الماتىداعى رەسپۋبليكا سارايىندا «جاس قانات – 2023» جاس ورىنداۋشىلار بايقاۋى اياقتالدى.

فينالدا سايىسكەرلەر بەلگىلى كومپوزيتور، ديريجەر جانە وڭدەۋشى يليا باشقاتوۆتىڭ جەتەكشىلىگىمەن تاماشا كاسىبي Live بەندىنىڭ سۇيەمەلدەۋىمەن ونەر كورسەتتى. بۇل «جاس قانات» بايقاۋىنىڭ جاڭالىعى.

ءبىر سۇحباتىندا يليا ادامداردىڭ جاقسى تالعامىن قالىپتاستىراتىن جوباعا قاتىسۋعا قۋانىشتى ەكەنىن ايتقان ەدى. «بايقاۋ جۇرتشىلىق اراسىندا جاقسى تالعام قالىپتاستىرا ما؟» دەپ سۇرادىق.

«ەش كۇمانسىز! بۇل جاقسى تالعام سىڭىرەتىن جوبا. رەپەرتۋار بويىنشا كونكۋرستىق كونسەرتتەرگە ەنگەن اندەردىڭ باسىم بولىگى قاتىسۋشىلاردىڭ ءوز تاڭداۋى ەكەنىن ەرەكشە اتاپ وتكىم كەلەدى. بىزدە ورىنداۋشىلاردىڭ جاڭا بۋىنى بار، ولار مۇلدەم باسقا. ولارمەن جۇمىس ىستەۋ ماعان ۇلكەن قۋانىش سىيلايدى. ولار كەز كەلگەن قاجەتسىز ستيليستيكالىق شەڭبەردەن، كەيبىر كليشەلەردەن، فورماتتاردان ارىلعان ەركىن ادامدار. بىردە-بىر ءالسىز ورىنداۋشى وتكەن جوق. 20 ورىنداۋشىنىڭ ءبارى دە وتە مىقتى انشىلەر. ماعان وسى جوباعا قاتىسۋعا ۇسىنىس تۇسكەندە، ول مەنى قىزىقتىردى. «ازيا داۋىسى» دا ادەمى جاڭعىرادى دەپ ۇمىتتەنەمىن».

يليا باشكاتوۆتىڭ توبىمەن سايىسقا قاتىسۋشىلاردىڭ بارلىعى تاماشا ونەر كورسەتتى! ەسكە سالايىق، ەكى جارىس كۇنىندەگى داۋىس بەرۋ قورىتىندىسى بويىنشا ەڭ جوعارى ۇپاي جيناعان 8 قاتىسۋشى فينالعا شىقتى. ايتا كەتۋ كەرەك، بۇل كونكۋرسانتتار ءبىرىنشى جارىس كۇنىنەن اق وزدەرىن تانىتقان ەدى. فينالدا قازىلار القاسىنىڭ اراسىندا كەلىسپەۋشىلىكتەر بولعان جوق – بارلىعى ءبىراۋىزدان كىمگە قانداي ورىن بەرۋ كەرەكتىگىنە كەلىستى.

سونىمەن، قازىلار القاسىنىڭ ءبىراۋىزدان شەشىمىمەن بايقاۋدا العاش رەت بەكىتىلگەن مۇرات ەرعالييەۆ پەن الەكساندر پونوماريەۆ اتىنداعى گران-پري اتىراۋلىق ەرنازار جۇبانعا بەرىلدى. «التىن قانات» (1-ورىن) اقتوبەلىك نارعىز جانۇزاقوۆاعا، «كۇمىس قانات» (2-ورىن) الماتىلىق بەنازير الىمحودجايەۆا، «قولا قانات» (3-ورىن) الماتىلىق الماگۇل باتتالييەۆاعا بۇيىردى.

قالعان ءتورت فيناليست بايقاۋدىڭ ديپلومانتى اتاندى. ولار – ورالدىق ارۋجان بيسەمباي، پەتروپاۆلدىق ناريمان جولداسبەكوۆ، پاۆلودارلىق ءمادينا قابدوللا جانە شىمكەنتتىك نۇراسىل ساتىبالدى.

قازىلار القاسىنىڭ كەيبىر مۇشەلەرى ءوز جۇلدەلەرىن بەلگىلەدى. مەدەۋ ارىنبايەۆ ءوز جۇلدەسىن ەكى قاتىسۋشىعا – پەتروپاۆلدىق ناريمان جولداسبەكوۆ پەن ورالدىق ارۋجان بيسەمبايعا قازاقتىڭ ءان داستۇرىنە بەي-جاي قاراماعانى ءۇشىن تابىس ەتتى. رەنات گايسين نۇراسىل ساتىبالدىنى ءوز قاناتىنا الدى. بايعالي سەركەبايەۆ ەرنازار جۇبانعا ءوزىنىڭ Emporio Music Fest مۋزىكالىق فەستيۆالىنىڭ ارنايى جۇلدەسىن تابىس ەتتى. جۇلدە - ەڭ تانىمال Montreux Jazz Festival دجاز فەستيۆالىنە ساياحات. ول 5-7 شىلدە ارالىعىندا وتەدى، وعان الەمنىڭ ەڭ تانىمال مۋزىكانتتارى كەلەدى.

