جۋىردا جامبىل وبلىسىندا جانتۇرشىكتىرەر وقيعا بولدى. مارقۇمنىڭ تۋىستارىنىڭ سوزىنشە، شۋ قالاسىنداعى ورتالىق اۋرۋحانادا دارىگەرلەر جۇكتى ايەل قايتىس بولعانىن جاسىرىپ، دەنەسىن عيماراتتىڭ جەرتولەسىنە تاستاپ كەتكەن. ونىڭ دەنەسىن بىرنەشە كۇن وتكەن سوڭ جاعىمسىز ءيىس ارقىلى ىزدەپ ءجۇرىپ، كۇيەۋى تاپقان. بۇل جاعدايعا قاتىستى جاڭا دەرەكتەر شىقتى، – دەپ حابارلايدى Dalanews.kz.
وقيعا ناۋرىزدىڭ باسىندا بولعان ەدى. اۋرۋحاناعا 25 جاستاعى جۇكتى كەلىنشەك جوعارى قان قىسىمىمەن جانە تۇسىك قاۋپىمەن تۇسكەن. رەسمي راستالماعان اقپاراتقا سۇيەنسەك، ول بىرنەشە كۇن بويى كومادا بولىپ، جۇرەك-قان تامىرلارى جەتكىلىكسىزدىگىنەن كوز جۇمعان. مارقۇمنىڭ تۋىستارى اۋرۋحانا باسشىلىعى بۇل جاعدايدى ادەيى جاسىرىپ قالۋعا تىرىستى دەپ سانايدى.
Orda.kz مالىمەتىنشە، ايەلدىڭ تۋىستارى اۋرۋحانا عيماراتىنا كەلىپ، تارتىپسىزدىك جاساعان، كادرلاردا ەسىك شىنىسى شاعىلىپ، مەدبيكەلەرگە شابۋىل جاسالعانى بايقالادى.
دەنساۋلىق ساقتاۋ مينيسترلىگى تەرگەۋ باستادى جانە كىنالى قىزمەتكەرلەردى جازالاۋعا ۋادە بەردى.
دەرەككە سۇيەنسەك، اۋرۋحانا ۇجىمى باس دارىگەردى قىزمەتىنەن بوساتۋعا قارسى نارازىلىق ءبىلدىرىپ جاتىر. ولار تەرگەۋ كەزىندە جۇمىستان شەتتەتىلگەن باس دارىگەردى قورعاپ شىققان.
"انانىڭ ولىمىنە سەبەپ بولعان كىنالىلەر سوتتىڭ شەشىمى بويىنشا جازالانادى. ال ءبىز باس دارىگەرىمىز كاسىبي، بىلىكتى باسشى دەپ سانايمىز. وعان شابۋىل جاسالىپ جاتىر، سونىڭ سالدارىنان ءبىز توتەنشە جاعدايلاردا جۇمىس ىستەۋگە ءماجبۇرمىز. ءورت قويۋعا جانە كۇش قولدانۋعا قاتىستى دالەلدەرىمىز بار»، - دەدى دارىگەرلەر بەينە ۇندەۋلەرىندە.
ايتا كەتەيىك، بۇعان دەيىن فەيسبۋكتەگى ءىرى توپتاردىڭ بىرىندە جامبىل تۇرعىندارى وبلىس اكىمى ەربول قاراشوكەيەۆ مەديسينا ماسەلەسىنە كوپ كوڭىل بولمەيتىنىن ايتىپ، نارازىلىق بىلدىرگەن بولاتىن.
"اكىم، قايدا قاراپ وتىر؟ پەرزەنتحانالارعا كامەرا ورناتۋ كەرەك. ايماقتاعى ەلدى-مەكەندەر زاماناۋي تەحنولوگيالاردان جۇردايمىز. مەديسينالىق مەكەمەدەگى احۋال بوسانۋعا ىڭعايلى بولۋعا ءتيىس"، - دەگەن بولاتىن جەلى بەلسەندىلەرى.
ارتىنشا ق ر دەنساۋلىق ساقتاۋ ءمينيسترى اقمارال ءالنازاروۆا جامبىل وبلىسىنىڭ اكىمىمەن كەزدەسىپ، وڭىردەگى پەرزەنتحانالاردىڭ جۇمىس ساپاسىن ارتتىرۋ ماسەلەسىن تالقىلاعان بولاتىن.
الداعى ۋاقىتتا شۋ قالالىق اۋرۋحاناسىنىڭ پەرزەنتحانا بولىمىندەگى جاعدايدى جاقسارتۋ بويىنشا ناقتى شارالار قابىلدانباق.
