ايتا كەتەيىك، مۇنداي چەمپيونات ەلدە العاش رەت وتكىزىلۋدە. ءداستۇرلى ساداق اتۋ سايىسىنا ەلىمىزدىڭ ءار وڭىرىنەن 200-دەن استام ساداقشى قاتىستى.
چەمپيوناتقا ماڭعىستاۋ وبلىسىنىڭ اكىمى نۇرلان نوعايەۆ، قازاقستان رەسپۋبليكاسى ۇلتتىق سپورت تۇرلەرى قاۋىمداستىعىنىڭ باسشىسى يسلامبەك سالجانوۆ، سونداي-اق قالا تۇرعىندارى مەن قوناقتارى قاتىستى.
– قۇرمەتتى سپورت سۇيەر قاۋىم، بارشاڭىزدى ساداق اتۋدان ەرەسەكتەر، جاستار جانە جاسوسپىرىمدەر اراسىنداعى 1ء-شى رەسپۋبليكالىق ءداستۇرلى چەمپيوناتتىڭ اشىلۋىمەن قۇتتىقتايمىن! وسى جارىسقا ەلىمىزدىڭ باسقا وبلىستارىنان كەلگەن قوناقتارعا، سپورتشىلارعا قوش كەلدىڭىزدەر دەگىم كەلەدى. ماڭعىستاۋ ەجەلدەن ءسالت-داستۇردى بەرىك ۇستانعان، سىر مەن عاجايىپتارعا تولى كيەلى ولكە سانالادى. سونىڭ ءبىر دالەلى – تاۋەلسىز ەلدە العاش رەت ۇيىمداستىرىلىپ وتىرعان «ۇلى دالا جورىعى» مارافونىنىڭ جەڭىمپازدارىنىڭ ەرلىگى. مەملەكەت باسشىسىنىڭ ەلىمىزدىڭ ءاربىر ازاماتى رۋحاني، ءبىلىمدى، باسەكەگە قابىلەتتى بولۋى كەرەك دەگەن تاپسىرماسى اياسىندا سپورت كەشەندەرى سالىنىپ، جوندەۋدى قاجەت ەتەتىندەرى كۇردەلى جوندەۋدەن وتۋدە. اسىرەسە، سوڭعى جىلدارى ۇلتتىق سپورت تۇرلەرىنە ەرەكشە كوڭىل ءبولىنىپ كەلە جاتقانىن ەرەكشە اتاپ وتكىم كەلەدى. بۇل ءۇردىس ودان ءارى جالعاساتىن بولادى. اتا-بابادان قالعان قارۋدى سپورتتىق ماقساتتا پايدالانىپ، وسى سپورت تۇرىمەن اينالىسقاندارىڭىز ءۇشىن سىزدەرگە العىس ايتامىن. بارلىق قاتىسۋشىلارعا ساتتىلىك پەن جەڭىس جولىندا تاباندىلىق تىلەيمىن، – دەدى ايماق باسشىسى نۇرلان نوعايەۆ.
وبلىستا ءداستۇرلى ساداق اتۋ سپورتىمەن 400-گە جۋىق سپورتشى اينالىسادى. ونىڭ ىشىندە 10-15 سپورتشى رەسپۋبليكالىق جانە حالىقارالىق جارىستاردا وبلىس نامىسىن لايىقتى قورعاپ جۇرگەندەر.
– ءداستۇرلى ساداق اتۋ قازاقستاندا 90-جىلدارى باستالدى. سوڭعى 4-5 جىلدا بۇل سپورت ءتۇرى ۇلتتىق دارەجەگە كوتەرىلدى. بۇگىنگى چەمپيونات ماڭعىستاۋ وبلىسىندا العاش رەت وتۋدە. ءقازىر بۇل سپورتقا مەملەكەت تاراپىنان ۇلكەن كوڭىل بولىنۋدە. بۇل سپورت تۇرىمەن 7 جاستاعى بالا دا، 70 جاستاعى قاريا دا اينالىسا الادى. بۇل سپورت ءالى دە ءوزىنىڭ لايىقتى ورنىن الادى دەپ ويلايمىن. بۇگىنگى جارىسقا ەلىمىزدىڭ كوپتەگەن وبلىستارىنان كىل مىقتىلار كەلدى. ءبىز بۇل سپورتتى الەمدىك دەڭگەيگە شىعارۋعا دايىنبىز، ول ءۇشىن جان-جاقتى قولداۋ بىلدىرەمىز دە. جاقىندا تۇركيادا وتكەن كوشپەندىلەر ويىنىندا ەلىمىزدىڭ ساداقشىلارى ەكىنشى ورىن الدى. بەس ەلدىڭ ىشىندە قازاقستان ەكىنشى ورىن الىپ، 3 التىن، 2 كۇمىس، 3 قولا مەدالمەن ورالدى، – دەيدى ق ر ۇلتتىق سپورت تۇرلەرى قاۋىمداستىعىنىڭ باسشىسى يسلامبەك سالجانوۆ.
جارىس قورىتىندىسى بويىنشا كوماندالىق ەسەپتە 1-ورىندى شىمكەنت قالاسىنىڭ مەرگەندەرى السا، 2-ورىندى اباي وبلىسىنىڭ مەرگەندەرى الدى. ال، 3-ورىن جەتىسۋ وبلىسىنىڭ مەرگەندەرىنە بۇيىردى. سونداي-اق، ءار نىسانا بويىنشا جاس شاماسىنا قاراي ۇزدىك مەرگەندەر انىقتالىپ، ولارعا دا اقشالاي سىياقى تابىستالدى.
اشىق اسپان استىندا وتكەن سپورتتىق شارانى 2500-گە جۋىق كورەرمەن تاماشالادى.
