مۇنداي پىكىردى ازياداعى سەنىم شارالى جانە ءوز ارىپتەستىك كەڭەسىنىڭ اتقارۋشى ديرەكتورى قايرات سارىباي ۇلى ءبىلدىردى. شاراعا Dalanews.kz ءتىلشىسى دە قاتىسقان بولاتىن.
ونىڭ اتاپ وتكەنىندەي ۇكىمەت جۇمىسىندا جاستار ساياساتىندا ماڭىزدى ورىن بەرىلۋى ءتيىس. سمايلوۆ ۇكىمەتىنىڭ ەكونوميكالىق ءھام الەۋمەتتىك ساياساتىندا جاستار ماسەلەسىنە باسىمدىق بەرىلۋى قاجەت. جاستار ماسەلەسىن تالقىلاۋدى جاستاردىڭ وزىنە تابىستاعان دۇرىس. بۇل ىسكە اعا بۋىن ارالاسسا، ەسكى كوزقاراستىڭ شەڭبەرىنەن شىعا المايمىز.
ءسوي دەگەن سارىباي ۇلى مىرزا:
«قاڭتار وقيعاسىنان كەيىن جاستار ساياساتىنا قاتىستى كوزقاراس تا كۇرت وزگەردى.
ەڭ الدىمەن ەلىمىزدەگى ىرگەلى ساياسي ۇيىمنىڭ جاستار قاناتى تولىق تۇرلەنىپ، قايتادان قۇرىلدى. جاڭا قازاقستان جاستار ماسەلەسىنە كەلگەندە ەسكى تۇسىنىكتەن ارىلۋى قاجەت. جاستاردى ۇرانشىل، دابىراشىل اكسيالاردان اۋلاق ۇستاۋىمىز كەرەك.
جاستارمەن جۇمىس ىستەۋدە جاڭا تاسىلدەرگە مۇحتاجبىز. بالكىم بۇل تۇرعىدا شەتەلدىڭ تاجىريبەسىنە سۇيەنگەنىمىز دۇرىس شىعار»، – دەيدى ول.
ونىڭ پىكىرىنشە شەتەل تاجىريبەسىن ءسوز ەتكەندە، ونى تولىق كوشىرىپ الۋ قاتەلىككە ۇرىندىرادى.
«ۇكىمەت جاستار ساياساتىندا تابىسقا جەتكەن مەملەكەتتەردىڭ تاجىريبەسىن ەلەكتەن وتكىزۋى كەرەك. الىسقا بارماي-اق ازيا ەلدەرىمەن پىكىر الماسۋعا بولادى. ماسەلەن، سينگاپۋر، كورەيا سەكىلدى ەلدەردە جاستار ساياساتى ەل ۇكىمەتىنىڭ كۇن تارتىبىنە ەنگەن ماسەلەنىڭ ءبىرى. بۇل ەلدەردىڭ باسشىلىعى جاستار ماسەلەسىن ولاردىڭ وزىنە تابىستاعان، ياعني، ولارمەن ۇدايى بايلانىس ورناتىپ، وي – پىكىر الماسىپ وتىرادى. جاستارعا قاتىستى مەملەكەتتىك باعدارلاما قابىلداردا، الدىمەن جاس اۋديتوريانىڭ تالاپ-تىلەگىن تىڭداپ الادى»، – دەيدى ساراپشى.
