«جاستار رۋحىنىڭ» ۆولونتەرلەرى زارداپ شەككەن ەكىباستۇزدىقتارعا كومەكتەسۋدە

Dalanews 29 قار. 2022 12:57 260

«AMANAT» پارتياسىنىڭ «جاستار رۋحى» جاستار قاناتىنىڭ ۆولونتەرلەرى ەكىباستۇز قالاسىنىڭ جىلۋسىز قالعان تۇرعىندارىنا گۋمانيتارلىق كومەكتى تاراتۋ جۇمىسىنا جۇمىلدىرىلدى، – دەپ حابارلايدى Dalanews.kz..

ەكىباستۇزدا جاستار قاناتىنىڭ ۆولونتەرلەر شتابى تۇرعىندارعا كومەك كورسەتۋدى جالعاستىرىپ جاتىر. «جاستار رۋحىنىڭ» بەلسەندىلەرى ءۇي-ۇيدى ارالاپ، جالعىز تۇرىپ جاتقان زەينەتكەرلەر، مۇگەدەكتەر، مۇقتاج وتباسىلار تۋرالى اقپارات جيناۋدا.

جاستار قاناتىنىڭ ۆولونتەرلەرى اپاتتان قۇتقارۋشى بريگادالارعا ىستىق تاماق ۇيىمداستىرۋ جۇمىسىمەن دە اينالىسىپ ءجۇر.

«جاستار رۋحى» جاستار قاناتىنىڭ ءتوراعاسى نۇرجان جەتپىسبايەۆ ەكىباستۇزعا بارلىعى 120-دان استام ەرىكتى كەلگەنىن اتاپ ءوتتى. ونىڭ ىشىندە 30 ادام استانادان كەلدى.

– ەرىكتىلەرىمىز مۇقتاج جاندارعا كورپە، تەرموس جانە باسقا دا قاجەتتى زاتتاردى تاراتىپ جاتىر. بۇگىن تۇندە 1000 جاڭا ەلەكتر جىلىتقىش تيەلگەن جۇك تۇسىردىك. بۇل زاتتار اسىرەسە كوپبالالى جانە از قامتىلعان وتباسىلارعا، ەرەكشە قاجەتتىلىگى بار ادامدارعا، زەينەتكەرلەرگە قاجەت. ەكىباستۇز قالاسىنىڭ بارشا تۇرعىنىنا جاعداي قالىپقا كەلگەنگە دەيىن كومەك كورسەتەمىز. مۇنداي جاعدايدا سىرتتان باقىلاپ وتىرۋ مۇمكىن ەمەس. ءدال وسىنداي ساتتە ىنتىماق پەن بىرلىگىمىزدى تانىتۋىمىز كەرەك، – دەدى ول.


«جاستار رۋحىنىڭ» مۇشەسى كاميل بايراموۆتىڭ بىلاي دەيدى: «قايعى-قاسىرەتتى وزىمدىكى نەمەسە وزگەنىكى دەپ ەشكىم ءبولىپ-جارمايدى. وسىناۋ قيىن-قىستاۋ ساتتە «جاستار رۋحىنىڭ» بەلسەندىلەرى ەكىباستۇز قالاسىنىڭ تۇرعىندارىنا قول ۇشىن سوزىپ جاتىر. ولار ءبىر كەزدەرى اۋليەكولدە، ماقتاارال مەن ارىستا زارداپ شەككەن حالىققا دا ءبال وسىلاي كومەك كورسەتكەن ەدى».

«جاستار رۋحىنىڭ» بەلسەندىسى ارسلانبەك ماعزۇم تۇرعىندار مۇنداي جاعدايدا كومەككە جۇگىنۋى ءتيىس دەپ سانايدى.

– ۆولونتەرلەر شتابىندا جىلى كيىم-كەشەكتى، سۋدى، باسقا دا قاجەتتى تاۋارلاردى قاي مەكەنجايعا اپارۋ كەرەكتىگى تۋرالى وتىنىمدەر سارالانادى. بىزگە جىلۋسىز قالعان ءاربىر تۇرعىنعا، ءاربىر وتباسىعا كومەك كورسەتىلگەنى ماڭىزدى، – دەدى ول.

«AMANAT» پارتياسىنىڭ باسپا ءسوز قىزمەتى

فوتو اۆتورى: مەيىربەك ءتاجقۇرانوۆ

ۇسىنىلعان
سوڭعى جاڭالىقتار