فينالدان تىس قالعان «جاس قانات» بايقاۋىنىڭ 12 قاتىسۋشىسى ديپلوم-سەرتيفيكاتقا يە بولدى. ءبىراق ولار كونكۋرستان تىس كەرەمەت ءان شىرقادى. بالكىم، قازىلار القاسى باسقا ماراپاتتار تاعايىنداماعانىنا وكىنگەن دە شىعار.

بيىل اتى اڭىزعا اينالعان «ازيا داۋىسى» فەستيۆالى قايتا جاندانۋدا. وعان دايىندىق بارىسىندا ەلىمىزدەگى ەڭ بايىرعى وقۋ ورنى - تەمىربەك جۇرگەنيەۆ اتىنداعى قازاق ۇلتتىق ونەر اكادەمياسى مەن حالىقارالىق «ازيا داۋىسى» فەستيۆالىنىڭ باسىن قوسقان قىزىقتى شىعارماشىلىق جوبا ۇيىمداستىرىلدى. جوبا – اكادەميا ستۋدەنتتەرى اراسىنداعى سەنوگرافيالىق بايقاۋ. بايقاۋعا قاتىسۋشىلارعا ەسكى، بەلگىلى ستيل مەن كەلبەتتى ساقتاي وتىرىپ، فەستيۆالدىڭ جاڭا ءستيلىن ۇسىنۋ مىندەتى قويىلدى. ايتا كەتۋ كەرەك، قاتىسۋشىلار بۇل تاپسىرمانى تاماشا ورىنداپ، كوميسسيا مۇشەلەرى ءبىراۋىزدان ەكى جەڭىمپاز بولۋى كەرەك دەگەن قورىتىندىعا كەلدى. ولار - دانا نۇرشايەۆا مەن ءاليحان ساتىبالدى. ولار دا سىيلىقتارمەن ماراپاتتالىپ، «ازيا داۋىسى – 2023» سەنوگرافياسىن جاساۋ ءۇشىن شىعارماشىلىق توپقا شاقىرىلدى.

قورىتىندى ءسوزدى وسى بايقاۋدىڭ دەم بەرۋشىسى، «ازيا داۋىسى» ستۋدياسىنىڭ باسشىسىنان سۇرادىق. الماتىدا «ازيا داۋىسى» مەن «جاس قاناتتىڭ» قايتا ءتىرىلۋىن ارمانداعان مۇرات ەرعالييەۆ پەن الەكساندر پونوماريەۆتىڭ وڭ قولى بولعان تۇلعا – يرينا كوۆىرياكو.

"مەن ءبىر نارسەنى ايتا الامىن - مەن مۇنى ىستەدىم! ءبىراق بۇل مەن ءۇشىن وتە قيىن بولدى! بايقاۋ باسقاشا بولىپ شىقتى، بۇرىنعىلاردان ايىرماشىلىعى كوپ"، - دەيدى، يرينا.

"بىرىنشىدەن، جاندى مۋزىكا! بيىلعى جىلى 60 ادامدىق ناعىز ۇلكەن وركەستر قاتىستى. ەكىنشىدەن، Live بەند بولدى. سايىسكەرلەردىڭ كەرەمەت ونەر كورسەتكەنى سونشا، بارلىعى 2 شىلدەدە وتەتىن "ازيا داۋىسى پيكنيگىنە" شاقىرىلدى. ەندى ءبىز «جاس قانات – 2024» بايقاۋىنا دايىندالىپ جاتىرمىز. قۋاندىم، جىلادىم، ساعىنىش كوپ بولدى. سايىسكەرلەر ءان سالعاندا جىلادىم. تەمىرلان تولەگەنوۆ مارقۇمدار تۋرالى ءوزىنىڭ جۇرەكجاردى ولەڭدەرىن وقىعاندا دا جىلادىم. ساحنادا بولىپ جاتقان وقيعالاردىڭ ءبارى ماعان ۇلكەن ەموسيونالدى اسەر قالدىردى. ەڭ باستىسى، مەن الەكساندر سەرگەيەۆيچتەن (پونوماريەۆ - رەد.) سوگىس ەستىمەدىم. سەبەبى ول ماعان تۇسىمە ەنىپ، ومىردەگىدەي بۇيرىق بەرەتىن، ۇرساتىن. ءبىراق ءقازىر، جانى كوكتە جۇرگەن ول قاناعاتتانعان سياقتى".

الماتىلىقتاردى «جاس قانات» پەن «ازيا داۋىسى» بايقاۋلارىنىڭ قايتا ورالۋىمەن قۇتتىقتايمىز!