سوت ورىنداۋشىسى تەپكەننەن كەيىن ءۇيدىڭ يەسى اشۋعا بۋلىعىپ، ونىڭ بۇيىرىنەن ۇرىپ قۇلاتقان. «ءجابىر كوردىم» دەگەن ءادىل ەرمەكوۆ كاسىپقوي بوكسشى جانقوش تۇراروۆ كەلىپ قوقان-لوققى كورسەتكەنىن دە ايتۋدا. الايدا بىلعارى قولعاپ شەبەرى «ەشكىمدى قورقىتپادىم» دەپ وتىر.
توبەلەس تاۋ بوكتەرىندە ورنالاسقان «دزەرجينسكيي» ساياجايىناد ورىن العان. سوت ورىنداۋشىلار مەن پوليسيا قىزمەتكەرلەرى ءۇي زاڭسىز سالىنعان ايتىپ، ونى بۇزۋعا كەلىپتى. الايدا ءۇيىن كەڭەيتكەن قوجايىن سوت شەشىمىمەن كەلىسپەگەن. باسپاناسىن سۇرۋگە قارسى بولعان ازامات جويقىن سوققىسىمەن سوت ورىنداۋشىسىنىڭ بۇيىرىنەن ۇرىپ قۇلاتتى. بۇل كادرلەر الەمجەلىدە قىزۋ تالقىعا ءتۇستى.
جانجالدى سىرتتاي باقىلاپ تۇرعان كورشىلەر سوت ورىنداۋشى توبەلەستى ءوزى باستاپ، ءبىرىنشى بولىپ ءۇيدىڭ يەسىن اياعىمەن تەپكەنىن «انىق كوردىك» دەپ وتىر.،
– سوت ورىنداۋشىسى ءۇيدىڭ يەسىن اياعىمەن تەپتى. مەن ونى ءوز كوزىممەن كوردىم. ءبىراق ول ۆيدەو ەش جەردە جوق. ال توبەلەستىڭ جالعاسى الەۋمەتتىك جەلىدە ءجۇر. سوت ورىنداۋشىسىنىڭ ءوزى كىنالى. ويتكەنى ول ءۇيدىڭ قوجايىنىن اشۋلاندىرىپ، ونى سوققى جاساۋعا يتەرمەلەدى، – الماتى قالاسىنىڭ تۇرعىنى الەكساندرا برەلوۆا.
ال داۋدىڭ باسى ۇيگە جاپسارلاس سالىنعان بولمەلەردەن باستالعان. باسپانا يەسى بىرنەشە شارشى مەتر جالعاپ ءۇيىن كەڭەيتپەك بولىپتى. الايدا بۇل قۇرىلىسقا ۇزىلدى-كەسىلدى قارسى بولعان كورشىسى تيمۋر ساعىندىقوۆ سوتقا جۇگىنىپ جەڭىپ شىققان.
ونىڭ ايتۋىنشا، قوسالقى بولمەلەر قۇلاۋدىڭ الدىندا تۇر.
– مەن الدىمەن ءتيىستى مامانداردى شاقىرتتىم. ولار ماعان مىنا قۇرىلىس وتە ءقاۋىپتى ەكەنىن ايتتى. سوسىن جاڭبىرلى كۇندەرى كورشى ۇيدەن سۋ اعىپ، اتالعان ءۇيدىڭ ىرگەتاسى جارىلا باستادى. وتباسىمىزبەن قورىقتىق. سوسىن سوتقا جۇگىنۋگە تۋرا كەلدى. سوت جاپسارلاس سالىنعان بۇل نىساندى زاڭسىز دەپ تاپتى. تيىسىنشە، ونى ءسۇرۋ تۋرالى شەشىم قابىلدادى، – دەيدى تيمۋر ساعىندىقوۆ.
سوت ۇكىمىن ورىنداۋعا كەلگەن ءادىل ەرمەكوۆ اقىرى تاياق جەپ تىنعان. ول مىندەتىن اتقارۋعا ءۇيدىڭ قوجايىنى كەدەرگى كەلتىرىپ كۇش كورسەتكەنىن ايتادى. ءتىپتى تانىمال بوكسشى جانقوش تۇراروۆ باستاعان سپورتشىلار كەلىپ، ماعان قوقان-لوققى كورسەتكەنىن ايتىپ شاعىمدانعان.
ءادىل ەرمەكوۆ وقيعا ورنىندا بولعان پوليسيا قىزمەتكەرلەرى كومەك كورسەتۋدىڭ ورنىنا، الدى-ارتىنا قاراماي تايىپ تۇرعان ايتىپ، ءوزى ءۇي يەسىن اياقپەن تەپكەنىن جوققا شىعاردى.
– ءبىز ءۇي يەسىمەن ءبىر اي بويى سويلەستىك. ەسكەرتتىك. ءبىراق ول كونبەدى. سوسىن سوت ۇكىمىنە سايكەس جاپسارلاس سالىنعان نىساندى بۇزۋعا كەلدىك. سول ۋاقىتتا ءۇيدىڭ قوجايىنى مەنى ۇرىپ قۇلاتتى. جانىمدا تۇرعان پوليسيا قىزمەتكەرلەرىن تاپپاي قالدىم. ولار قاشىپ كەتتى. كوپ ۇزاماي جانقوش تۇراروۆ مەن سپورتشىلار كەلىپ ءبىزدى قورقىتا باستادى. ال مەن سىپايى سويلەسىپ، ەشكىمدى تەپكەن جوقپىن، – دەيدى سوت ورىنداۋشى ءادىل ەرمەكوۆ.
بوكستان الەم چەمپيونى جانقوش تۇراروۆ اپكەسىنىڭ شاقىرتۋىمەن سول ۇيگە بارعانىن ايتادى. بىلعارى قولعاپ شەبەرى ەشكىمدى «قورقىتىپ-ۇركىتكەن جوقپىن» دەپ وتىر. ول بار بولعانى ورتاق مامىلەگە كەلە الماعان تاراپتاردى سابىرعا شاقىرعانىن ايتتى.
– مەن، كەرىسىنشە، ول كىسىگە «باۋىرىڭىز قالاي، قاراتىپ الىڭىز» دەپ ايتتىم. مەنىڭ ءسوزىمدى نەگە ولاي بۇرمالاعانىن تۇسىنبەدىم. ولار قورشاۋدى بۇزايىن دەپ جاتتى. مەن «نە ىستەپ جاتىرسىڭدار، توقتاتىڭدار» دەپ ايتتىم. ولار توقتادى. سوسىن مەن كەتىپ قالدىم، – دەدى كاسىپقوي بوكسشى جانقوش تۇراروۆ.
ءقازىر اتالعان جانجالعا قاتىستى قىلمىستىق ءىس قوزعالىپ، ءتيىستى ساراپتاما تاعايىندالدى. ءتارتىپ ساقشىلارىنىڭ دا ارەكەتى تەكسەرىلۋدە. بالكىم ولار اقبۇلاقتاعى اتىستان كەيىن ءومىرىن قاتەرگە تىككىسى كەلمەگەن بولۋى مۇمكىن. ەكى اپتا بۇرىن ءدال وسىلاي سوت شەشىمىن ورىنداۋعا بارعان بەس بىردەي ادامدى ءۇيدىڭ قوجايىنى اڭشى مىلتىعىمەن اتىپ تاستاعان ەدى.
سىمبات عالىمبەك ۇلى
