[caption id="attachment_10838" align="alignright" width="441"]
يرينا ملوديك، رەسەيلىك پسيحولوگ[/caption]
يرينا ملوديك، رەسەي
ءبىراق ءتىسىڭ ەمەس، جانىڭ اۋىرسا قايتپەك كەرەك؟ ءتىپتى جانىڭ اۋىرمادى دەلىك. الايدا، كۇندىز كۇلكى، تۇندە ۇيقى جوق، بەيمازا كۇي كەشسەڭىز شە؟ ءومىر سۇرەسىڭ، ال باقىت جوق. كىمگە بارىپ جانىڭنىڭ دەرتىن ەمدەرسىڭ؟ كوپ ادام يمام، ەرەسەك اقىلشى، كەيبىرى ءتىپتى تاۋىپكە بارىپ جاتادى. كومەك سۇرايدى. ەمشىگە بارىپ جولىن اشتىرادى. قارا دۇعانى الدىرادى. كومەكتەسەدى مە؟ ءيا!
بۇنىڭ بارلىعى ۋاقىتشا سەرپىلىس. قيىندىق قايتالاناتىن قۇبىلىس. ونى جەڭۋ ءۇشىن ءتاۋىپتىڭ تابالدىرىعىن توزدىرۋ شارت پا؟ سوندىقتان جاننىڭ قالاۋى مەن ءوز مۇمكىندىگىڭنىڭ شەگىن اجىراتۋ كەرەكتىگىن تۇسىنەسىڭ. ءسىزدىڭ قايتالانباس ءومىرىڭىزدىڭ شىلبىرىن بوتەن ادامعا ۇستاتا بەرگەن قانشالىقتى دۇرىس؟
پسيحولوگتارعا كوپ ادام كەڭەس سۇراپ كەلەدى. ءبىر نارسە تۇسىنگىسى، قيىندىعىن قايتىپ جەڭۋگە بولاتىنىن سۇراي كەلەدى. كونسۋلتاسيانى مىقتى ماماندار بەرەدى. پسيحولوگ ءوزى جاقسى تۇسىنەتىن سالانىڭ قىر-سىرىن، بۇگە-شىگەسىن مىقتى بىلەدى دەپ ەسەپتەلەدى. سوندىقتان ول كەڭەس بەرە الادى دەپ سەنەمىز.
كەڭەس بەرۋ ءبىر ساعات ۋاقىت الار. وسى ءبىر ساعاتتا كەڭەسكە مۇقتاج ادام نە الادى؟ ءوزىنىڭ قيىندىعىنا باسقا كوزقاراسپەن قاراۋعا بولاتىنىن بىلەدى. كوكجيەك كەڭەيە تۇسەدى. بۇرىن بايقالماعان قۇبىلىستى سەزەدى. كەي ادامعا وسىنىڭ ءوزى جەتكىلىكتى. ارى قاراي ءوزى سول باعىتتا دامي بەرەدى. ءوزىنىڭ قيىندىعىن ءار ءتۇرلى قىرىنان قاراپ ۇيرەنەدى.
پسيحولوگقا كەلگەن كەي ادام ءوزىنىڭ قيىندىعىنىڭ تامىرى تىم تەرەڭدە ەكەنىن باجايلايدى. ءوز كۇشىمەن، وزگەنىڭ كومەگىنسىز شەشىلمەسىن تۇسىنەدى. وعان جول باستاۋشى قاجەت. سول كەزدە ەكەۋى دە – پسيحولوگ پەن ەمدەلۋشى دە سول تۇيتكىلگە دەن قويىپ، ونى تۇبەگەيلى شەشۋگە بەل شەشە كىرىسەدى. ەگەر بۇل قيىندىق، سەبەپ جاقىندا پايدا بولسا، بالالىق شاقپەن شاتىسى بولماسا، بىرنەشە رەت كەڭەس الۋ جەتكىلىكتى بولادى. ەگەر تامىرى تەرەڭگە تارتقان قۇبىلىس بولسا، ونى ەمدەۋگە كوپ ۋاقىت كەتەدى. از ۋاقىتتا ەمدەۋ تاسىلدەرى ۋاقىتشا عانا كومەكتەسۋى مۇمكىن. سوندىقتان جوسپارلى جۇمىس جاساۋعا تۋرا كەلەدى. كەيدە بىرنەشە اي، كەيدە جىلدارعا سوزىلادى.
