جامبىل وبلىسىنداعى اۋىلداردىڭ بىرىندە 16،8 ميلليون تەڭگەگە تىكەلەي كەلىسىمشارت جاسالعان، دەپ حابارلايدى Dalanews.kz.
Goszakupturaly ارناسى اتالعان كەلىسىمشارتتىڭ كۇماندى تۇستارىنا نازار اۋداردى.
“كەلىسىمنىڭ قىسقاشا سيپاتتاماسىندا اۆتوبۋس ايالداماسى مەن قوقىس جاشىگى ساتىپ الىناتىنى عانا كورسەتىلگەن. الايدا ساتىپ الۋدىڭ تەحنيكالىق سيپاتتاماسى مۇلدە جوق، تەك سمەتا تىركەلگەن”، - دەيدى دەرەككوز.
ءبىراق سمەتاداعى سانداردىڭ ءوزى كەلىسىمشارتتاعى جالپى سومامەن دە، ساتىپ الۋ نىسانىمەن دە سايكەس كەلمەيدى.
“ماسەلەن، اۆتوبۋس ايالداماسىن جاساۋ ءۇشىن 456 شارشى مەتر پروفليست قاجەت دەپ كورسەتىلگەن. ال كادىمگى ايالدامانىڭ اۋماعى شامامەن 6 شارشى مەتر عانا.
ەندى قيالداپ كورەيىك: ايالدامانى تولىقتاي پروفليستپەن اينالدىرا قاپتاپ، ونى ەكى قابات ەتىپ جاساسا دا، ەڭ كوپ دەگەندە 60 شارشى مەتر شاماسىندا عانا ماتەريال قاجەت بولار ەدى. سوندا قالعان 400 شارشى مەتر پروفليست نە ءۇشىن كەرەك؟”، - دەپ قوستى دەرەككوز.
سونىمەن قاتار ساتىپ الۋدا كترۋ كودى دا قاتە كورسەتىلگەن. مەتاللوكونسترۋكسيا دايىنداۋدىڭ ورنىنا ەسىك نەمەسە قاقپا جاساۋ قىزمەتى جازىلىپ كەتكەن.
دەگەنمەن بۇل تىكەلەي كەلىسىمشارتتاعى ەڭ ۇلكەن ماسەلە ەمەس. ەڭ كۇماندى تۇسى - ءبىر عانا اۆتوبۋس ايالداماسىنا 16،8 ميلليون تەڭگە ءبولىنۋى.
“ۇلكەن قالالارمەن سالىستىرماي-اق، ۇقساس ەلدى مەكەندەردەگى وسىنداي جوبالارعا نازار اۋدارايىق. ماسەلەن، بيىل ناۋرىز ايىندا نۇرا اۋىلىندا ءدال وسىنداي ايالدامالار كونكۋرس ارقىلى ساتىپ الىنعان. بايقاۋعا ءۇش كومپانيا قاتىسىپ، ناتيجەسىندە 4،3 ميلليون تەڭگەگە 14 ايالداما ورناتىلعان”، - دەپ تولىقتىردى ارنا.
ياعني، ءبىر ايالدامانىڭ قۇنى بۇل جەردە شامامەن بىرنەشە ەسە عانا ەمەس، ونداعان ەسە ارزان. جالپى ايىرماشىلىقتى ەسەپتەسەك، شامامەن 50 ەسەگە دەيىن جەتەدى.
“مۇنداي ايىرماشىلىق قاعاز جۇزىندە دە سەنىمسىز كورىنەدى. باعانى قانشا جەردەن نەگىزسىز كوتەرسە دە، مۇنداي الشاقتىق اقىلعا سىيمايدى.
سوندىقتان بۇل جەردە نە ءبىر ەمەس، بىرنەشە ايالداما ساتىپ الىنعان بولۋى مۇمكىن، نە بولماسا ءبىر اۆتوبۋسقا ارنالعان قاراپايىم ايالداما ەمەس، اۆتوبۋستار توقتايتىن ۇلكەن كەشەن - شاعىن اۆتوۆوكزال سەكىلدى نىسان قاراستىرىلعان شىعار”، - دەيدى Goszakupturaly دەرەككوزى.
الايدا مۇنى ناقتى ءبىلۋ مۇمكىن ەمەس. سەبەبى ساتىپ الۋ قۇجاتتارىندا ەشقانداي ناقتى اقپارات بەرىلمەگەن. تىركەلگەن سمەتا دا قيسىنسىز ساندارعا تولى تەك فورمالدى سيپاتتا جازىلعان.
