تۇركىستان وبلىسىندا وتكەن «شەكسىز باۋىرلاستىق» وقۋ-جاتتىعۋىندا التى ەلدىڭ ارنايى كۇشتەرى وقۋ-جاتتىعۋى ءوتتى. اسكەري شاراعا ازەربايجان، قاتار، پاكىستان، تۇركيا، وزبەكستان قارۋلى كۇشتەرى مەن قازاقستان كۇشتىك قۇرىلىمدارى قولباسشىلىعىنىڭ وكىلدەرى باقىلادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسىندا وتكەن وقۋ-جاتتىعۋعا يوردانيا مەن قىرعىزستان قارۋلى كۇشتەرىنىڭ وكىلدەرى باقىلاۋشى رەتىندە شاقىرىلدى.
«وردا» وقۋ پوليگونىندا شەتەلدىك ارىپتەستەردىڭ نازارىنا قارۋ-جاراق پەن اسكەري تەحنيكا كورمەسى، سونداي-اق كيىم ۇلگىلەرى كورسەتىلدى. اعىمداعى جەدەل-تاكتيكالىق جاعدايمەن تانىسقاننان كەيىن پراكتيكالىق ءىس-قيمىلدار ءوتتى.
التى ەل اسكەري كونتينگەنتتەرىنەن قۇرالعان بىرىككەن توپتىڭ الدىنا شەكارانى بۇزىپ ءوتىپ، ەلدى مەكەنگە تىعىلعان زاڭسىز قارۋلى قۇرالىمدى تاۋىپ، كوزىن جويۋ مىندەتى قويىلدى. سودىرلاردىڭ ۇشقىشسىز ۇشاقتاردىڭ كومەگىمەن بىرىككەن اسكەرلەر توبىنا سوققى بەرمەك بولعان ارەكەتىنە راديوەلەكتروندى سوعىس قۇرالدارىمەن تويتارىس بەرىلدى.
بىرىكككەن توپتىڭ تاكتيكالىق اۋە دەسانتى ءتۇسىرىلدى. ارنايى ماقساتتاعى بولىمشەلەردىڭ شابۋىلىنا كاميكادزە دروندارى مەن اسكەري اۆياسيا شابۋىلدارى، كۆادروسيكلمەن قوزعالاتىن ۇتقىر توپتار قولداۋ كورسەتتى. اكىمشىلىك عيماراتقا جاسالعان شابۋىلدان كەيىن درونداردىڭ كومەگىمەن تۋننەلدەن وتپەك بولعان جاۋ كۇشى تولىق جويىلدى.
قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ وقۋ-جاتتىعۋعا قاتىسۋشىلاردى ارنايى وپەراسيانىڭ ءساتتى اياقتالۋىمەن قۇتتىقتادى.
– تەرروريستىك قاۋىپتەردىڭ ءوسۋىن ەسكەرە وتىرىپ، ءبىز اسكەري قاۋىپسىزدىك سالاسىنداعى كۇش-جىگەردى بىرىكتىرە بەرەمىز. وقۋ-جاتتىعۋدا داعدارىستىق جاعدايدا باسقارۋ ورگاندارى مەن باعىنىستى بولىمشەلەردىڭ ءىس-قيمىل الگوريتمدەرى پىسىقتالدى. بىرلەسكەن وپەراسيانى جۇرگىزۋ اسكەري كونتينگەنتتەردىڭ ۇيلەسىمدى ءارى ءتيىمدى ارەكەت ەتۋگە دايىندىعىن كورسەتتى، – دەپ اتاپ ءوتتى ول.
وقۋ-جاتتىعۋ جيىنىن تۇركىستان وبلىسى اكىمىنىڭ ءبىرىنشى ورىنباساردى زۇلپىحار جولداسوۆ تا تاماشالاپ، اسكەريلەرگە قولداۋ كورسەتتى.
ارنايى ماقساتتاعى بىرىككەن بولىمشەلەر كەز كەلگەن سىن-تەگەۋرىندەر مەن قاۋىپ-قاتەرلەرگە ءتيىمدى توتەپ بەرۋگە دايىن ەكەندىكتەرىن دالەلدەپ، جاۋىنگەرلىك ۇيلەسىمدىلىكتىڭ جوعارى دەڭگەيىن كورسەتە ءبىلدى.
وقۋ-جاتتىعۋ قورىتىندىسى بويىنشا ۇزدىك جاۋىنگەرلەردى ماراپاتتاۋ ءراسىمى ءوتتى. اسكەري جاتتىعۋعا بارلىعى ءتورت جۇزدەن استام اسكەري قىزمەتشى قاتىستى.
