قاراعاندىدا جەدەل جاردەم جۇرگىزۋشىسىن سوققىعا جىققان نۇربولات داكەبايەۆ ەكى اي قاماۋعا الىندى، دەپ حابارلايدى Dalanews.kz.
تەرگەۋ سوتى پروكۋروردىڭ كۇدىكتىنى سىرتتاي قاماۋعا الۋ تۋرالى سانكسياسىن قاڭتار ايىنىڭ سوڭىندا قاناعاتتاندىرعانى بەلگىلى بولدى.
"28 قاڭتاردا سوت سىرتتاي نۇربولات داكەبايەۆتى ەكى ايعا قاماۋ تۋرالى بۇلتارتپاۋ شاراسىن تاعايىندادى. ول ۇكىمگە قارسى شاعىم تۇسىرگەن جوق"، - دەپ حابارلادى سوت.
ەسكە سالايىق، بۇعان دەيىن قاراعاندىدا جەدەل جاردەم قىزمەتكەرىن بالاعاتتاپ، سوققىعا جىققان ەر ادامعا قاتىستى قىلمىستىق ءىس قوزعالعانى حابارلانعان بولاتىن. ۆيدەو تەلەگرام ارنالاردىڭ بىرىندە تاراعان. روليكتە ەر ادام جەدەل جاردەم جۇرگىزۋشىسىن بالاعاتتاپ، ارتىنشا سوققىعا جىققانىن كورۋگە بولادى.
ارتىنشا سوققىعا جىعىلعان جەدەل جاردەم جۇرگىزۋشىسى وقيعانىڭ قالاي بولعانىن ايتىپ بەردى.
زارداپ شەككەن تورەعالي بەرىكقالي ۇلى ماقاجانوۆ اتىنداعى وبلىستىق اۋرۋحانانىڭ نيەۆرولوگيا بولىمىندە جاتىر. قاراعاندى وبلىسىنىڭ دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ حابارلاۋىنشا، جابىرلەنۋشىنىڭ جاعدايى ءالى دە ورتاشا اۋىر.
1 اقپاندا كۇدىكتى ۇستالدى. كەيىنىرەك ونىڭ ۇستالعان ءساتى تۇسىرىلگەن ۆيدەو تارادى.
ارتىنشا جەدەل جاردەم جۇرگىزۋشىسى تورەعالي بەرىكقالي ۇلى ۇندەۋ جاسادى. ول ءوزىن "حايپ" ۇستاپ كەتتى دەگەندەرگە جاۋاپ بەردى جانە ءوزىن ۇرعان ەر ادامدى سوتقا بەرۋ نيەتى جوق ەكەنىن، كەشىرۋگە دە دايىن ەكەنىن ايتتى.
