ەجەلگى زاماننان بەرى وتباسىنى وتان ءتارىزدى ۇلى قۇندىلىقتارمەن قاتار قويىپ، الەۋمەتتىك ۇيىسۋ مەن ۇرپاق جالعاستىرۋدىڭ ۇلاعاتتى ۇياسىنا بالاعان حالقىمىز ءۇشىن شاڭىراق قاي زاماندا دا كيەلى ۇعىم، قاستەرلى تۇسىنىك سانالعان. سوندىقتان، بۇگىن الەمدىك دەڭگەيدە وتباسىنىڭ الەۋمەتتىك فەنومەن رەتىندەگى ءمانىنىڭ كەراعار سيپات الا باستاۋى، قازاقستاندىق وتباسىنىڭ قۇندىلىقتىق باعدارىنىڭ وزگەرىستەرگە ۇشىراۋى قوعامدى الاڭداتاتىن قۇبىلىستاردىڭ ءبىرى بولىپ تابىلادى.

ەلباسى نۇرسۇلتان ءابىش ۇلى نازاربايەۆ «قازاقستان 2020: بولاشاققا جول» قازاقستان رەسپۋبليكاسى مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسىندا «قازاقستاندا وتباسى ءارقاشان الەۋمەتتىڭ اسا ماڭىزدى قۇراۋشى ەلەمەنتى رەتىندە قاراستىرىلىپ كەلەدى. ول قوعام بولمىسىنىڭ، مەملەكەتتىڭ نەگىزى، ادالدىق، ادامگەرشىلىك جانە رۋحاني ۇيلەسىم جۇيەسىندەگى ماڭىزدى بۋىن بولىپ تابىلادى» دەپ اتاپ كورسەتكەن بولاتىن. بۇعان كۋا رەتىندە ۇكىمەت باستاۋىمەن جۇزەگە اسىرىلىپ جاتقان وتباسى قۇندىلىعىن دارىپتەۋگە جانە ولارعا الەۋمەتتىك قولداۋ كورسەتۋگە باعىتتالعان بىرنەشە ءىس-شارالاردى ايتۋعا بولادى.

زاماناۋي وتباسى الەۋمەتتىك-ساياسي جاعدايلاردىڭ جانە وتباسى مۇشەلەرىنىڭ ءوزارا پسيحولوگيالىق قارىم-قاتىناستارىنىڭ كۇردەلەنۋى نەگىزىندە ءارقاشان وزگەرمەلى بولىپ كەلەدى. ەلىمىزدەگى ەرەكشە قولداۋ مەن الەۋمەتتىك كومەككە ءزارۋ وتباسىلاردىڭ  قاتارىنا ءبىرىنشى كەزەكتە جاس وتباسى شىعادى. جاس وتباسىلارعا مەملەكەت تاراپىنان كورسەتىلەتىن الەۋمەتتىك كومەك – بۇل مەملەكەتىمىزدىڭ الەۋمەتتىك ساياساتىنداعى ماڭىزدى اسپەكتىسى بولىپ تابىلادى.

جاس وتباسىلارعا قولداۋ كورسەتۋ ماقساتىندا قازاقستان رەسپۋبليكاسى زانناماسىمەن بەكىتىلگەن ورتالىق جانە جەرگىلىكتى مەملەكەتتىك ورگاندار سالالىق جانە ايماقتىق باعدارلامالاردى ازىرلەپ جۇزەگە اسىرۋدا. بۇگىنگى تاڭدا جاس وتباسىلاردى قولداۋ، سونىمەن قاتار جانۇيانى ساقتاپ قالۋ ءۇشىن مەملەكەت تاراپىنان كەلەسىدەي شارالار جۇرگىزىلۋدە:

- «وڭىرلەردى دامىتۋدىڭ 2020» باعدارلاماسىندا «جاس وتباسىلارعا ارنالعان ءتۇرعىن-ۇي» باعىتى؛

-         «جۇمىسپەن قامتۋ 2020 جول كارتاسى» جانە «بيزنەستىڭ جول كارتاسى 2020» باعدارلامالارىندا جاستاردى جۇمىسپەن قامتاماسىز ەتۋ جولدارى؛

-         ق ر «مەملەكەتتىك جاستار ساياساتى تۋرالى» زاڭىمەن جاس وتباسىلارعا جەڭىلدىكپەن نەسيە الۋ مۇمكىندىگى؛

-         بالا كۇتىمى بويىنشا وتباسىلى ستۋدەنتتەرگە اكادەميالىق دەمالىس بەرۋ؛

-         جاس وتباسىلارعا وتباسى ءومىرىنىڭ پروبلەمالارى، جۇكتىلىكتى جوسپارلاۋ، بالا كۇتۋ ماسەلەلەرى بويىنشا الەۋمەتتىك-پەداگوگيكالىق كەڭەس بەرۋ؛

-         بالا مەن اناعا مەملەكەتتىك كەپىلدەندىرىلگەن مەديسينالىق كومەك كورسەتۋ؛

-         جاس وتباسى ماسەلەلەرىمەن اينالىساتىن جانە الەۋمەتتىك قىزمەت كورسەتەتىن كەڭەس بەرۋ ورتالىقتارىنىڭ دامۋى؛

-         بالالار مەن وتباسىلاردىڭ بوس ۋاقىتىن ۇيىمداستىرۋ مەن سالاۋاتتى ءومىر سۇرۋگە باعىتتالعان ۇيىمداردىڭ جىلدان-جىلعا ۇلعايۋى؛

-         باسپاناعا مۇقتاج جانۇيالى ستۋدەنتتەرگە جاتاقحانادان وتباسىلىق ۇلگىدەگى بولمە ءبولۋ؛

-         مەكتەپكە دەيىنگى ۇيىمداردىڭ دامۋى؛

-         مەملەكەتتىك قۇندىلىقتاردى قۇرمەتتەۋ مەن نەگىزگى يدەيالاردى دارىپتەۋگە باعىتتالعان جاس وتباسىلار اراسىندا شارالالار مەن بايقاۋلار وتكىزۋ (ءار جىلدىڭ 8 قىركۇيەگى – وتباسى كۇنى، «مەرەيلى وتباسى» ۇلتتىق بايقاۋى).

وسىلايشا قازىرگى كەزەڭدە مەملەكەت ءۇشىن جاس وتباسىلارعا قولداۋ مەن كومەك كورسەتۋ جۇمىستارى الدىڭعى كەزەكتە تۇرعانى بايقالادى. سەبەبى وتباسى مىڭجىلىدىقتار مەن عاسىرلاردان بەرى ءاربىر قوعامنىڭ ۇرپاقتان-ۇرپاققا جالعاسقان مورالدىق سالتتىن، ۇلتتىق ءداستۇرىن ساقتاۋشىسى بولىپ تابىلادى. ال جاس وتباسى بولسا ءداستۇرلى قۇندىلىقتاردى دارىپتەيتىن، پاتريوتيزم سەزىمدەرىن نىعايتاتىن، وتاننىڭ وركەندەۋىنە دەگەن ماڭگىلىك قامقورلىقتى قامتاماسىز ەتەتىن باستى قاينار كوز.

 

فاريدا مۇساتايەۆا، گۋمانيتارلىق عىلىمداردىڭ ماگيسترى