مەرەكەلىك جيىن ءبىلىم ورداسىنىڭ الدىنان بوي كوتەرگەن ۇلى جازۋشى، عۇلاما عالىم مۇحتار ومارحان ۇلى اۋەزوۆتىڭ ەڭسەلى ەسكەرتكىشىنىڭ اشىلۋ راسىمىمەن باستالدى.
سالتاناتتى شاراعا ءبىلىم جانە عىلىم ءمينيسترى ەرلان ساعادييەۆ، تۇركىستان وبلىسىنىڭ اكىمى جانسەيىت تۇيمەبايەۆ، وقۋ ورىن باسشىلارى مەن ستۋدەنتتەر جانە ءتۇرلى سالادا ەسەلى ەڭبەكتەرىمەن ەل ابىرويىن اسقاقتاتىپ جۇرگەن ۋنيۆەرسيتەت تۇلەكتەرى قاتىستى.
ايماق باسشىسى ءوزىنىڭ قۇتتىقتاۋ سوزىندە ىرگەسى قالانعالى ەل دامۋىنا سۇبەلى ۇلەس قوسىپ كەلە جاتقان وقۋ ورىننىڭ ۇستازدارىنا العىس ءبىلدىردى.
«75 جىلدىق تاريحى بار ءبىلىم ورداسى ءۇشىن بيىلعى جىل تولاعاي تابىستارعا تولى بولدى. اتاپ ايتساق، ەلىمىزدەگى جوعارى وقۋ ورىندارىنىڭ رەيتينگىسىندە ءىىى-ورىندى يەلەنسە، QS رەيتينگىسى بويىنشا الەمدەگى 4،5 مىڭ جوعارى وقۋ ورىندارىنىڭ ىشىندە 609-دان 501ء-شى ورىنعا كوتەرىلدى. بۇل وسىندا ۇزاق جىلدار بويى ەڭبەك ەتىپ كەلە جاتقان وقىتۋشى-پروفەسسورلاردىڭ ەرەن ەڭبەگى دەپ ايتار ەدىم.
جالپى تۇركىستان وڭىرىندە 500 مىڭنان اسا جاس بار. مۇندا وقيتىن ستۋدەنتتەردىڭ باسىم كوپشىلىگىن وبلىسىمىزدىڭ جاستارى قۇرايدى.
ەندەشە وسىندا ءبىلىم الىپ، ءوز سالاسىنىڭ ۇزدىگى اتانعان ءبىتىرۋشى تۇلەكتەر تۇركى دۇنيەسىنىڭ ورتالىعىنا اينالعان تۇركىستان وبلىسىندا وزدەرىنىڭ جاڭا مۇمكىندىكتەرىن جۇزەگە اسىرادى دەپ سەنىم بىلدىرەمىن»، – دەدى جانسەيىت قانسەيىت ۇلى.
