ەلىمىزدىڭ ساياسي، ەكونوميكالىق جانە قابىلدانعان باعدارلامالىق قۇجاتتار اياسىندا پارتيانىڭ اتقارعان جۇمىسى قورىتىندىلانعان كەڭەستە ونلاين رەجيمدە وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ وڭىردەگى پارتيا تاراپىنان اتقارىلعان جۇمىستار جايى مەن «سيفرلىق قازاقستان» مەملەكەتتىك باعدارلاماسىنىڭ وبلىستا ىسكە اسىرىلۋ بارىسىن باياندادى.
وندا اكىم ءبىلىم سالاسىندا بالالاردى مەكتەپكە دەيىنگى ۇيىمدارعا كەزەككە قويۋ جانە ەسەپكە الۋ، ورىندارىن الماسۋ پروسەستەرى اۆتوماتتاندىرىلعانىن ايتىپ، مۇنداي شەشىم رەسپۋبليكادا ءبىرىنشى رەت ىسكە اسىرىلعانىن ءمالىم ەتتى.
– «سيفرلىق قازاقستان» مەملەكەتتىك باعدارلاماسىن ىسكە اسىرۋ ءبىزدىڭ ەرەكشە نازارىمىزدا. بۇل باعىت بويىنشا وبلىستا جۇيەلى جۇمىستار اتقارىلىپ كەلەدى. سيفرلاندىرۋ ءبىلىم سالاسىندا دا ءساتتى ەنگىزىلۋدە. ماسەلەن، بۇگىندە بالالاردى بالا باقشاعا قابىلداۋ اۆتوماتتاندىرىلعان. قازىرگى ۋاقىتتا بۇل قىزمەتتىڭ ءتۇرى بويىنشا 98 172 ءوتىنىم كەلىپ ءتۇسىپ، 30645 بالا ەلەكتروندى وتىنىشتەر ارقىلى بالاباقشالارعا جىبەرىلدى. بۇل جۇيە شىمكەنتتەگى 459 مەكتەپكە دەيىنگى ۇيىمداردا ەنگىزىلدى، ول 100 پايىزدى قۇرايدى. ال جالپى ورتا ءبىلىم بەرەتىن مەملەكەتتىك مەكتەپتەرگە 1-سىنىپقا ەسەپكە الۋ پروسەسى اۆتوماتتتاندىرىلسا، ءبىلىم سالاسىندا قول جەتىمدىلىك، قولايلىلىق جانە اشىقتىقتى قامتاماسىز ەتۋ ماقساتىندا كادر ىرىكتەۋ ماسەلەسى دە سيفرلىق فورماتقا كوشىرىلدى. بۇل جۇيە شىمكەنت قالاسىنداعى بارلىق مەكتەپتەرگە ەندىرىلدى. بۇگىنگى تاڭدا وسى جۇيە ارقىلى 2374 ءوتىنىم قابىلدانىپ، 1010 اشىق كونكۋرس وتكىزىلدى. ناتيجەسىندە 654 كانديتات جۇمىسقا ورنالاستى. بۇل ءوز كەزەگىندە سىبايلاس جەمقورلىق تاۋەكەلىن 80 پايىزعا جويسا، كەلىسپەۋشىلىك بويىنشا ارىزداردى 92 پايىزعا، سونداي-اق، اشىق باسەكەلەستىكتى ۇيىمداستىرۋ ناتيجەسىندە پەداگوگيكالىق قۇرامنىڭ سانى ارتتى، – دەدى وبلىس اكىمى.
سونىمەن قاتار ەلباسىعا دەنساۋلىق ساقتاۋ سالاسىندا وبلىس اۋماعىنداعى 69 ەمحانادا كەشەندى مەديسينالىق اقپاراتتىق جۇيەسى ەنگىزىلىپ، بۇل «دارىگەردى ۇيگە شاقىرۋ»، «دارىگەردىڭ قابىلداۋىنا جازىلۋ»، «مەديسينالىق ۇيىمعا تىركەلۋ» سىندى قىزمەتتەردى الۋعا مۇمكىندىك تۋعىزعانى تۋرالى باياندالدى.
ءوز سوزىندە اكىم وبلىس كولەمىندەگى بارلىق 15 اۋدان ورتالىعى، 181 اۋىل وكرۋگتەرى جانە 834 ەلدى مەكەندەردىڭ كارتاسى سيفرلىق فورماتقا كوشىرىلىپ، ونداعى ءاربىر قۇرىلىس نىسانى «مەكەنجاي تىركەلىمى» دەرەكتەر قورىمەن سايكەستەندىرىلگەنىن ايتىپ ءوتتى. اتالعان سيفرلىق كارتا نەگىزىندە بۇگىنگى تاڭدا شىمكەنت قالاسى بويىنشا تازا سۋ جەتكىزۋ توراپتارى تولىعىمەن ەنگىزىلدى جانە تەحنيكالىق شارتتاردى بەرۋ ۇدەرىسى اۆتوماتتاندىرىلدى. بۇدان بولەك سيفرلىق كارتا ەرەكشە قورعالاتىن تابيعي ايماقتار، سۋ قورعاۋ بەلدەۋلەرى، اۋىل شارۋاشىلىق ماقساتىنداعى جەر ۋچاسكىلەرى تۋرالى اقپاراتتى قامتيدى.
بۇدان باسقا اكىم ساياسي كەڭەستىڭ كەڭەيتىلگەن وتىرىسىندا مەملەكەت باسشىسىنا «نۇر وتان» پارتياسىنىڭ جوباسى اياسىندا وبلىستا 26 IT-سىنىبى اشىلاتىنىن حابارلادى. بۇگىندە وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ بازاسىندا 6 IT-سىنىپ اشىلدى. ال جالپى 2020 جىلعا دەيىن 106 ءىت-سىنىپ اشىلىپ، ولاردى 100 پايىز ماتەريالدىق تەحنيكالىق بازامەن جابدىقتاۋ جوسپارلانعان. بۇدان بولەك، وڭىردە «ءىت ماماندارىن دايىنداۋ» پارتيالىق جوباسىن جۇزەگە اسىرۋ بويىنشا جىل اياعىنا دەيىن 2 – ءىت ورتالىق اشۋ كوزدەلۋدە. قازىرگى تاڭدا اتالعان جوبا شەڭبەرىندە IT-ورتالىق م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ بازاسىندا اشىلعان.