كەز كەلگەن قيىندىق ادام ومىرىندەگى قولايسىزدىقتان تۋادى. ءبارى جاقسى بولسا، ەشكىم وزگەرۋگە قۇمارتپاس ەدى. پسيحوتەراپياعا ادامدى كۇيزەلىس، قايعى، ۋايىم، اۋىر سوققى جەتەلەپ اكەلەدى. سول ساتتە باستاعى سىناققا قاتتى نارازى بولامىز. ءبىراق سول ارقىلى وسەتىنىمىزدى، ءومىردى رەتتەيتىنىمىزدى بىلمەيمىز. ايتپەسە، ريزاشىلىعىمىزدى بىلدىرەر ەدىك. ادامنىڭ باسىنا تۇسكەن قولايسىزدىق ءبىر ساتىدان ەكىنشىسىنە وتۋگە سەپتەسەدى. دامۋعا، جەتىلۋگە، ترانسفورماسيالانۋعا سەرپىن بەرەدى.
پسيحوتەراپيا – بۇل…
جانعا ءدارۋ بەرەتىن تاعى ءبىر سالا پسيحوتەراپيا. باتىستا ول دارىمەن ەمدەۋ دەپ تۇسىندىرىلەدى. ال، بىزدە ءبارى باسقاشا. ادامعا ءوزىن تانۋعا، ءومىرىن وزگەرتۋگە كومەكتەسكەن ءار پسيحولوگ پسيحوتەراپيەۆت سانالادى.
سىرتقى الەم ەشقاشان وزگەرمەيتىنىن تۇسىنگەندە، باقىتتى كۇتۋ بەكەر، الەمنىڭ ادىلەتتى بولۋىن ارمانداۋ قاجەتسىز ەكەنىن بىلگەن ءار ادام پسيحولوگتىڭ كومەگىنە مۇقتاج ەكەنىن سەزەدى. ءار نارسەنى وزىنەن باستاۋى كەرەكتىگىن تۇسىنگەن جان دۇرىس جولعا تۇسكەنى. تۇيسىكتەگى «مەن كىممىن؟» دەگەن ساۋال ءتۇپ كوتەرىلىپ، جۇرەككە جەتكەندە ءبارى وزگەرىپ سالا بەرەدى. نە ىستەسەم بولادى؟ نەگە بۇل مەنى مازالادى؟ ومىردە نەنى وزگەرتكەن دۇرىس؟ قالاي وزگەرتەم؟ جانىڭ قىسىلىپ، جاعدايىڭ ۋشىققاندا وزگەرتۋ كەرەكتىگىن تۇسىنەسىڭ، ماجبۇرلىگىڭ ۇدەي تۇسەدى. نەعۇرلىم جىلدام وزگەرتسەڭ، ءبارى سوعۇرلىم تەز جاقساراتىنىن بىلەسىڭ.
كەز كەلگەن قيىندىق ادام ومىرىندەگى قولايسىزدىقتان تۋادى. ءبارى جاقسى بولسا، ەشكىم وزگەرۋگە قۇمارتپاس ەدى. پسيحوتەراپياعا ادامدى كۇيزەلىس، قايعى، ۋايىم، اۋىر سوققى جەتەلەپ اكەلەدى. سول ساتتە باستاعى سىناققا قاتتى نارازى بولامىز. ءبىراق سول ارقىلى وسەتىنىمىزدى، ءومىردى رەتتەيتىنىمىزدى بىلمەيمىز. ايتپەسە، ريزاشىلىعىمىزدى بىلدىرەر ەدىك. ادامنىڭ باسىنا تۇسكەن قولايسىزدىق ءبىر ساتىدان ەكىنشىسىنە وتۋگە سەپتەسەدى. دامۋعا، جەتىلۋگە، ترانسفورماسيالانۋعا سەرپىن بەرەدى.
