Jýyrda Jambyl oblysynda jantúrshiktirer oqiǵa boldy. Marqumnyń týystarynyń sózinshe, Shý qalasyndaǵy ortalyq aýrýhanada dárigerler júkti áiel qaitys bolǵanyn jasyryp, denesin ǵimarattyń jertólesine tastap ketken. Onyń denesin birneshe kún ótken soń jaǵymsyz iis arqyly izdep júrip, kúieýi tapqan. Bul jaǵdaiǵa qatysty jańa derekter shyqty, – dep habarlaidy Dalanews.kz.
Oqiǵa naýryzdyń basynda bolǵan edi. Aýrýhanaǵa 25 jastaǵy júkti kelinshek joǵary qan qysymymen jáne túsik qaýpimen túsken. Resmi rastalmaǵan aqparatqa súiensek, ol birneshe kún boiy komada bolyp, júrek-qan tamyrlary jetkiliksizdiginen kóz jumǵan. Marqumnyń týystary aýrýhana basshylyǵy bul jaǵdaidy ádeii jasyryp qalýǵa tyrysty dep sanaidy.
Orda.kz málimetinshe, áieldiń týystary aýrýhana ǵimaratyna kelip, tártipsizdik jasaǵan, kadrlarda esik shynysy shaǵylyp, medbikelerge shabýyl jasalǵany baiqalady.
Densaýlyq saqtaý ministrligi tergeý bastady jáne kináli qyzmetkerlerdi jazalaýǵa ýáde berdi.
Derekke súiensek, aýrýhana ujymy bas dárigerdi qyzmetinen bosatýǵa qarsy narazylyq bildirip jatyr. Olar tergeý kezinde jumystan shettetilgen bas dárigerdi qorǵap shyqqan.
"Ananyń ólimine sebep bolǵan kináliler sottyń sheshimi boiynsha jazalanady. Al biz bas dárigerimiz kásibi, bilikti basshy dep sanaimyz. Oǵan shabýyl jasalyp jatyr, sonyń saldarynan biz tótenshe jaǵdailarda jumys isteýge májbúrmiz. Órt qoiýǵa jáne kúsh qoldanýǵa qatysty dálelderimiz bar», - dedi dárigerler beine úndeýlerinde.
Aita keteiik, buǵan deiin feisbýktegi iri toptardyń birinde Jambyl turǵyndary oblys ákimi Erbol Qarashókeev meditsina máselesine kóp kóńil bólmeitinin aityp, narazylyq bildirgen bolatyn.
"Ákim, qaida qarap otyr? Perzenthanalarǵa kamera ornatý kerek. Aimaqtaǵy eldi-mekender zamanaýi tehnologiialardan jurdaimyz. Meditsinalyq mekemedegi ahýal bosanýǵa yńǵaily bolýǵa tiis", - degen bolatyn jeli belsendileri.
Artynsha QR Densaýlyq saqtaý ministri Aqmaral Álnazarova Jambyl oblysynyń ákimimen kezdesip, óńirdegi perzenthanalardyń jumys sapasyn arttyrý máselesin talqylaǵan bolatyn.
Aldaǵy ýaqytta Shý qalalyq aýrýhanasynyń perzenthana bólimindegi jaǵdaidy jaqsartý boiynsha naqty sharalar qabyldanbaq.
