Mitsui&Co كومپانياسى Mitsui Group ءىرى حولدينگىنىڭ بولىگى بولىپ تابىلادى. كومپانيا ءوز قىزمەتىن كوپتەگەن سالالاردا جۇرگىزەدى جانە جاڭا تەحنولوگيالاردى، ونىڭ ىشىندە كوممۋنالدىق ينفراقۇرىلىمعا ارنالعان تەحنولوگيالاردى ۇسىنادى. Mitsui قازاقستاندا قۇبىرلاردىڭ توتتانۋىن قايتارۋعا جانە جويۋعا ارنالعان NMR Pipetector تەحنولوگياسىن ۇسىنادى. بۇل جوبا قازاقستاننىڭ 14 وبلىسى مەن استانا جانە الماتى قالالارىنىڭ تكش سۋبەكتىلەرىندە تانىستىرىلعان-دى.
ق ر ينۆەستيسيالار جانە دامۋ ءمينيسترى جەڭىس قاسىمبەك ق ر ۇكىمەتىنىڭ وتىرىسىندا حابارلاعانىنداي، Mitsui تەحنولوگياسى بويىنشا كورروزياعا قارسى جابدىعىن قازاقستاندا تاجىريبەلىك تارتىپتە قوندىرۋ جوسپارلانىپ وتىر. بۇل سۋدىڭ ساپاسىن جاقسارتادى جانە قىزمەت ەتۋ مەرزىمىن 40 جىلعا دەيىن ۇزارتاتىنىمەن ەرەكشەلەنەدى. سونىمەن قاتار، جەلىلەردى رەكونسترۋكسيالاۋ مەن جاڭعىرتۋعا مەملەكەتتىك بيۋدجەتتەن كەتەتىن شىعىنداردى ازايتۋعا مۇمكىندىك بەرەدى. ءمينيستردىڭ ايتۋىنشا، قۇبىرلاردى اۋىستىرىپ 100 شاقىم جەلىلەردى رەكونسترۋكسيالاۋ 11،6 ملرد. تەڭگەدەن استام قارجىنى تالاپ ەتەدى. ال جاپوندىق تەحنولوگيانى پايدالانىپ، اتالعان قاشىقتىقتاعى جەلىلەردى كورروزياعا قارسى جابدىقتاردى ورناتۋ شامامەن 618،5 ملن. تەڭگەنى قۇراپ، 19 ەسە ارزانعا تۇسەدى ەكەن.
قازىرگى كەزدە، «تكش قازورتالىعى» اتالعان تەحنولوگيانى قازاقستان اۋماعىندا سىناقتان وتكىزۋگە ارنالعان پيلوتتىق جوبالاردى انىقتاۋ بويىنشا Mitsui كومپانياسىمەن بەلسەندى جۇمىس جاساپ جاتىر.
– قازاقستان – جاپونيا ۇكىمەتارالىق كوميسسياسى اياسىندا شىلدە ايىنىڭ سوڭىندا ءبىز ىنتىماقتاستىق تۋرالى كەلىسىمگە قول قويامىز جانە كەيبىر وڭىرلەردە پيلوتتىق جوبالاردى ىسكە اسىرۋدىڭ دايىندىق جۇمىستارىن باستايمىز. باستاما ءساتتى اياقتالعان جاعدايدا، ءوندىرىستى جەرگىلىكتەندىرۋ ماقساتىندا جابدىقتارعا قىزمەت كورسەتۋ جانە قازاقستان اۋماعىندا بىرلەسكەن كاسىپورىنداردى ۇيىمداستىرۋ بويىنشا بىرلەسكەن سەرۆيستىك ورتالىقتارىن قۇرۋ قاراستىرىلاتىن بولادى، – دەپ اتاپ ءوتتى «تكش قازورتالىعى» اق باسقارما ءتوراعاسى نۇرسۇلتان جيەنبايەۆ.
ايتا كەتۋىمىز كەرەك، جاپونيا سۋمەن جابدىقتاۋ سالاسىندا الەمدەگى جەتەكشى مەملەكەت. مىسالى، توكيوداعى سۋمەن جابدىقتاۋ جۇيەسى 13 ميلليونعا جۋىق ادامعا قىزمەت كورسەتەدى، سونىمەن قاتار، ەڭ ۇزدىك ورتالىقتاندىرىلعان سۋ قۇبىرلارى جۇيەسى بولىپ تابىلادى. ونىڭ جەر استى قۇبىرلارىنىڭ ۇزىندىعى جەر ەكۆاتورىنىڭ جارتىسىن قۇرايدى، ال وزەن مەن كولدەردەن شىعىپ سۋ قۇبىرىنىڭ كرانىنا دەيىن باراتىن سۋ شىعىنى بارلىعى 3،1% قۇرايدى.
ەستەرىڭىزگە سالا كەتەلىك، «تكش قازورتالىعى» اق قازاقستاننىڭ تۇرعىن ۇي-كوممۋنالدىق كەشەنى سەكتورىنا يننوۆاسيالاردى ەنگىزۋگە ارنالعان بارىنشا وڭتايلى نۇسقالاردى ىزدەستىرۋ بويىنشا جۇمىستاردى بەلسەندى اتقارادى. كومپانيا ماماندارى قازاقستانداعى تۇرعىن ۇي-كوممۋنالدىق شارۋاشىلىقتىڭ ينۆەستيسيالىق تارتىمدىلىعىن ارتتىرۋ، بيۋدجەتتىك ەمەس ينۆەستيسيالاردى تارتۋ جانە مەملەكەتتىك-جەكە مەنشىك ارىپتەستىكتى دامىتۋ ماقساتىندا شەتەلدىك جانە شەتەلدىك قارجى ۇيىمدارىمەن كەزدەسۋلەر وتكىزىپ، ەڭ وزىق جانە ءتيىمدى تەحنولوگيالاردى تالدايدى.
التىناي كارىبجانوۆا
