ەڭ الدىمەن وبلىس اكىمى قۇربان ايت مەرەكەسىمەن قۇتتىقتاپ 10 بالانى تاربيەلەپ وتىرعان ەرالييەۆتەردىڭ وتباسىنا بارىپ، مەكتەپكە باراتىن جەتى بالاسىنا ساباققا قاجەتتى زاتتار مەن ۇلكەن تەلەديدار تارتۋ ەتتى.
ءوز سوزىندە ايماق باسشىسى قاسيەتتى مەرەكە كۇنى وتباسىعا بەيبىتشىلىك پەن تاتۋلىق، اماندىق جانە قۇت-بەرەكە تىلەپ، بالالارعا اباي، جامبىل، قۇرمانعازى، مۇحتار اۋەزوۆتىڭ مۇرالارىن جالىقپاي وقىپ، ءبىلىمدى دە تاربيەلى ازامات بولىپ ءوسۋىن ايتتى.
نۇربولات پەن گۋلفايرۋز اتا-اپاسىمەن بىرگە 10 ۇل-قىزدى تاربيەلەپ وسىرۋدە. ونىڭ سەگىزىن باتىر انا ءوزى دۇنيەگە اكەلسە، سونىمەن قوسا، باۋىرىنىڭ جەتىم قالعان ەكى بالاسىن باۋىرىنا باسقان. ەرالييەۆتەردىڭ ۇلكەنى 22 جاستا، ال كىشكەنتايى 1 جاس 3 ايعا تولىپ وتىر.
مۇنان سوڭ، ءوڭىر باسشىسى شىمكەنتتە ورنالاسقان №3 بالالار ۇيىنە بارىپ، جاڭا وقۋ جىلىندا 1 سىنىپقا باراتىن 15 وقۋشىعا مەكتەپكە قاجەتتى قۇرالدار تولتىرىلعان سومكەلەر مەن وزگەدە مەكتەپكە باراتىن 32 بالاعا ساباققا قاجەتتى زاتتاردى تابىستادى.
بالالاردىڭ ءار قايسىسىمەن تىلدەسكەن ايماق باسشىسى ولاردىڭ تاقپاقتارى مەن اندەرىن تىڭدادى. سونىمەن قاتار، ەكسپو-عا بارىپ كەلگەن بالالار كورمەدەن العان اسەرلەرىمەن ءبولىسىپ، الەمدىك دەڭگەيدە ۇيىمداستىرىلعان كورمەنى كورۋگە قولداۋ كورسەتكەن اكىمگە العىستارىن جەتكىزدى.
بۇگىندە مۇندا 65 بالا تاربيەلەنۋدە. ولاردىڭ ءار قايسىسى ءتۇرلى ۇلتتان بولعانىمەن بارلىعى ءبىر تىلدە ياعني، قازاق تىلىندە سويلەيدى. بىرنەشە ءتىلدى مەڭگەرگەن بالالار ونەرلى دە سۇلۋ ءارى تاربيەلى.
ايتا كەتەيىك، قازىرگى تاڭدا مۇندا 3 جاستان 11 جاسقا دەيىنگى 65 جەتىم جانە اتا-اناسىنىڭ قامقورلىعىنسىز قالعان بالا تاربيەلەنەدى. بالالار ۇيىندە وقۋ-تاربيە جۇمىسى تولىعىمەن قازاق تىلىندە جۇرگىزىلەدى. وندا بي، ۆوكال، قول ونەر ۇيىرمەلەرى جۇمىس ىستەيدى. ۇيىرمەگە 58 بالا قاتىسادى. ساباقتان تىس ۋاقىتتا ءتۇرلى ءىس-شارالار ۇيىمداستىرىلادى. شىمكەنت قالاسىنداعى №33 ورتا مەكتەپتە 47 بالا ءبىلىم السا، سولاردىڭ 15ء-ى ەرتەڭ ءبىرىنشى سىنىپقا بارادى. سونداي-اق، وتكەن جىلدىڭ قىركۇيەك ايى مەن وسى جىلدىڭ قىركۇيەك ايى ارالىعىندا 45 بالانى اتا-انالار قامقورلىعىنا العان.
وقو اكىمىنىڭ باسپا ءسوز قىزمەتى
