جەلىدە "جانقوش تۇراروۆ زورلادى" دەپ ايىپتاعان ءانارۋ قۇرمانالىگە قاتىستى ۆيدەو پايدا بولدى، - دەپ حابارلايدى Dalanews.kz.
بۇرىن ەش جەردە جاريالانباعان ۆيدەو Kozachkov offside تەلەگرام ارناسىندا شىقتى.
ۆيدەو وسىدان ءبىر جىل بۇرىن الماتىداعى مەيرامحانالاردىڭ بىرىندە تۇسىرىلگەن.
ۆيدەوداعى ايەل تەلەفونى ۇرلانعانى تۋرالى ايتىپ، پوليسيا شاقىرعان. تەلەگرام مالىمەتىنشە، شىن مانىندە تەلەفونى وزىندە بولعانى تۋرالى جازىلعان.
Inbusiness سايتىنىڭ حابارلاۋىنشا، بوكسشى زورلادى دەپ شاعىمدانعان ءانارۋ ءقۇرمانالى كومپوزيتور قالدىبەك ءقۇرمانالى مەن مارقۇم اقىن اقمارجان تاۋبايەۆانىڭ قىزى ەكەنى بەلگىلى بولدى.
ءانارۋ ءقۇرمانالىنىڭ جەلىدەگى پاراقشاسىندا قالدىبەك ءقۇرمانالى مەن اقمارجان تاۋبايەۆانىڭ بىرگە تۇسكەن سۋرەتتەرى جاريالانعانىن بايقاۋعا بولادى.
ءانارۋ ءقۇرمانالىنىڭ اناسى اقمارجان تاۋبايەۆا 2016 جىلى ومىردەن وتكەن. ءانارۋ ءقۇرمانالى دە جاقىندا بەرگەن سۇحباتىندا اناسىنىڭ ءولىمى جانىنا قاتتى باتقانىن ايتقان ەدى.
سەنبى، 24 تامىزدا بوكسشى جانقوش تۇراروۆ الەۋمەتتىك جەلى مەن باق-تا قىزۋ تالقىلانىپ جاتقان داۋلى ماسەلەگە قاتىستى تاعى دا مالىمدەمە جاساعان بولاتىن. سەبەبى بۇعان دەيىن ءانارۋ قالدىبەك قىزى سپورتشىمەن قالاي تانىس ەكەنىن جانە ءىستىڭ ءمان-جايىن ايتقان ەدى.
ءانارۋدىڭ ايتۋىنشا، ول جانقوش تۇراروۆپەن 2018 جىلى الەۋمەتتىك جەلى ارقىلى تانىسقان.
«2018 جىلى «ۆكونتاكتە» الەۋمەتتىك جەلىسى ارقىلى ماعان ءوزى ءبىرىنشى حات جازدى. مەنىڭ سۋرەتتەرىمەن ءلۇپىل باسىپ، ۇنەمى حات جازىپ ءجۇردى. مەن ول كەزدە ونىڭ ۇيلەنگەنىن، بالا-شاعاسى بار ەكەنىن بىلگەن جوقپىن، بوكسشى ەكەنىن دە بىلگەن جوقپىن. الەۋمەتتىك جەلىدە وتباسى تۋرالى ەشبىر اقپارات جازباعان. بويداقپىن دەپ ستاتۋس قويعان. سودان كەيىن جاي عانا سويلەسىپ ءجۇردىم. 2018 جىلدىڭ اقپان ايىندا مەنى كەزدەسۋگە شاقىردى. ونداي جەرگە جالعىز بارمايتىن بولعان سوڭ قۇربىمدى ەرتىپ الدىم. گرۋپپالاس قۇربىم ەكەۋمىز كەزدەسۋگە باردىق، ال ونىڭ جانىندا كوپ ادام بولدى. سودان باستاپ ءبىر اي بويى ماعان حات جازىپ ءجۇردى. ماعان «سەن پاك قىزسىڭ، سەن تازا قىزسىڭ، ماعان قاتتى ۇنايسىڭ» دەيتىن. ءبىراق، ول كەزدە مەن ونىڭ وتباسىلى ادام ەكەنىن ءبىلىپ، «ءسىز ۇيلەنگەن ادام ەكەنسىز، مەن سىزبەن ارالاسا المايمىن» دەدىم. «جوق، مەن ۇيلەنگەن بولسام دا سەن ماعان ۇنايسىڭ، مەن ساعان اعالىق قامقورلىق تانىتقىم كەلەدى، جاماندىق ويلامايمىن» دەدى. وسىلاي كۇندە حات جازاتىن. ارادا ءبىر اي وتكەندە ماعان «اكەمنىڭ اناسى، اجەم قاتتى اۋىرىپ جاتىر. ءحال ۇستىندە. سەنى كورسەتكىم كەلەدى، كەلشى» دەپ ءبىر مەكەن-جاي جىبەردى. مەن بىردەن بارا المايمىن دەدىم. ءبىراق، سونىڭ الدىندا، ءبىر جارىم جىل بۇرىن مەن انامنان ايىرىلعان ادام رەتىندە ونىڭ اجەسى اۋىرىپ قالعانىنا قاتتى جانىم اشىدى. سوندىقتان، ول مەنى اپاسىنىڭ ءحالىن سۇراۋعا كوندىردى»، - دەيدى ءانارۋ قالدىبەك قىزى.
سپورتشى جانقوش تۇراروۆ ءانارۋدىڭ وسى مالىمدەمەسىنە قاتىستى باسپا ءسوز كونفەرەنسياسىن وتكىزبەك.
"ماعان قاتىستى سۇحبات بەرىپ جاتقان ادامنىڭ لايلى اڭگىمەلەرى مۇلدەم قىزىق ەمەس. مەنىڭ ومىرلىك ۇستانىمدارىم، ماقساتتارىم مۇلدە باسقا. اقيقات ورىن الاتىنىنا سەنىمدىمىن. سوعان بايلانىستى مەنىڭ زاڭدى ادۆوكاتىم باسپا ءسوز كونفەرەنسياسىن وتكىزەتىن بولىپ شەشتى"، - دەدى ول الەۋمەتتىك جەلىدە.
بۇعان دەيىن تانىمال قازاقستاندىق بوكسشى جانكوش تۇراروۆ «قىز زورلادى» دەگەن اقپارات تاراپ كەتتى. ماسەلەگە الماتى پوليسياسى پىكىر ءبىلدىردى.
پوليسيانىڭ مالىمەتىنشە، الماتى قالاسى اۋەزوۆ اۋدانىنىڭ پوليسيا دەپارتامەنتى قىلمىستىق ءىس قوزعاعان.
«سوت-مەديسينالىق ساراپتاما تاعايىندالدى. ءقازىر وقيعانىڭ ءمان-جايىن انىقتاۋ ءۇشىن تەرگەۋ جالعاسىپ جاتىر»، - دەپ جازىلعان حابارلاما.
كەيىن جانقوش تۇراروۆ وزىنە تاعىلعان ايىپتارعا جاۋاپ بەردى.
«3 قىز ءوسىرىپ وتىرعان اكەمىن! توسەكتەس قىز كەرەك بولسا ماعان زورلاماي-اق كەلەتىن جاعدايىم بار! قايدان شىققان جالا ەكەنىن ءوزىم دە تۇسىنبەي وتىرمىن، ءقازىر ماسەلەنىڭ ءمان جايىن انىقتاپ، كىم قانداي جالا تاعىپ وتىرعانىن انىقتايتىن بولامىن»، - دەدى ول.
