– ءدال ءقازىر وبلىستىڭ تۇرعىندارى مەن بيۋدجەتتىك مەكەمەلەر ءتيىستى وتىن قورىمەن تولىق قامتىلعان. بيۋدجەتتىك مەكەمەلەرگە 67،2 مىڭ توننا جانە تۇرعىندارعا قاجەتتى 346،8 مىڭ توننا كومىر تولىق كولەمدە جەتكىزىلگەن. وبلىستىڭ كىشى قالالارىنداعى ورتالىق قازاندىقتار دا ءتيىستى وتىن قورىمەن تولىق قامتىلعان. سونىمەن قاتار، جاڭاتاس قالاسىنا قوسىمشا 500 توننا مازۋت ساتىپ الۋعا وبلىس بيۋدجەتىنەن 22،6 ملن.تەڭگە قارالۋدا جانە «جاڭاتاس-سۋ-جىلۋ» كاسىپورنى تاراپىنان 181 توننا مازۋت ساتىپ الۋ شارالارى جۇرگىزىلۋدە. وبلىسىمىز ساعاتىنا 225 مىڭ مەتر كۋب. گاز تۇتىنۋدا. بارلىق تۇتىنۋشىلارعا، وندىرىستىك جانە كوممۋنالدىق كاسىپورىندارعا تابيعي گاز ۇزدىكسىز جەتكىزىلىپ تۇر. ودان باسقا، وبلىسىمىزدا اقىرتوبە جەر استى گاز ساقتاۋ قويماسىندا 135 ملن. م3 تاۋارلىق گاز قورى جيناقتالعان. سونداي-اق، ەلەكتر ەنەرگياسىن ورتاشا ساعاتتىق تۇتىنۋ 333-335 مۆت قۇرايدى، – دەدى ە. كوشەربايەۆ.
مەملەكەت باسشىسى ن. نازاربايەۆتىڭ بيىلعى قازاقستان حالقىنا ارناعان جولداۋىنا سايكەس، «نۇرلى جول» ينفراقۇرىلىمدى دامىتۋ باعدارلاماسىن جۇزەگە اسىرۋ ءۇشىن جىلۋمەن قامتۋ جۇيەسىن جاقسارتۋ، جىلۋ جەلىلەرىنىڭ توزۋ دەڭگەيىن ازايتۋ جانە قازاندىق جابدىقتارىن جاڭارتۋ جۇمىستارىن جۇرگىزۋ ماقساتىندا وبلىستا 2016-2020 جىلدارعا ارنالعان ارنايى كەشەندى باعدارلاماسى ازىرلەنگەن. باعدارلاماعا سايكەس، بولجاممەن 17،0 ملرد. تەڭگەگە 36،14 شاقىرىم جىلۋ جەلىلەرىن اۋىستىرۋ جوسپارلانعان. ونىڭ ىشىندە 2017 جىلى 9 531،3 ملن. تەڭگەگە تاراز قالاسىنداعى بىرنەشە جىلىتۋ ماگيسترالىن جاڭعىرتۋ بويىنشا ءتيىستى مينيسترلىكتەرگە بيۋدجەتتىك تاپسىرىستار بەرىلدى. سونىمەن قاتار، اتالمىش باعدارلامانىڭ اياسىندا بيىلعى جىلعا تاراز قالاسىنىڭ جىلۋ جەلىلەرىن قايتا جاڭعىرتۋ ءۇشىن سوماسى 47،3 ملن. تەنگەگە 4 جوبا ازىرلەنۋدە.
جوسپارلانعان ءىس-شارالاردى جۇزەگە اسىرۋ ناتيجەسىندە جىلۋ شىعىندارى نورماتيۆتىك دەنگەيگە جەتەدى، جىلۋ جەلىلەرىنىڭ توزىعى 69،1%-دان 48،2% دەيىن نەمەسە 21%-عا ازايادى دەپ كۇتىلۋدە.
سونىمەن بىرگە، 2017 جىلى 280،3 ملن. تەڭگەگە شۋ قالاسىنىڭ ورتالىق قازاندىعىن گازعا اۋىستىرۋ جوباسى دا ىسكە اسىرىلماق. سونداي-اق، قوسىمشا سۋ ىسىتقىش قازان ورناتۋ ارقىلى تاراز قالاسىنداعى رك-4 اۋداندىق قازاندىعىنىڭ جىلۋ قۋاتىن ۇلعايتۋعا قۇنى 1 362،0 ملن. تەنگەگە وتپەلى جوبا ىسكە اسىرىلماق.
گاز تاسىمالداۋ جۇيەسىن دامىتۋ باعدارلاماسىنا سايكەس، 2017 جىلى 1 587،130 ملن.تەڭگەگە 2 جوبانىڭ قۇرىلىسى جانە 7 جوبالىق-سمەتالىق قۇجاتتاما ازىرلەۋگە قاراجات قارالىپ، جۇمىستار جۇرگىزىلمەك. ال، «وبلىستىق بيۋدجەتتەرگە، استانا جانە الماتى قالالارىنىڭ بيۋدجەتتەرىنە جىلۋ ەنەرگەتيكالىق جۇيەسىن دامىتۋعا ارنالعان نىسانالى ترانسفەرتتەرى» بيۋدجەتتىك باعدارلاماسى بويىنشا رەسپۋبليكالىق بيۋدجەتتەن 4 جوبانى ىسكە اسىرۋعا 2 857،1 ملن.تەڭگەگە بيۋدجەتتىك وتىنىمدەر وتكىزىلدى.
جامبىل وبلىس اكىمىنىڭ باسپا ءسوز قىزمەتى
