قازاق قىزدارى اراسىنان شىققان تۇڭعىش وليمپيادا ويىندارىنىڭ جۇلدەگەرى جازيرا جاپپارقۇلمەن سۇحباتتاسۋدىڭ ءساتى ءتۇستى. .

 

– جازيرا، ەڭ اۋەلى جەڭىسىڭمەن قۇتتىقتايمىز. مۇنداي اتاققا قول جەتكىزگەنىڭە بۇكىل قازاق ەلى قۋانىشتى. جالپى، كوڭىل كۇيىڭ قالاي؟

– كوڭىل كۇيىم وتە جاقسى، ءبارى ويداعىداي. ءوزىمنىڭ دىتتەگەن ماقساتىما جەتتىم. ەندىگى ارمانىم، الداعى ۋاقىتتا توكيو وليمپياداسىندا جەڭىسكە جەتۋ. بۇل وليمپيادا مەن ءۇشىن ەرەكشە ءوتتى. قولداۋ كورسەتكەن بارشا وتانداستارىما العىسىم شەكسىز. ەرەكشە سەزىمگە بولەندىم. جەڭىستەر ەشقاشان ۇزىلمەسە ەكەن دەيمىن. الەۋمەتتىك جەلىدەگى جەكە پاراقشامدى اشقاندا، مەنى قۇتتىقتاعان  وتانداستارىمنىڭ جازبالارىن كورىپ قۋانىپ قالدىم.

– باسەكەگە كەلەيىك. وسى وليمپياداعى  العاشقى كەزەڭ سەن ءۇشىن قانشالىقتى قيىن بولدى؟

– دايىندىق، زىلتەمىردى كوتەرۋدەگى ارەكەتىم ويداعىداي بولدى دەۋگە بولادى.

– سالماققا تاپسىرىس بەرۋ بارىسىندا 111  كەلىگە وزگەرتتىڭىزدەر، مۇنى باپكەرىڭىز شەشتى مە؟

– باپكەرىم الەكسەي ني، ەكەۋمىز ءوزارا كەلىسىپ شەشتىك. مەنەن «قاي سالماققا دايىنسىڭ»، – دەپ سۇرادى. ال مەن تاڭداۋدى سول كىسىنىڭ ەنشىسىنە بەردىم. جالپى، 111 كەلى سالماقتى كۇندەلىكتى جاتتىعۋدا كوتەرىپ ءجۇرمىن. مەن ەشقاشان ۇسىنىلعان سالماقتان باس تارتقان ەمەسپىن. ەڭ باستىسى، وزىمە سەندىم.  ەكىنشى مۇمكىندىكتە 115 كەلىگە بەردىك. ازداپ قيمىل-قوزعالىستا اۋىتقىعانىم بولماسا، ءبارى ويداعىداي.  ودان كەيىن 117 كەلى سالماقتى ەڭسەردىم.

– ءبىز سەنى 120 كەلىنى تاڭدايدى ما دەپ كۇتكەن ەدىك؟ زىلتەمىر باعىنباعان بولدى عوي؟

– مەنەن «قانشا سالماققا دەيىن كوتەرە الاسىڭ؟» دەپ سۇراعاندا 118 دەپ ايتتىم.  ءسال جىلدامدىق جەتپەي قالدى. ءبىر جەردە قاتەلىك كەتكەن بولاتىن. ەندى سول قاتەلىكتىڭ قايتالانباۋىن قاداعالايمىز.

– ودان كەيىن زىلتەمىردى كوتەرىپ تۇرىپ، جەرگە ءتۇسىرىپ الدىڭ؟

– ءسال جىلدامدىعىم جەتىسپەي قالدى. قىسقاسى، باياۋلاۋ قيمىلداپ قالدىم. ال ودان كەيىن وزدەرىڭىز كۋاسىزدەر، 140 كەلىنى قاتتى جىلدامدىقپەن كوتەردىم.

– ەكىنشى رەت شىققانىڭدا وزىڭە سەنىمدى بولعاندايسىڭ…

– ەكىنشى رەت شىققانىمدا ەش قورقىنىش بولمادى. قانشاما جاساعان دايىندىقتارىمدى ەسىمە ءتۇسىرىپ، ءوزىمدى جيىپ الدىم. بار كۇشىمدى جينادىم. ەڭ باستىسى، مەنىڭ وزىمە سەنگەنىم، جەڭىسكە جەتەلەدى دەپ ويلايمىن.

– 140 كەلى سالماقتى كوتەرۋ بارلىعىن شەشتى. وسى مەزەتتە، كوتەرە الماي قالسام، نە ىستەيمىن دەگەن وي كەلدى مە؟

– ول  جەردە مەن بار كۇشىمدى سالىپ كوتەرە ءبىلدىم.

–  نەگىزى، باستاپقى ماقساتىڭ التىن الۋ ما ەدى؟

– ءيا.

– دايىندىق كەزىندە قانشانى كوتەرىپ ءجۇرسىڭ؟

– 120، 153 كوتەرىپ ءجۇرمىن.

–  جاتتىعۋلاردا كوتەرگەن سالماقتى جارىستا كوتەرۋ قيىن بولادى ما ەكەن؟

–  جوق، كوتەرۋگە بولادى. ءبىراق ءبىز جارىس بولاتىن ۋاقىتتىڭ 10،15 كۇن بۇرىن اۋىر سالماق كوتەرۋدى توقتاتامىز. جارىسقا بار كۇشىمدى سالامىز. قارسىلاستارىڭنىڭ دا  قانداي سالماقتى تاڭداعانىنا ءمان بەرەسىڭ. ۇزاق جول جۇرگەننەن دە،  سالماقتا ازداپ وزگەرىستەر بولادى. وزىمدەگى كىشكەنە جاراقاتىم بولعاندىقتان، ءسال تومەندەۋ بولىپ قالدى. مەنىڭ، نەگىزىنەن بەلىم اۋىرادى. وعان قاراماي دايىندىقتى توقتاتقان ەمەسپىن.

–  بۇل جولعى جەڭىسىڭنىڭ جۇلدەسىن قايدا جۇمسايسىڭ؟ .

–  ەندى بۇل جولعى جوسپارىم ەرەكشە. ءسىڭىلىمدى  ەمدەتۋگە جىبەرەم، ال قالعانىن اتا-انام شەشەدى.

–  تۇرمىسقا شىعۋ ويىڭدا بار ما؟

– مەنىڭ بۇل  وليمپيادادان التىن الام دەگەن جوسپارىم بولعان ەدى. ءبىراق ول بۇيىرماعاندىقتان، ءقازىر تۇرمىسقا شىقپايمىن (كۇلدى). التىن مەدال العاسىن تۇرمىس قۇرامىن! كەلەسى جىلدان باستاپ، سالماق وزگەرەدى. ونىڭ قانداي بولىپ وزگەرەتىندىگىن،  الداعى ۋاقىتتا بەلگىلى بولادى. باپكەرلەرمەن اقىلداسامىز.

– جارىستاعى مەجەڭدى ورىندادىڭ. ەندى دەمالىسقا شىعاسىڭ با؟

– ءيا. مەن بۇل ۋاقىتتا ەمدەلەمىن دەپ وتىرمىن.

 

سۇحباتتاسقان ءاليحان نۇراحمەت ۇلى

 

دەرەككوزى: "جاس قازاق" گازەتى