شىعىستا عانا ەمەس ەلىمىزدەگى ساداق اتۋ ونەرىن جاڭعىرتىپ، دامىتىپ جۇرگەن، جاس بولسا دا، الەمدى وزىنە قاراتقان مەرگەن ارۋ اجار تولەۋقانوۆا رەفەرەندۋمعا قاتىسىپ، ءوز تاڭداۋىن جاسادى.
كۇنى كەشە عانا مەملەكەت باسشىسىنىڭ جارلىعىمەن "ەرەن ەڭبەگى ءۇشىن" ءتوس بەلگىسىمەن ماراپاتتالعان، V دۇنيەجۇزىلىك كوشپەندىلەر ويىنىنىڭ كۇمىس جۇلدەگەرى، قازاقستان رەسپۋبليكاسىنىڭ ساداق اتۋ فەدەراسياسىنىڭ قالقان مەن پۋتا نىسانالارى بويىنشا ءۇشىنشى ورىن يەگەرى، ق ر قالقان نىساناسى بويىنشا چەمپيوناتىنىڭ ءۇشىنشى ورىن يەگەرى، شقو ساداق اتۋ فەدەراسياسىنىڭ پرەزيدەنتى، ساداق اتۋدان سپورت شەبەرىنە ۇمىتكەر، وبلىستىق جارىستاردىڭ جەڭىمپازى، شىعىستاعى جاس بۋىندى ساداق اتۋعا ۇيرەتىپ جۇرگەن جاتتىقتىرۋشى، ۇلتتىق سپورتتىڭ جاناشىرى، گلۋبوكوە اۋدانىنىڭ تۇرعىنى، يبالى كەلىن، جاس انا، اياۋلى جار اجار تولەۋقانوۆا ەل بولاشاعى ءۇشىن ماڭىزدى قادامى بولىپ تابىلاتىن اەس قۇرىلىسىنا قاتىستى ۇيىمداستىرىلعان رەفەرەندۋمعا قاتىستى.
"اتوم ەلەكتر ستانسياسىن سالۋ ماسەلەسى بويىنشا داۋىس بەرۋگە قاتىسۋ — ءبىزدىڭ ازاماتتىق بورىشىمىز! رەفەرەندۋمعا قاتىسۋ ارقىلى ءبىز ءوزىمىزدىڭ عانا ەمەس، بۇل ۇرپاعىمىزدىڭ بولاشاعىنا تىكەلەي اسەر ەتەتىن اۋقىمدى جوبا. مۇنداي شەشىمدى قابىلداعاندا ەموسيالارعا بەرىلىپ نەمەسە ويلانباستان كەلىپ، داۋىس بەرۋگە بولمايدى. ءبىز ءبارىمىز وسى قادامنىڭ وڭ-تەرىسىن سارالاپ، بارلىق اسپەكتىلەرىن زەرتتەپ، سانالى تۇردە شەشىم قابىلداۋىمىز كەرەك. سوندىقتان ەلىمىزدىڭ ءار ازاماتى رەفەرندۋمعا قاتىسىپ، ماڭىزدى قادام جاساۋعا ءوز ۇلەسىن قوسۋى كەرەك"، - دەيدى شقو ساداق اتۋ فەدەراسياسىنىڭ پرەزيدەنتى اجار تولەۋقانوۆا.
اجار راحمەت قىزى بۇكىلحالىقتىق رەفەرەندۋمعا جانۇياسىمەن بىرگە قاتىسىپ، ءوز تاڭداۋىن جاسادى جانە ءار قازاقستاندىقتى وسىنداي جاۋاپتى، ماڭىزدى شارادان شەت قالماۋعا شاقىرادى.
