سەناتور ساكەن ارۋبايەۆ سەنات وتىرىسىندا ۇلىتتىق قۇندىلىقتار ماسەلەسىن كوتەردى، - دەپ حابارلايدى Dalanews.kz.
سەنات دەپۋتاتىنىڭ پىكىرىنشە، ءقازىر قازاقستاندىقتار تاۋەلسىز قازاقستاننىڭ قالىپتاسۋى مەن ودان ءارى دامۋىنا ەلەۋلى ۇلەس قوسقان باتىرلار مەن تۇلعالاردىڭ ءومىر تاريحىنان بەيحابار بولىپ شىققان.
"اتا-بابادان قالعان، مۇرا مەن ميراس بولعان ۇلتتىق قۇندىلىقتارىمىز قاشان دا بىلىممەن، نامىسپەن، تانىممەن، تاربيەمەن ۇرپاققا دارىعان. وكىنىشكە قاراي، قوعامدىق ساناعا تىرەك بولار وسىنداي قاستەرلى قاسيەتتەر باتىستىڭ با، جوق الدە باسقانىڭ با جەتەگىنە ەرىپ، ۇلتتىق بولمىستى السىرەتۋ اشىق كورىنىسكە يە بولىپ بارا جاتقانداي.
كەرەك دەسەڭىز قازاقتىڭ قارا دومبىراسىن حارام دەگەن عايبات ءسوزدى دە ەستىدىك. وكىنىشتىسى، بۇگىنگى ۇرپاق ۇلتتىق تاريحىمىزدىڭ دىڭگەگىنە اينالعان، باتىرلار مەن ارىستارىنىڭ ەسىمدەرىن ماقتانىشپەن ايتۋدان، ءومىر جولدارىن بىلۋدەن تىس قالعانداي. جاستار "اباي كىم؟"، "قابانباي كىم؟"، "اقان كىم؟"، "قانىش كىم؟" دەگەن ساۋالدارعا "اكىم، مينيستر، اتاقتى سپورتشى" دەگەن وزەك ورتەر جاۋاپتار بەردى"، - دەدى سەناتور.
