“قازمۇنايگاز” ۇك” اق باسقارما ءتوراعاسى اسحات حاسەنوۆتىڭ ايتۋىنشا، “وزەنمۇنايگاز” باسشىسى جانبولات سايماعانبەتوۆتىڭ نارازىلىق بىلدىرۋشىلەرمەن داۋلى سوزگە كەلۋى ولاردىڭ اگرەسسيۆتى ارەكەتتەرىمەن بايلانىستى بولعان. حاسەنوۆ بۇل جاعدايعا قاتىستى پىكىر بىلدىرە وتىرىپ، ەرەۋىلشىلەر باسقا قىزمەتكەرلەردى دە وزدەرىنە قوسىلۋعا ماجبۇرلەمەك بولعانىن، وسىنىڭ سالدارىنان سايماعانبەتوۆ اشۋعا بوي الدىرعانىن ايتتى، دەپ حابارلايدى Dalanews.kz.
اسحات حاسەنوۆ بەينەروليكتىڭ تولىق نۇسقاسى جاريالانباعانىن اتاپ ءوتىپ، سايماعانبەتوۆتىڭ ارەكەتىن اقتامايتىنىن، ءبىراق ونىڭ جۇمىسشىلاردى قورعاۋعا تىرىسقانىن جەتكىزدى.
“جامان ءسوز ايتۋ، ارينە، دۇرىس ەمەس. ءبىراق وعان دەيىن ءبىرقاتار وقيعا ورىن الدى. ەرەۋىلشىلەر عيماراتقا كىرىپ، قىزمەتكەرلەردى زاڭسىز نارازىلىققا قاتىسۋعا كۇشتەپ كوندىرۋگە تىرىستى”، – دەدى حاسەنوۆ پارلامەنتتە سويلەگەن سوزىندە.
ونىڭ سوزىنشە، سايماعانبەتوۆ جۇمىسشىلارمەن باسشى رەتىندە ەمەس، قاراپايىم ازامات رەتىندە سويلەسكەن. وسى كەزدە ول ەموسياعا ەرىك بەرىپ، ءوزىن ۇستاي الماعان.
“وقيعا بارىسىندا ايەلدەر مەن قىزدارعا قىسىم كورسەتىلدى. داۋ وسىنداي جاعدايدان تۋىندادى. ارينە، ءبىز بۇل ماسەلەنى ەسكەرە وتىرىپ، قاجەتتى شارالار قابىلدادىق. باسشىلىق قىزمەتتە جۇرگەندەر كومپانيانىڭ ىشكى ءتارتىبى مەن ەتيكاسىن قاتاڭ ساقتاۋى كەرەك. بولاشاقتا مۇنداي جاعدايلار قايتالانباۋى ءۇشىن بار كۇشىمىزدى سالامىز”، – دەدى “قازمۇنايگاز” باسشىسى.
ايتا كەتەيىك، بۇعان دەيىن حاسەنوۆ “وزەنمۇنايگاز” كاسىپورنىنىڭ بۇرعىلاۋ باسقارماسى جۇمىسشىلارىنىڭ ەرەۋىلدەن كەيىنگى جاعدايى مەن ولاردىڭ جۇمىسقا قايتا ورالۋ مەرزىمى تۋرالى پىكىر بىلدىرگەن ەدى.
ب ا ق وكىلدەرى ەرەۋىلگە شىققان جۇمىسشىلاردىڭ تالاپتارى ورىندالماعان جاعدايدا ولاردىڭ بولاشاعى قانداي بولاتىنىن سۇرادى.
“قازىرگى دەرەكتەرگە سايكەس، ەرەۋىلگە قاتىسقان 160 ادامنىڭ 19-ى جۇمىسقا ورالدى، ال 141ء-ى ءالى شىققان جوق. جالپى العاندا، “وزەنمۇنايگازدا” 4770 قىزمەتكەر بار، ولاردىڭ ىشىندە 4630 ادام جۇمىس ىستەپ جاتىر. ءبىز جۇمىسشىلارعا ەشقانداي ناقتى مەرزىم قويىپ وتىرعان جوقپىز، تەك ءتۇسىندىرۋ جۇمىستارىن جۇرگىزۋدەمىز. ولارعا اكسيانىڭ زاڭسىز ەكەنىن ايتىپ، مىندەتتەرىن تولىق ورىنداۋعا شاقىرىپ وتىرمىز”، – دەدى حاسەنوۆ.
سونىمەن قاتار جۋرناليستەر ەرەۋىلگە قاتىسۋشىلار جۇمىس بەرۋشىنىڭ تاراپىنان قىسىم كورىپ جاتقانىن مالىمدەگەنىن ايتا وتىرىپ، سوعان بايلانىستى ىشكى تەكسەرۋلەردىڭ جۇرگىزىلىپ-جۇرگىزىلمەي جاتقانىن سۇرادى.
“قىسىم كورسەتۋ جاعدايلارى تىركەلمەگەن. بۇل تۋرالى رەسمي تۇردە مالىمدەيمىن. ءبىز اشىق ديالوگ رەجيمىندە جۇمىس ىستەپ، كۇن سايىن قىزمەتكەرلەرمەن كەزدەسۋلەر وتكىزىپ كەلەمىز. ءبىر عانا مەكەمەدە 37 بىرلەستىك پەن 3 ءىرى كاسىپوداق بار. جۇمىسشىلارعا ءوز مىندەتتەرىن ورىنداۋ قاجەت، ال ەگەر قانداي دا ءبىر ۇسىنىس نەمەسە ەسكەرتۋ بولسا، ءبىز ولاردى تالقىلاۋعا جانە شەشۋگە ءارقاشان دايىنبىز”، – دەپ جاۋاپ بەردى حاسەنوۆ.
