Saryopan Operating زاۋىتى ونىمدەرىنىڭ نەگىزگى تۇتىنۋشىسىنىڭ ءبىرى بۇرىنعى ارسەلورميتتال تەمىرتاۋ (امت)، قازىرگى QarMet بولۋى كەرەك بولعان. 2019 جىلى مەملەكەتتىك ورگاندار مەن امت اراسىندا 2024 جىلعا قاراي ەميسسيا كولەمىن 30 پايىزعا قىسقارتۋ تۋرالى مەموراندۋم جاسالعان ەدى. ءدال سول جىلى Saryopan Operating، سarmeuse Group جانە امت اراسىندا تاعى ءبىر مەموراندۋمعا قول قويىلدى. امت-داعى اك شىعاراتىن بولىمشە جابىلىپ، ونىڭ ءونىمى جاڭا زاۋىتتىڭ ونىمىنە اۋىستىرىلادى دەپ جوسپارلانعان.
جالپى العاندا زاۋىتتىڭ اشىلعانى ايماققا دا، ەلگە دە ماڭىزدى بولعان. ولاي دەيتىنىمىز، زاۋىت ىسكە قوسىلسا، جاڭا جۇمىس ورىندارى اشىلىپ، ينفراقۇرىلىمنىڭ دامۋىنا جول اشاتىنى بەلگىلى. ءارى اك وزىمىزدەن شىقسا، يمپورت قۇنى دا تولىقتاي تۇسەر ەدى. ودان قالا بەردى ەلىمىزدىڭ ەڭ قاتتى لاستانعان ايماقتارىنىڭ بىرىندە اشىلسا، بۇل زاۋىت سول جەردىڭ ەكولوگيالىق احۋالىن جاقسارتادى دەپ كۇتىلگەن.
جوسپاردى ىسكە اسىرۋ ءۇشىن RBK بانكىنەن 16،6 ملرد تەڭگە قارىز الىنعان. «قاراپايىم زاتتار ەكونوميكاسى» مەملەكەتتىك باعدارلاماسى اياسىندا قارجىلاندىرىلعانىن دا اتاپ ءوتۋ كەرەك. تەمىرجول جولىن ساتىپ، ەلەكتر جەلىسىن تارتۋعا «بيزنەستىڭ جول كارتاسى-2025» جوباسى شەڭبەرىندە 3 ملرد تەڭگە بولىنگەن. وسىلايشا جوباعا جالپى 30 ملرد تەڭگە ينۆەستيسيا سالىنعان.
سونداي جاعىمدى وزگەرىس كۇتتىرگەن باستاما ءقازىر توقتاڭقىراپ تۇر. امت اكسيونەرلەرى اۋىسقان سوڭ كومپانياسىنىڭ پوزيسياسى دا وزگەردى. جاڭا باسشىلىق بۇرىنعى مىندەتتەمەلەر مەن شەتەلدىك ينۆەستورلار مەن مەملەكەتتىك ورگاندارمەن جاساسقان كەلىسسوزدەردى ورىنداۋدان باس تارتاپ وتىر. بۇدان ءبىز شەشىم قابىلداۋعا كەلگەندە ساباقتاستىق جوق ەكەنىن كورىپ وتىرمىز. سونىمەن بىرگە ينۆەستيسيا تارتۋ سياقتى ماڭىزدى دۇنيەگە كەلگەندە مۇنداي پوزيسيا ۇستانۋ ارقىلى بەدەلگە اجەپتاۋىر نۇسقان كەلۋى مۇمكىن. قالاي دەسەك تە، شەتەلدەن ينۆەستور تارتىپ، ەل ءيميدجىن جاقسارتۋعا سونشا كۇش سالىنعانى بار.
