Japondyq tehnologiia kommýnaldyq sharýashylyqty jańǵyrtady
Mitsui&Co kompaniiasy Mitsui Group iri holdinginiń bóligi bolyp tabylady. Kompaniia óz qyzmetin kóptegen salalarda júrgizedi jáne jańa tehnologiialardy, onyń ishinde kommýnaldyq infraqurylymǵa arnalǵan tehnologiialardy usynady. Mitsui Qazaqstanda qubyrlardyń tottanýyn qaitarýǵa jáne joiýǵa arnalǵan NMR Pipetector tehnologiiasyn usynady. Bul joba Qazaqstannyń 14 oblysy men Astana jáne Almaty qalalarynyń TKSh sýbektilerinde tanystyrylǵan-dy.
QR Investitsiialar jáne damý ministri Jeńis Qasymbek QR Úkimetiniń otyrysynda habarlaǵanyndai, Mitsui tehnologiiasy boiynsha korroziiaǵa qarsy jabdyǵyn Qazaqstanda tájiribelik tártipte qondyrý josparlanyp otyr. Bul sýdyń sapasyn jaqsartady jáne qyzmet etý merzimin 40 jylǵa deiin uzartatynymen erekshelenedi. Sonymen qatar, jelilerdi rekonstrýktsiialaý men jańǵyrtýǵa memlekettik biýdjetten ketetin shyǵyndardy azaitýǵa múmkindik beredi. Ministrdiń aitýynsha, qubyrlardy aýystyryp 100 shaqym jelilerdi rekonstrýktsiialaý 11,6 mlrd. teńgeden astam qarjyny talap etedi. Al japondyq tehnologiiany paidalanyp, atalǵan qashyqtyqtaǵy jelilerdi korroziiaǵa qarsy jabdyqtardy ornatý shamamen 618,5 mln. teńgeni qurap, 19 ese arzanǵa túsedi eken.
Qazirgi kezde, «TKSh QazOrtalyǵy» atalǵan tehnologiiany Qazaqstan aýmaǵynda synaqtan ótkizýge arnalǵan pilottyq jobalardy anyqtaý boiynsha Mitsui kompaniiasymen belsendi jumys jasap jatyr.
– Qazaqstan – Japoniia úkimetaralyq komissiiasy aiasynda shilde aiynyń sońynda biz yntymaqtastyq týraly kelisimge qol qoiamyz jáne keibir óńirlerde pilottyq jobalardy iske asyrýdyń daiyndyq jumystaryn bastaimyz. Bastama sátti aiaqtalǵan jaǵdaida, óndiristi jergiliktendirý maqsatynda jabdyqtarǵa qyzmet kórsetý jáne Qazaqstan aýmaǵynda birlesken kásiporyndardy uiymdastyrý boiynsha birlesken servistik ortalyqtaryn qurý qarastyrylatyn bolady, – dep atap ótti «TKSh QazOrtalyǵy» AQ Basqarma Tóraǵasy Nursultan Jienbaev.
Aita ketýimiz kerek, Japoniia sýmen jabdyqtaý salasynda álemdegi jetekshi memleket. Mysaly, Tokiodaǵy sýmen jabdyqtaý júiesi 13 millionǵa jýyq adamǵa qyzmet kórsetedi, sonymen qatar, eń úzdik ortalyqtandyrylǵan sý qubyrlary júiesi bolyp tabylady. Onyń jer asty qubyrlarynyń uzyndyǵy jer ekvatorynyń jartysyn quraidy, al ózen men kólderden shyǵyp sý qubyrynyń kranyna deiin baratyn sý shyǵyny barlyǵy 3,1% quraidy.
Esterińizge sala ketelik, «TKSh QazOrtalyǵy» AQ Qazaqstannyń turǵyn úi-kommýnaldyq kesheni sektoryna innovatsiialardy engizýge arnalǵan barynsha ońtaily nusqalardy izdestirý boiynsha jumystardy belsendi atqarady. Kompaniia mamandary Qazaqstandaǵy turǵyn úi-kommýnaldyq sharýashylyqtyń investitsiialyq tartymdylyǵyn arttyrý, biýdjettik emes investitsiialardy tartý jáne memlekettik-jeke menshik áriptestikti damytý maqsatynda sheteldik jáne sheteldik qarjy uiymdarymen kezdesýler ótkizip, eń ozyq jáne tiimdi tehnologiialardy taldaidy.
Altynai KÁRIBJANOVA
