وسى ورايدا، بەتون، پليتكا، پلاستماسسا بۇيىمدارىن وندىرەتىن «اركاز ينۆەست» جاۋاپكەرلىگى شەكتەۋلى سەرىكتەستىگى وسى باستاماعا قولداۋ ءبىلدىرىپ، 3000 قوراپ ازىق-تۇلىكتى اۋدان ورتالىعى ەنەرگەتيك وكرۋگىنەن باستاپ بايسەركە، جەتىگەن، قاراوي، اششىبۇلاق، مەجدۋرەچەنسك، كازسيك، چاپاي، كۇرتى، بورالداي وكرۋگتەرىندەگى ءار اتاۋلى وتباسىلارعا تاراتۋدى باستادى.
بۇگىنگى كۇنى بورالداي كەنتى، اششىبۇلاق، كازسيك، مەجدۋرەچەنسك اۋىلدارىنىڭ وتباسىلارىنا ۇلەستىرىلدى. الداعى ۋاقىتتا قالعان اۋماقتاردى قامتۋ نيەت بار. وسى ازىق تۇلىكتى حالىقتىڭ الەۋمەتتىك ءالسىز توبىنا تاراتۋ جۇمىستارىنا اۋداندىق جاستار رەسۋرستىق ورتالىعى مەن توعىز وكرۋگتىڭ ەرىكتىلەرى اتسالىستى.
ەلوردامىز نۇر-سۇلتان مەن الماتى شاھارلارىنا جاريالانعان كارانتينمەن قاتار كوروناۆيرۋستان سەكەم العان بارشا جۇرتقا دەمەۋ بولاتىنداردىڭ ءبىرى جەرگىلىكتى اتقارۋشى بيلىك دەسەك، ارتىق ايتقاندىق ەمەس. «تاس تۇسكەن جەرىنە اۋىر» دەمەكشى، كۇش ەل باسقارىپ وتىرعان ازاماتتارعا تۇسەتىنى بەسەنەدەن بەلگىلى.
ەل باسىنا كۇن تۋعان ساتتە ۇكىمەت ادامدارىنىڭ ءبىر جاعىنا بولىسىپ، كاسىپكەر ازاماتتارىمىز دا شەت قالماي، قول ۇشىن بەرىپ، قامقورلىق تانىتقانىنا اۋدان تۇرعىندارى ءدان ريزا بولىپ، العىستارىن جاۋدىرۋدا.
ويتكەنى، الماتى قالاسىنا كارانتين جاريالانعان ساتتە از قامتىلعان وتباسىلاردىڭ كوبىسى ازىق-تۇلىك الۋعا شامالارى كەلمەگەنى ايدان انىق.
الەۋمەتتىك كومەك الۋشىلاردىڭ ءبىرى، اششىبۇلاق اۋىلدىق وكرۋگىنىڭ تۇرعىنى گۋلميرا جاقىپوۆا: «مەنىڭ وتباسىمدا جولداسىممەن بىرگە ءۇش بالام جانە قايىن اتام، باۋىرلارىم تۇرادى. ءبىر شاڭىراقتا جەتى ادامبىز. مىنا قىسىلتاياڭ ۋاقىتتا سىزدەردىڭ تاراپتارىڭىزدان بەرىلگەن ازىق-تۇلىك جانۇياما ۇلكەن كومەك. قارجى تاپشىلىعىنان ۋاقىتىندا ۇن-مايىمىزدى الا الماي، ابدىراپ قالىپ ەدىك.
ەندى مىنە، وسى ازىقپەن بالا-شاعاما كەم دەگەندە ءبىر اپتا ىستىق تاماق ازىرلەيتىنىم انىق.
وسىنداي كۇن تۋعان ساتتە كوڭىل ءبولىپ، قالىمىزدى سۇراپ، ەسكەرىپ جاتقان اۋدان باسشىلارىنا شىنايى العىسىمدى ايتامىن»، - دەپ اعىنان جارىلدى.
وسى وكرۋگتەن الەۋمەتتىك جاعدايى تومەن ە. مىسەكەيەۆتەر مەن ت. ەرمەكوۆالاردىڭ وتباسىلارىنا دا وزدەرىنە تيەسىلى كومەك ەرىكتىلەر قولىمەن تابىستالدى.
وسى اكسيا اياسىندا اۋداندىق مادەنيەت قىزمەتكەرلەرىنىڭ باستاۋىمەن 500 دانا كوپقولدانبالى بەتپەردە تىگىلىپ، ازىق-تۇلىكپەن بىرگە وتباسىلارعا تاراتىلىپ، كوروناۆيرۋستان قالاي قورعانۋ كەرەكتىگى جايلى، تازالىقتى قاتاڭ ساقتاپ، ۇيدە بولۋلارىن، قوعامدىق ورىندارعا ۋاقىتشا جولاماۋ كەرەكتىگى ناقتى قاداپ ەسكەرتىلىپ، ۇگىت-ناسيحات جۇرگىزىلدى.
بەتپەردەمەن جانە ازىق-تۇلىكپەن قامتىلعاندار قاتارىندا كازسيك اۋىلدىق وكرۋگىنىڭ تۇرعىنى دينارا كەنجەبايەۆا دا بار. دينارانىڭ جولداسى دەنساۋلىعىنا بايلانىستى اۋىر جۇمىسقا جارامايدى ەكەن. وزدەرىنىڭ ورتاق ەكى بالاسى بار. ءوزى دە جۇمىسسىز. ۇكىمەت تاراپىنان بەرىلەتىن اتاۋلى الەۋمەتتىك كومەكتىڭ قارجىسىمەن كۇن كورۋدە. دينارا كەنجەبايەۆا: «مىنا كارانتين ءبىزدىڭ وتباسىمىزعا ۇلكەن كەسىرىن تيگىزىپ وتىرعانىن جاسىرا المايمىن. راسىندا دا كومەككە مۇقتاجبىز. سىزدەردىڭ بەرگەن كومەكتەرىڭىزگە جانە وسىنى ۇيىمداستىرىپ وتىرعان اۋدان باسىشىسىنا، كاسىپكەر ازاماتتارعا العىستان باسقا ايتارىم جوق. ەلىمىز تىنىش، ەل باسقارعان ازاماتتار امان بولسىن دەگىم كەلەدى»، - دەدى.
الداعى ۋاقىتتا دا اۋدان كولەمىندەگى حالىقتىڭ الەۋمەتتىك ءالسىز توبىنا اكسيانىڭ جالعاسى رەتىندە اۋداندىق اكىمشىلىك تاراپىنان جانە جەرگىلىكتى كاسىپكەرلەردەن دە بەرىلەتىن گۋمانيتارلىق كومەكتەر جالعاسىن تاباتىن بولادى.
ماسەلەن، ازداعان ۋاقىتتا وسى كومەكتەن بولەك قوسىمشا 3000 گيگيەنالىق جانە جەكە قولودانىسقا ارنالعان زاتتاردى ۇلەستىرۋ جوسپارى بار.
بىرلىگىمىز قوعامدى الاڭداتىپ وتىرعان ىندەتتىڭ الدىن الۋعا جانە ءبىرجولا الاستاتۋىنا ناقتى كەپىل بولا الادى دەپ سەنەمىز.