قيىندىق نە ءۇشىن كەرەك؟
ادام ءومىرى قايتالانىپ وتىرادى. تابيعاتتىڭ وزىندە كۇندى ءتۇن الماستىرۋ، جاستىق شاقتى كارىلىك اۋىستىراتىنى بۇلجىمايتىن اقيقات. ءدال سول سياقتى ادام پسيحيكاسىندا كەزەكتەسۋ سۇرانىسى بار. تىنىشتىق كەزى بار. قۋانىش ءساتى. قاناعات ەتۋ. ءبىراق بۇل كۇيدىڭ بارىندە ادام ۇزاق قالسا، تىنىشتىق ءىشپىسۋعا، قۋانىش توقمەيىلسۋگە، قاناعات ەتۋ ساعىنىشقا ۇلاسادى. ادام جاڭا بىردەڭەنى اڭسايدى.
ءار ادام باسىنداعى قيىندىعى مەن قولايسىزدىقتارىنا العىس ايتا ءبىلۋى كەرەك. داعدارىس، وزگەرىس – ادام ومىرىندە ءبىر نارسە ۇيرەنسىن دەگەن ماقساتتا جۇزەگە اسادى. ءسال دە بولسا باسقا قىرىنان اشىلسىن دەيدى. كوپشىلىك ادامدار داعدارىستى كادەسىنە جاراتا بىلمەيدى. تۇيتكىلدەن قورقادى. ونى بولدىرماۋ ءۇشىن قانشاما كۇش-جىگەرىن سارپ ەتەدى. اقىر سوڭى ءوزىن وزگەرىسسىز قالدىرادى. ءبىراق زاڭدىلىق بويىنشا، قيىندىقتان ءبىرجولاتا قاشىپ قۇتىلۋ مۇمكىن ەمەس. ال، كوپ ادام ءوزىن وزگەرتۋدىڭ ورنىنا ەسكى ءامال-تاسىلىن قولدانىپ، كونەرگەن تارتىپتەن اۋىتقىماي، كەشەندى، قالىپتاسقان مىنەزىن ساقتاپ قالادى.
جانىڭىز اۋىرا ما؟ كوڭىلسىز بە ەدىڭىز؟ ءومىردىڭ قىزىعى جوق پا؟ وندا ءومىردى وزگەرتەتىن ۋاقىت جەتتى دەگەن ءسوز. ءومىردى تەك ءوزىڭىزدى وزگەرتۋ ارقىلى عانا جاڭالاۋعا بولادى. بالالىق شاق پەن جاستىق كەزدەگى امال-تاسىلدەر ەرەسەك ومىردە پايداسى ازداۋ بولماق. سوندىقتان ەسەيۋگە، ەستى بولۋعا قورىقپاڭىز.
كوبىنە ادام قانداي جولمەن ءومىر سۇرگەنىن پايىمداي بەرمەيدى. قيىندىقتى قالاي جەڭەم دەپ تە وزىنەن سۇرامايدى. ەگەر ۇيدەگى تاربيە نەعۇرلىم قاتال بولسا، اتا-انا قىسىپ ۇستاسا، وندا الەمنىڭ الۋاندىلىعىن ءتۇسىنۋ سوعۇرلىم قيىنداي بەرەدى. بالاعا كۇندە شەكتەۋ مەن تىيىم قاجەت بولادى. ونىڭ ءبارى بالانىڭ قاۋىپسىزدىگى ءۇشىن. ەسەيگەن سوڭ ومىرگە جان-جاقتى قاراپ ۇيرەنۋ كەرەك. بوتەن بىرەۋدىڭ كومەگىنسىز اينالانى زەرتتەۋ قورقىنىشتى. ويتكەنى، ىشتەي الەم سىزگە سىڭىرگەندەي عانا دەگەن سەنىمگە نىق بايلانعانسىز. ەگەر كۇنى-تۇنى ەڭبەك ەتىپ، ءوزىڭدى بارىنەن تىيىپ ۇستاساڭ، سوندا باقىتتى بولاسىڭ دەگەننەن شىعا الماۋ. ءبىراق ۇنەمى ءتىل العىش، جاقسى، جاعىمدى بولىپ، ءوزىڭدى، ويىڭدى، جۇرەگىڭدى وزگەگە قۇرباندىققا شالا بەرسەڭ، ەشكىم ماقتاۋ قاعازىن بەرمەيتىنى ەسكەرتىلمەيدى.
