Eń aldymen oblys ákimi Qurban aıt merekesimen quttyqtap 10 balany tárbıelep otyrǵan Eralıevterdiń otbasyna baryp, mektepke baratyn jeti balasyna sabaqqa qajetti zattar men úlken teledıdar tartý etti.
Óz sózinde aımaq basshysy qasıetti mereke kúni otbasyǵa beıbitshilik pen tatýlyq, amandyq jáne qut-bereke tilep, balalarǵa Abaı, Jambyl, Qurmanǵazy, Muhtar Áýezovtyń muralaryn jalyqpaı oqyp, bilimdi de tárbıeli azamat bolyp ósýin aıtty.
Nurbolat pen Gýlfaırýz ata-apasymen birge 10 ul-qyzdy tárbıelep ósirýde. Onyń segizin batyr ana ózi dúnıege ákelse, sonymen qosa, baýyrynyń jetim qalǵan eki balasyn baýyryna basqan. Eralıevterdiń úlkeni 22 jasta, al kishkentaıy 1 jas 3 aıǵa tolyp otyr.
Munan soń, óńir basshysy Shymkentte ornalasqan №3 balalar úıine baryp, jańa oqý jylynda 1 synypqa baratyn 15 oqýshyǵa mektepke qajetti quraldar toltyrylǵan sómkeler men ózgede mektepke baratyn 32 balaǵa sabaqqa qajetti zattardy tabystady.
Balalardyń ár qaısysymen tildesken aımaq basshysy olardyń taqpaqtary men ánderin tyńdady. Sonymen qatar, EKSPO-ǵa baryp kelgen balalar kórmeden alǵan áserlerimen bólisip, álemdik deńgeıde uıymdastyrylǵan kórmeni kórýge qoldaý kórsetken ákimge alǵystaryn jetkizdi.
Búginde munda 65 bala tárbıelenýde. Olardyń ár qaısysy túrli ulttan bolǵanymen barlyǵy bir tilde ıaǵnı, qazaq tilinde sóıleıdi. Birneshe tildi meńgergen balalar ónerli de sulý ári tárbıeli.
Aıta keteıik, qazirgi tańda munda 3 jastan 11 jasqa deıingi 65 jetim jáne ata-anasynyń qamqorlyǵynsyz qalǵan bala tárbıelenedi. Balalar úıinde oqý-tárbıe jumysy tolyǵymen qazaq tilinde júrgiziledi. Onda bı, vokal, qol óner úıirmeleri jumys isteıdi. Úıirmege 58 bala qatysady. Sabaqtan tys ýaqytta túrli is-sharalar uıymdastyrylady. Shymkent qalasyndaǵy №33 orta mektepte 47 bala bilim alsa, solardyń 15-i erteń birinshi synypqa barady. Sondaı-aq, ótken jyldyń qyrkúıek aıy men osy jyldyń qyrkúıek aıy aralyǵynda 45 balany ata-analar qamqorlyǵyna alǵan.
OQO ákiminiń baspasóz qyzmeti
