جەر ماسەلەسىن قوزعاعان بەلسەندىلەردى پوليسيا كۇشپەن ۇستاپ اكەتتى

Dalanews 29 ءساۋ. 2016 00:55 113









الماتىدا جەرگە قاتىستى ميتينگ وتكىزۋگە رۇقسات سۇرايتىندارى جونىندە باسپا ءسوز جيىنىن وتكىزبەك بولعان بەلسەندىلەردى پوليسيا كۇشپەن ۇستاپ اكەتتى.





الماتىدا بۇگىن ۇلتتىق باسپا ءسوز كلۋبى الدىندا جەر ماسەلەسىنە قاتىستى ميتينگ وتكىزۋگە رۇقسات سۇرايتىندارى تۋرالى باسپا ءسوز جيىنىن وتكىزبەك بولعان 10-عا تارتا بەلسەندىنى پوليسيا ۇستاپ اكەتتى.

جيىن ساعات 11-دە ءوتۋى ءتيىس بولعان. ءبىراق جيىن باستالاتىن ۋاقىت تاياعاندا پوليسيا كەلىپ، ونى ۇيىمداستىرۋشىلاردىڭ ءبىرى مارجان اسپاندياروۆادان تۇسىنىكتەمە جازۋدى تالاپ ەتتى. بەلسەندى ونى جازۋدان باس تارتتى.

ۇيىمداستىرۋشىلار "باسپا ءسوز جيىنىندا "جەرىمىزدى قورعايمىز - انا ءتىلىمىزدى ساقتايمىز!" دەگەن اتپەن الماتىدا جالپىحالىقتىق ميتينگ وتكىزۋگە رۇقسات سۇراۋ تۋرالى قالا اكىمدىگىنە ءوتىنىش بەرۋ ماسەلەسىن تالقىلايتىندارىن" حابارلاعان ەدى.

بىرەر مينۋتتان سوڭ كلۋب الدىنا پوليسيا جاساعى كەلىپ، ساياساتكەرلەر مارجان اسپاندياروۆا، ءامىرجان قوسانوۆ، بەلسەندىلەر جانبولات ماماي، ينگا يمانباي، عالىم اعەلەۋوۆ، جۋرناليست ەرمۇرات ءباپي مەن قارسىلىق تانىتقان تاعى ەكى-ۇش ادامدى كۇشپەن كولىكتەرگە مىنگىزىپ الىپ كەتتى.

پوليسيا جاساعى قوعامدىق بەلسەندى جارىلقاپ قالىبايدى دا كولىككە كۇشتەپ وتىرعىزعانىمەن، بىرەر مينۋتتان سوڭ بوساتىپ جىبەردى. ۇستالعانداردىڭ مەدەۋ اۋداندىق ىشكى ىستەر باسقارماسىنا اكەتىلگەنى حابارلاندى.

بۇگىنگى باسپا ءسوز جيىنىنا دەيىن جۋرناليست رىسبەك سارسەنباي مەن قوعامدىق بەلسەندى مۇحتار تايجاندى دا پوليسيا ۇستاپ اكەتكەنى (المالى اۋدانى ءىىب-سى دەگەن اقپارات بار) حابارلانعان بولاتىن.

استانادا دا بۇگىن تاڭەرتەڭ "الاش جولى" قوزعالىسىنىڭ جەر ماسەلەسى بويىنشا ۇندەۋىن جاريالايمىن دەگەن بەلسەندى ماقسات ءىلياسۇلىن پوليسيا ۇستاپ الىپ كەتكەنى حابارلاندى. ول ۇستاپ اكەتىپ بارا جاتقاندا، 11:00-گە دەيىن قايتىپ ورالىپ، مالىمدەمەسىن جاريالايتىنىن ايتقان.

قازاقستانداعى جەرگە قاتىستى داۋ ناۋرىزدىڭ سوڭىندا ۇلتتىق ەكونوميكا ءمينيسترى ەربولات دوسايەۆتىڭ شىلدەنىڭ 1-ىنەن باستاپ اۋىل شارۋاشىلىعى جەرلەرىنىڭ اۋكسيون ارقىلى ساتىلاتىنى تۋرالى مالىمدەمەسىنەن سوڭ باستالعان. ءساۋىردىڭ 24ء-ى كۇنى اتىراۋ قالاسىندا مىڭداعان ادام قاتىسقان رۇقسات ەتىلمەگەن ميتينگ ءوتىپ، جينالعاندار جەر كودەكسىندەگى وزگەرىستەرگە نارازىلىق بىلدىرگەن. ءساۋىردىڭ 27ء-سى اقتوبە مەن سەمەي قالالارىندا دانارازىلىق جيىندارى وتكەن.

ءساۋىردىڭ 28ء-ى كۇنى اقتاۋداعى ىنتىماق الاڭىندا ونداعان ادام جينالىپ، جەردى ساتۋعا جانە شەتەلدىكتەرگە جالعا بەرۋگە قارسى پىكىرلەرىن بىلدىرگەن. جارتى ساعاتتاي عانا ۋاقىتقا سوزىلعان رۇقسات ەتىلمەگەن بۇل جيىندى پوليسيا تاراتىپ جىبەردى.

دەرەككوز: "ازاتتىق" راديوسى 










ۇسىنىلعان
سوڭعى جاڭالىقتار
x