٸ? وسى جەر قازاقتىڭ جەرٸ عوي. جٸگٸتتەر ايتىپ جاتىر عوي, قالادا تۇراتىندارعا 10 سوتىق جەر بەرسە, اناۋ اۋىلدا تۇراتىندارعا 25 سوتىق جەر ٶزٸنە بەرسە. مىنا قاراپايىم حالىق زاڭنان قورقىپ تۇرعان جوق, زاڭسىزدىقتان قورقىپ وتىر. ەبدەن زاپى جەپ قالعان, وپىق جەپ قالعان بۇلار… بٸلەدٸ كٸمنٸڭ الاتىنىن. باياعى بايىعاندار الادى, سوسىن بيلٸك باسىنداعىلار دەگەن سيياقتى» -دەپ, ەمەشەگٸ ەزٸلە وتىرىپ, ٶز الاڭداۋشىلىعىن بٸلدٸرٸپتٸ.
ال, ەندٸ سول مىزەكەڭنٸڭ 2004 جىلى 27 قىركٷيەكتە جازعان كٷندەلٸگٸنەن مىنا بٸر ٷزٸندٸنٸ وقىپ كٶرەلٸك.
«اۋىلدا التى كٷن جاتىپ, 21 گەكتار شابىندىقتى قورشاتتىم. ەربٸر 3.5م. سايىن مەتالل ترۋبا تٸكتەدٸك. باس-اياعى ٷش شاقىرىمنان ارتىق ۇزىندىققا ۇيا قازىپ, ترۋبانى بەتونعا ورناتۋ, بەلٸنەن ٷش قابات سىم وراپ, ونى بەكٸتۋ وڭايعا تٷسكەن جوق. ەكٸ كٷندە-اق بٸتٸرەمٸن گوي دەپ قالادان تٶرت جٸگٸت جالداپ, جەتكٸلٸكتٸ بولسىن دەپ 4 توننا تسەمەنت, ەربٸر بۇرىلىسقا مىقتى بولسىن دەپ ورناتۋ ٷشٸن 16 جۋان ترۋبا الىپ كەلدٸم. جەر قاتتى, ۇياسىن قازۋ وڭايعا تٷسپەدٸ. سٶيتٸپ, تاڭنىڭ اتىسى, كٷننٸڭ باتىسى التى كٷن جٷردٸك» (مىرزاتاي جولداسبەكوۆ, «كٷندەرٸمنٸڭ كۋەسٸ» كٸتابى, 261-بەت. «كٷلتەگٸن» باسپاسى, 2007 جىل).
دەمەك, جەر الداعى كٷندەردە قازاقستاندىقتارعا ساتىلىمعا شىعارىلىپ جاتسا مىنانى بٸلگەنٸمٸز دۇرىس, «الادى» ەمەس, بايىعاندار مەن بيلٸك باسىنداعىلار 80 مىڭ گەكتاردان باستاپ, 21 گەكتارعا دەيٸن ەلدەقاشان الىپ, ۇشقان شىبىن كٸرمەستەي ەتٸپ قورشاپ قويعان.
سول ٷشٸن ەندٸ نە ٸستەۋ كەرەك?!
مٸندەتتٸ تٷردە مەملەكەت كٶلەمٸندە سەرگەي كۋلاگيننەن باستاپ, مىرزاتاي جولداسبەكوۆكە دەيٸن تٷبەگەيلٸ جەر رەفورماسىن جٷرگٸزٸپ, «جەر تۋرالى» زاڭدى قايتا قاراعان دۇرىس!!
ول ٷشٸن ەڭ الدىمەن جەر رەفورماسى جٶنٸندەگٸ رەسپۋبليكالىق كوميسسييانىڭ ەندٸگٸ وتىرىسىندا كوميسسييانىڭ تٶراعاسى, قازاقستان رەسپۋبيليكاسى پرەمەر-مينيسترٸنٸڭ بٸرٸنشٸ ورىنباسارى باقىتجان ساعىنتاەۆ مىرزادان باستاپ جاناربەك ەشٸمجانعا دەيٸنگٸ كوميسسييانىڭ 75 مٷشەسٸ ٶزدەرٸنٸڭ مەنشٸگٸندە ناقتى قانشا گەكتاردان جەرٸ بار ەكەندٸگٸن حالىق الدىندا اشىق جارييالاۋى تيٸس!
سوسىن 10 گەكتاردان ارتىق جەرٸ بار بٷكٸل قازاقستاندىقتار انىقتالۋى تيٸس! سودان كەيٸن بارىپ, «جەر تۋرالى» زاڭعا ٶزگەرتۋلەر مەن تولىقتىرۋلار ەنگٸزسە كٸرٸسكە ابزال.
ەندٸ «جەر تۋرالى» زاڭعا بايلانىستى ناقتى ۇسىنىسىمدى ايتايىن.
1. جەر مەملەكەتتٸڭ مەنشٸگٸندە بولۋ كەرەك;
2. جەردٸ تەك بٸر عانا مەكەمە – اۋىل شارۋاشىلىعى مينيسترلٸگٸ نەمەسە ۇلتتىق ەكونوميكا مينيسترلٸگٸ باسقارسىن;
3. اۋداندار مەن اۋىلدارعا ٶزٸنە قاراستى جەردٸ ٶزٸ باسقارۋ قۇقىعىن بەرٸلسٸن;
4. جەر تەك ەر اۋدان مەن اۋىلدىڭ تۇراقتى تٸركەۋدە تۇرعان تۇرعىندارى عانا ۇزاق مەرزٸمگە جالعا الا الاتىن بولسىن;
5. اۋداندار مەن اۋىلدار ٶز جاعدايلارىنا, جەر كٶلەمٸنە قاراي وتىرىپ, ازاماتتارعا بەرٸلەتٸن شارۋاشىلىق جەنە جايىلىمدىق جەر كٶلەمٸنٸڭ ەڭ تٶمەنگٸ جەنە ەڭ جوعارعى كٶلەمٸن, مەملەكەت بەلگٸلەگەن ٶلشەمدٸ نەگٸزگە الا وتىرىپ, ٶزدەرٸ بەلگٸلەسٸن;
6. بارلىق اۋىلدار مەن اۋدانداردىڭ شارۋاشىلىق جەنە جايىلىمدىق جەر كٶلەمٸنٸڭ ەڭ كەمٸندە 10 پايىزى شەتتەن كٶشٸپ كەلەتٸن ورالماندارعا قورعا قالدىرىلسىن;
7. جەر وتاندىق كومپانييالارعا جالعا بەرٸلگەن جاعدايدا, ول كومپانييا مەملەكەت بەلگٸلەپ بەرگەن ٶلشەمگە ساي ەتٸپ سول جەرگە يەلٸك ەتەتٸن اۋىلدىڭ ينفراقۇرىلىمىن دامىتۋعا مٸندەتتەلسٸن;
8. جەردٸ ۇزاق مەرزٸمگە جالعا العاننان كەيٸن ول وتباسىنىڭ سول مەرزٸم بٸتكەنگە دەيٸن تۋعان بالاسىنا جەر بەرٸلمەسٸن, قايتىس بولعان ادامىنىڭ جەرٸ قايتارىلىپ الىنباسىن, ۇزاتىلعان قىزدىڭ جەرٸ تٶركٸنٸندە قالسىن!
(ۇسىنىس جالعاستى تولىقتىرىلادى)
اۋىت مۇقيبەكتٸڭ فەيسبۋكتەگٸ پاراقشاسىنان الىندى
04.06.2016
استانا
