2025 جىلدىڭ 11 ايىنىڭ قورىتىندىسى بويىنشا الماتى وبلىسى ءوزىنىڭ تاريحىندا العاش رەت مەملەكەتتىك بيۋدجەتكە سالىقتار مەن باسقا دا مىندەتتى تولەمدەر بويىنشا 1 ترلن تەڭگەدەن استام قارجى ءتۇسىردى. بۇل كورسەتكىش 2024 جىلدىڭ سايكەس كەزەڭىمەن سالىستىرعاندا 104،5 ملرد تەڭگەگە نەمەسە 11،4%-عا جوعارى (01.12.2024 ج. جاعدايى بويىنشا – 915،1 ملرد تەڭگە)، دەپ حابارلايدى Dalanews.kz
جەرگىلىكتى بيۋدجەتكە تۇسىمدەردىڭ ايتارلىقتاي ارتقانى بايقالادى: ءوڭىردىڭ مەنشىكتى كىرىستەرى 566،8 ملرد تەڭگەنى قۇراپ، 2024 جىلعى دەڭگەيدەن 98 ملرد تەڭگەگە نەمەسە 20،9%-عا كوپ بولدى (468،9 ملرد تەڭگە).
رەسپۋبليكالىق بيۋدجەتكە تۇسىمدەر 452،8 ملرد تەڭگەنى قۇراپ، وتكەن جىلعى كورسەتكىشتەن 6،6 ملرد تەڭگەگە نەمەسە 1،5%-عا جوعارى بولدى (446،2 ملرد تەڭگە).
ەگەر، 2021 جىلمەن سالىستىرعاندا (سول جىلى تۇسىمدەر كولەمى 663،4 ملرد تەڭگە بولعان)، جالپى ءوسىم 356،2 ملرد تەڭگەنى قۇراپ وتىر، ونىڭ ىشىندە رەسپۋبليكالىق بيۋدجەتكە تۇسىمدەر 106،7 ملرد تەڭگەگە، جەرگىلىكتى بيۋدجەتكە تۇسىمدەر 249،4 ملرد تەڭگەگە ارتقان.
ەسكە سالايىق،
2022 جىل — 780،1 ملرد تەڭگە (رب — 384،0؛ جب— 396،1 ملرد تەڭگە)؛
2023 جىل — 888،6 ملرد تەڭگە (رب — 488،3؛ جب— 400،3 ملرد تەڭگە)؛
2024 جىل — 997،6 ملرد تەڭگە (رب — 477،0؛ جب— 520،5 ملرد تەڭگە).
بۇل وقيعا ءوڭىردىڭ الەۋمەتتىك-ەكونوميكالىق دامۋىنىڭ ماڭىزدى كەزەڭى بولىپ، سالىق بازاسىن كەڭەيتۋ جانە كاسىپكەرلىكتى قولداۋ باعىتىندا قابىلدانىپ جاتقان شارالاردىڭ تيىمدىلىگىن دالەلدەپ وتىر.
