“QazMunaiGaz” UK” AQ basqarma tóraǵasy Ashat Hasenovtiń aitýynsha, “ÓzenMunaiGaz” basshysy Janbolat Saimaǵanbetovtyń narazylyq bildirýshilermen daýly sózge kelýi olardyń agressivti áreketterimen bailanysty bolǵan. Hasenov bul jaǵdaiǵa qatysty pikir bildire otyryp, ereýilshiler basqa qyzmetkerlerdi de ózderine qosylýǵa májbúrlemek bolǵanyn, osynyń saldarynan Saimaǵanbetov ashýǵa boi aldyrǵanyn aitty, dep habarlaidy Dalanews.kz.
Ashat Hasenov beineroliktiń tolyq nusqasy jariialanbaǵanyn atap ótip, Saimaǵanbetovtyń áreketin aqtamaitynyn, biraq onyń jumysshylardy qorǵaýǵa tyrysqanyn jetkizdi.
“Jaman sóz aitý, árine, durys emes. Biraq oǵan deiin birqatar oqiǵa oryn aldy. Ereýilshiler ǵimaratqa kirip, qyzmetkerlerdi zańsyz narazylyqqa qatysýǵa kúshtep kóndirýge tyrysty”, – dedi Hasenov parlamentte sóilegen sózinde.
Onyń sózinshe, Saimaǵanbetov jumysshylarmen basshy retinde emes, qarapaiym azamat retinde sóilesken. Osy kezde ol emotsiiaǵa erik berip, ózin ustai almaǵan.
“Oqiǵa barysynda áielder men qyzdarǵa qysym kórsetildi. Daý osyndai jaǵdaidan týyndady. Árine, biz bul máseleni eskere otyryp, qajetti sharalar qabyldadyq. Basshylyq qyzmette júrgender kompaniianyń ishki tártibi men etikasyn qatań saqtaýy kerek. Bolashaqta mundai jaǵdailar qaitalanbaýy úshin bar kúshimizdi salamyz”, – dedi “QazMunaiGaz” basshysy.
Aita keteiik, buǵan deiin Hasenov “Ózenmunaigaz” kásipornynyń Burǵylaý basqarmasy jumysshylarynyń ereýilden keiingi jaǵdaiy men olardyń jumysqa qaita oralý merzimi týraly pikir bildirgen edi.
BAQ ókilderi ereýilge shyqqan jumysshylardyń talaptary oryndalmaǵan jaǵdaida olardyń bolashaǵy qandai bolatynyn surady.
“Qazirgi derekterge sáikes, ereýilge qatysqan 160 adamnyń 19-y jumysqa oraldy, al 141-i áli shyqqan joq. Jalpy alǵanda, “Ózenmunaigazda” 4770 qyzmetker bar, olardyń ishinde 4630 adam jumys istep jatyr. Biz jumysshylarǵa eshqandai naqty merzim qoiyp otyrǵan joqpyz, tek túsindirý jumystaryn júrgizýdemiz. Olarǵa aktsiianyń zańsyz ekenin aityp, mindetterin tolyq oryndaýǵa shaqyryp otyrmyz”, – dedi Hasenov.
Sonymen qatar jýrnalister ereýilge qatysýshylar jumys berýshiniń tarapynan qysym kórip jatqanyn málimdegenin aita otyryp, soǵan bailanysty ishki tekserýlerdiń júrgizilip-júrgizilmei jatqanyn surady.
“Qysym kórsetý jaǵdailary tirkelmegen. Bul týraly resmi túrde málimdeimin. Biz ashyq dialog rejiminde jumys istep, kún saiyn qyzmetkerlermen kezdesýler ótkizip kelemiz. Bir ǵana mekemede 37 birlestik pen 3 iri kásipodaq bar. Jumysshylarǵa óz mindetterin oryndaý qajet, al eger qandai da bir usynys nemese eskertý bolsa, biz olardy talqylaýǵa jáne sheshýge árqashan daiynbyz”, – dep jaýap berdi Hasenov.