قانشا كۇش-جىگەر جۇمساساڭىز دا ءسىز كۇتكەن باقىت ءالى جوق پا؟ سۇيىكتىڭىز تاستاپ كەتەدى. اتا-اناڭىز ادەتتەگىدەي كوڭىلى تولمايدى. باستىق ماقتامايدى، ءىسىڭىزدىڭ تياناقتى باعاسىن بەرمەيدى. باقىت تا، ماراپات تا جوق. نەگە؟ ءسىز تىرىستىڭىز عوي! بۇل نە؟ ادىلەتسىزدىك؟ نەمەن تۇسىندىرۋگە بولادى؟ بولادى ەكەن. بالالىق ەلەس پەن سول كەزدەگى ويلاۋ جۇيەسىنەن ارىلۋ كەرەك. بۇنىڭ ەلەس ەكەنىمەن دە كەلىسپەۋىڭىز ىقتيمال. دۇرىس! ول ءۇشىن ۋاقىت كەرەك. وزىڭىزگە شىندىقتى كورسەتە الاتىن ادامنىڭ پىكىرى قاجەت. جولباستاۋشى اۋاداي كەرەك! ەسكى ومىردەن باس تارتۋ وڭاي ەمەس.
بالا كۇنگى سانا وزىنە كوپتەگەن قورعان-قامالدار تۇرعىزىپ العان. كەزدەيسوقتىق پەن جاعىمسىزدىقتى ومىرىڭىزگە ەنگىزۋگە قورقاسىز. ول قامالداردى بۇلدىرۋگە بەرگىڭىز كەلمەيدى. قامال سىنسا، قالاي قورعانباقسىز؟ جۇرەگىڭە ينە تىقسا، جانىڭدى ورتەسە قايتپەك كەرەك؟ قابىرعا-دۋالسىز قالاي ءومىر سۇرەسىز؟ كىم قورعايدى؟ سوندىقتان بارىنە ۋاقىت كەرەك. ساتىلاپ وزگەرۋگە بەتبۇرۋدىڭ ءوزى ۇلكەن جەڭىس. ىرگەتاسى تۋعاننان قالانعان قامالدى بۇزۋ ءبىر كۇننىڭ ءىسى ەمەس. پسيحيكا وزگەرىسكە قارسى شىعادى. ىشكى ەكولوگيا ءبىراز بۇلىنەدى.
سودان كەيىن ءسىزدىڭ ومىرىڭىزدە جاڭا ءداۋىر باستالادى.
ەسەيىپ، ءوسىپ، جەتىلىپ كەلە جاتقانىڭىزدا ادامدار ءسىزدى ءبىر قىرىڭىزدان عانا كوردى. ارى كەتسە، ەكى قىرىڭىزدان. سوسىن ءسىز ءوزىڭىزدى وسىنداي عانامىن دەپ ءتۇيىپ قوياسىز ساناعا. باسقا ەشتەڭەگە قابىلەتىم جوق دەپ ويلايسىز. ال، شىن مانىندە، ءسىزدىڭ قولىڭىزدان كەلمەيتىن نارسە جوقتىعىن سەزبەيسىز دە. ءار ادام – زەرتتەلمەگەن عالام. وزگە تۇگىلى ءوزىن دە تۇبەگەيلى تانىماي كەتەتىن تاعدىرلار بار.
ءسىز وزگەرمەيسىز
پسيحوتەراپيا ەسكى ومىرلىك ۇستانىمدارىڭىزدى ءبىرجولاتا جوق قىلا المايدى. ەگەر قايتىپ ورالعىڭىز كەلسە، ولاردى دا پايدالانا الاسىز. پسيحوتەراپيانىڭ كومەگىمەن ادام باسقا نۇسقالاردىڭ دا بارىن بىلەدى. كورەدى. تۇيسىنەدى. قازىرگى جاعدايعا الدەقايدا كوبىرەك سايكەسەتىن امال-تاسىلدەردى مەڭگەرتەدى. مىنەزىڭدى وزگەرتۋ ءوزىڭنىڭ مەنىڭنەن باس تارتۋ ەمەس. ادام بويىندا ەشقاشان وزگەرمەيتىن دە مىنەزدەرى بولادى. ال، پسيحولوگ ءسىزدىڭ بۇرىنعىدان گورى وزىڭىزگە جاقىنداي تۇسۋىڭىزگە، مەنىڭىزدى تاني تۇسۋگە سەبەپشى بولماق.
