ءىس-ساپار بارىسىندا ايماق باسشىسى گيليان پروۆينسياسسىنىڭ م.نادجافيمەن كەزدەسىپ، وڭىرلەر اراسىنداعى ونەركاسىپ، اۋىل شارۋاشىلىعى، ساۋدا-ەكونوميكالىق، رۋحاني-مادەني بايلانىستاردى نىعايتۋ بويىنشا اڭگىمەلەستى. سونداي-اق، باسقوسۋدا كاسىپكەرلىك، ساۋدا-ساتتىق، اۋىل شارۋاشىلىعى سالالارىن قامتيتىن ەكىجاقتى ارىپتەستىك جونىندەگى مەموراندۋمعا قول قويىلدى.
ءۇش كۇندىك جۇمىس ساپارى كەزىندە جامبىلدىق دەلەگاسيا ءراشت قالاسىنداعى ءشاھيد ءانساري اتىنداعى كاسىپتىك-تەحنيكالىق وقۋورتالىعى مەن ءانزالي ەركىن ساۋدا-ونەر كاسىپايماعى مەن ايلاعىنىڭ جۇمىسىمەن تانىسىپ، سونداي-اق، ۋىلدىرىقتى بالىق ينستيتۋتىنىڭ جۇمىسىن كوزبەن كوردى.
جالپى ەكونوميكالىق تالداۋ كورسەتكەندەي، جامبىل وبلىسىنىڭ يران يسلام رەسپۋبليكاسىمەن تاۋار اينالىمى 2016 جىلى 919 مىڭ اقش دوللارىن قۇراپ، 2015 جىلمەن سالىستىرعاندا 7 ەسەدەن استام ۇلعايدى. ال، ونىڭ ىشىندە اۋىل شارۋاشىلىعى ونىمدەرىنىڭ تاۋار اينالىمى 802،5 مىڭ اقش دوللارىنا جەتتى، ەكسپورت كولەمى 780،7 مىڭ اقش دوللارىن، يمپورت 21،8 مىڭ اقش دوللارىن قۇرادى.
نەگىزى جامبىل وبلىسى ارقىلى يرانعا پياز، كەپتىرىلگەن جاسىمىق پەن بيداي ەكسپورتتالسا، اۋليەاتاعا يراننان قۇرما، قۇرىلىستا پايدالاناتىن زاتتار، رەزەڭكە بۇيىمدارى، توقىما ماتەريالدارى، شىنى ىدىستار، قارا مەتاللدان ازىرلەنگەن بۇيىمدار، رادياتورلار، ەلەكترشامدار جانە باسقا حالىق تۇتىناتىن تاۋارلار يمپورتتالعان.
يران يسلام رەسپۋبليكاسىنىڭ گيليان پروۆينسياسىنا جۇمىس ساپارىمەن بارعان دەلەگاسيا قۇرامىندا وبلىس اكىمىنىڭ ورىنباسارى، اۋدان اكىمدەرى، باسقارما، جوعارى وقۋ ورنى مەن ءبىرقاتار ءىرى، ورتا كاسىپورىندار، شارۋا قوجالىقتاردىڭ باسشىلارى جانە ىسكەر ايەلدەر قاۋىمداستىعىنىڭ وكىلدەرى بار.
