وتىرىس بارىسىندا پرەمەر-مينيستر ب. ساعىنتايەۆ ءماسليحات دەپۋتاتتارىنا باعىتتالعان، وبلىس اكىمىنىڭ لاۋازىمىنا توعجانوۆ ەرالى لۇقپان ۇلىنىڭ كانديداتۋراسىن ۇسىنۋ تۋرالى مەملەكەت باسشىسىنىڭ حاتىن وقىپ بەردى. دەپۋتاتتار پرەزيدەنت ۇسىنعان كانديداتۋرانى ءبىراۋىزدان قولدادى. «مەملەكەت باسشىسىنىڭ جارلىعىمەن ە.ل.توعجانوۆ ماڭعىستاۋ وبلىسىنىڭ اكىمى بولىپ تاعايىندالدى»، – دەپ حابارلادى باقىتجان ساعىنتايەۆ. پرەمەر-مينيستر اليك ايداربايەۆقا جاساعان جۇمىستارى ءۇشىن العىسىن ايتىپ، تابىس تىلەدى. ب.ساعىنتايەۆ جاڭا باسشىلىققا مەملەكەت باسشىسىنىڭ قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا قويىلعان تاپسىرمالاردى جۇزەگە اسىرۋ جانە ءىرى رەفورمالاردى ىسكە اسىرۋ بويىنشا ءبىرقاتار ناقتى تاپسىرمالاردى ايتتى.
ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ سولتۇستىك قازاقستان وبلىسىنداعى جۇمىس ساپارى بارىسىندا وبلىس اكتيۆىمەن كەزدەسىپ، ءوڭىردىڭ جاڭا اكىمى قۇمار ىرگەباي ۇلى اقساقالوۆتى تانىستىردى.
اقساقالوۆ قۇمار ىرگەباي ۇلى 1965 جىلى قوستاناي وبلىسىندا تۋعان. 1987 جىلى ۆ.پ.گورياچكين اتىنداعى ماسكەۋ اۋىل شارۋاشىلىعى ءوندىرىسىنىڭ ينجەنەرلەرى ينستيتۋتىن ءتامامداعان. قوستاناي وبلىسىنىڭ مەڭدىقارا، تاران اۋداندارىنىڭ اكىمى بولعان. 2004-2006 جىلدارى ق ر پرەزيدەنتى اكىمشىلىگىنىڭ مەملەكەتتىك باقىلاۋ جانە ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى، 2006-2010 جىلدارى جامبىل وبلىسى اكىمىنىڭ ورىنباسارى، 2010-2015 جىلدارى «نۇر وتان» پارتياسى ورتالىق اپپاراتىنىڭ باسشىسى، پارتيا حاتشىسى قىزمەتتەرىن اتقارعان.
مەملەكەت باسشىسى مالىك ءمىرزاليندى اقمولا وبلىسىنىڭ اكىمى قىزمەتىنە تاعايىندادى. بۇل تۋرالى اقوردانىڭ باسپا ءسوز قىزمەتى تۆيتتەردە حابارلادى.
مالىك مىرزالين 1971 جىلعى 31 قازاندا اقتوبە قالاسىندا تۋعان. 1996 جىلى رەسەي فەدەراسياسى سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىن بىتىرگەن. 2010 - 2011 جىلدارى ق ر پرەزيدەنتى ءىس باسقارماسىنىڭ اپپارات باسشىسى، ق ر ءدىن ىستەرى اگەنتتىگىنىڭ جاۋاپتى حاتشىسى سىندى جۇمىستاردى اتقارعان.
ق ر پرەزيدەنتى نۇرسۇلتان نازاربايەۆ ەرلان قوشانوۆتى قاراعاندى وبلىسىنىڭ اكىمى قىزمەتىنە تاعايىندادى. بۇل تۋرالى اقوردانىڭ تۋيتتەردەگى پاراقشاسىندا حابارلاندى. ءماسليحاتتىڭ كەزەكتەن تىس سەسسياسىندا دەپۋتاتتار باسىم داۋىسپەن ەرلان قوشانوۆتىڭ كانديداتۋراسىن قولدادى. جاڭا ءوڭىر باسشىسى بۇگىنگى جيىندا اكتيۆكە تانىستىرىلدى. ەرلان جاقان ۇلى 1962 جىلى جەزقازعان وبلىسىنداعى شەت اۋدانىنىڭ اقسۋ-ايۋلى اۋىلىندا تۋعان. جاڭا اكىم ق ر پرەمەر-مينيسترىنىڭ كەڭسەسى باسشىسىنىڭ ورىنباسارى، ۇكىمەتتىڭ پارلامەنت ماجىلىسىندەگى وكىلى، «قازاقستاننىڭ ينۆەستيسيالىق قورى» اق ديرەكتورلار كەڭەسىنىڭ مۇشەسى، «استانا حالىقارالىق اۋەجايى» اق ديرەكتورلار كەڭەسىنىڭ ءتوراعاسى سىندى قىزمەتتەردى اتقارعان.