ەسەيىپ، ءوسىپ، جەتىلىپ كەلە جاتقانىڭىزدا ادامدار ءسىزدى ءبىر قىرىڭىزدان عانا كوردى. ارى كەتسە، ەكى قىرىڭىزدان. سوسىن ءسىز ءوزىڭىزدى وسىنداي عانامىن دەپ ءتۇيىپ قوياسىز ساناعا. باسقا ەشتەڭەگە قابىلەتىم جوق دەپ ويلايسىز. ال، شىن مانىندە، ءسىزدىڭ قولىڭىزدان كەلمەيتىن نارسە جوقتىعىن سەزبەيسىز دە. ءار ادام – زەرتتەلمەگەن عالام. وزگە تۇگىلى ءوزىن دە تۇبەگەيلى تانىماي كەتەتىن تاعدىرلار بار. تۇراقتىلىقتان اۋىتقىسى كەلمەيتىندەر، سولاي ءبىر سىدىرعى كۇن كەشەدى. تۇيەقۇس سەكىلدى. باسىن قۇمعا تىعىپ الىپ. اينالاداعى قورشاعان عاجاپتىڭ بىرىندە سەزبەي قالادى. ءسىزدىڭ ءومىرىڭىزدىڭ قاھارمانى – ءسىز عانا. ءومىر توقتاۋسىز ساياحات. ونى زەرتتەۋ، يە بولۋ، بايىتۋ ءسىزدىڭ عانا قولىڭىزدان كەلەتىن ەرلىك. سوندىقتان ارى قاراي جىلجۋعا، جاڭا ساتىعا كوتەرىلۋگە ەش قىمسىنباڭىز. ءوسۋ مەن دامۋعا دەگەن سۇرانىس – قاۋىپسىزدىكتەن اتتاپ ءوتىپ، ناعىز الەمگە ەسىك اشۋ دەگەن ءسوز. مۇنى ادام وزىنە وتە سەنىمدى، تانىمى تەرەڭ، قۋات-كۇشىم جەتكىلىكتى دەگەندە عانا جاساي الادى.
پسيحوتەراپيا ادامداردى باقىتتى ەتەدى. ول ادامدى ەسەيتەدى. تەك باقىت ىزدەپ كەلسە، ادام قاتەلەسكەنى. بالانى قىزىقتىرۋ، ەلىتۋ جەڭىل. ءبىراق ەرەسەك ادامنىڭ ويىن وزگەرتۋ سونشالىقتى وڭاي ەمەس. بالانىڭ ەلەسى وزگەشە. ونى قايتارۋ مۇمكىن ەمەس. مۇنى سەزۋ ءار ادامعا قيىن. ەندى كەلمەيتىن نارسەنى قايتارۋعا تالپىنبايتىن بولاسىز.
سوندىقتان ەسەيۋدەن قورىقپاۋ كەرەك. تىم بولماسا وزگە ءۇشىن ءومىر سۇرمەي، ءوز ءومىرىڭىزدى كوركەيتۋگە تالپىنىس جاسايسىز. ءوزىڭنىڭ تاعدىرىڭا ءوزىڭ يەمىن دەگەن سەنىم كوكجيەكتى كەڭەيتەدى. ەشكىمدە جوق، بولماعان ءومىر ءسۇرۋ مۇمكىندىگى تەك ءسىزدىڭ قولىڭىزدا. بىرەۋ ۇرسادى، سوگەدى، جاقپاي قالام عوي دەپ بۇعىپ ءومىر سۇرگەننەن، ءوز ەركىندىگىڭدى دالەلدەپ، سونىڭ ارقاسىندا ءوز ءومىرىڭدى باسقاراسىڭ. پسيحوتەراپيا ءومىردىڭ كىلتىن قولىڭىزعا ۇستاتاتىن عىلىم. ومىرىڭىزگە ءدان ريزاسىز با؟
اۋدارعان شىنار ءابىلدا
