مالىمدەمەدە "جاريا مالىمدەمە. مەن، ماماي جانبولات ماماي ۇلى، تاعىلعان ايىپتار بويىنشا ءوزىمدى كىنالى دەپ سانامايمىن. ومىرىمدە بيزنەسپەن، قارجىلىق شارۋالارمەن اينالىسقان ەمەسپىن. بۇل ءىستى ساياسي استارى بار دەپ، جۋرناليستىك قىزمەتىمە قىسىم جانە "تريبۋنا" گازەتىن جابۋ ارەكەتى دەپ ەسەپتەيمىن" دەپ قولمەن جازىلعان. مالىمدەمەنىڭ سوڭىندا 11 اقپان كۇنى جازىلعانى بەلگىلەنىپ، جانبولات مامايدىڭ قولى قويىلعان.
ازاماتتىق بەلسەندى جانبولات مامايدى 2017 جىلى 10 اقپان كۇنى سىبايلاس جەمقورلىققا قارسى ءىس-قيمىل ۇلتتىق بيۋروسى قىزمەتكەرلەرى ۇستاعان ەدى. بيۋرونىڭ رەسمي سايتىندا جانبولات مامايدىڭ ۇستالۋىن "بتا بانك" ديرەكتورلار كەڭەسىنىڭ بۇرىنعى ءتوراعاسى م.ءابليازوۆ پەن ج.جارىمبەتوۆ جانە باسقا دا تۇلعالارعا قارسى اقشا جىمقىرۋ تۋرالى قوزعالعان ءىستىڭ "جالعاسى" دەپ تۇسىندىرگەن.
بيۋرو "تەرگەۋ بارىسىندا ءابليازوۆتىڭ جاڭا كومەكشىسى ماماي جانبولات ەكەنى انىقتالدى. ول "بتا بانكتەن" ۇرلانعان قاراجاتتىڭ ءبىر بولىگىنىڭ ءىزىن «ساياسي قالام: تريبۋنا» گازەتى ارقىلى قارجىلىق وپەراسيالار جاساپ جاسىرعان. ءقازىر كوررۋپسياعا قارسى بيۋرو قاجەتتى تەرگەۋ شارالارىن جۇرگىزىپ جاتىر" دەپ جازادى.
2006 جىلى 11 اقپاندا وپپوزيسيالىق ساياساتكەر التىنبەك سارسەنباي ۇلى مەن ونىڭ ەكى كومەكشىسىنە قاستاندىق جاسالىپ، مايىتتەرى الماتى وبلىسى تالعار اۋدانىنان تابىلعان ەدى. 2017 جىلى اقپاننىڭ 11ء-ى كۇنى الماتىدا ساياساتكەردى ەسكە الۋ جيىنى ءوتتى.
