ءىىو-دا قىزمەت ەتكەن زەينەتكەرلەرگە ۇندەۋ جاسالدى

قاراكوز امانتاي 07 ناۋ. 2024 09:30 2115

پوليسيا ۆەدومستۆوسىندا ىشكى ىستەر ورگاندارى زەينەتكەرلەرىنە ۇندەۋ جاسالدى، دەپ حابارلايدى Dalanews.kz.

"قۇرمەتتى زەينەتكەرلەر! بۇگىنگى تاڭدا بازالىق زەينەتاقى تاعايىنداۋدى قايتا باستاۋ، 1998 جىلدان كەيىن قىزمەتكە قابىلدانعان جانە 2016 جىلعا دەيىن قىزمەتتەن بوساتىلعان زەينەتكەرلەردىڭ زەينەتاقىسىن يندەكستەۋ، زەينەتاقى جيناعىن الۋ سياقتى ماڭىزدى الەۋمەتتىك ماسەلەلەر بار ەكەنىن بىلەمىز. بۇل ماسەلەلەر تولىق زەردەلەۋدى قاجەت ەتەدى. مۇنىمەن ارنايى جۇمىس توبى اينالىسۋدا. وعان ىشكى ىستەر مينيسترلىگىنىڭ وكىلدەرى دە كىرەدى. بۇل سۇراقتار بيۋدجەتتىڭ مۇمكىندىكتەرىن ەسكەرە وتىرىپ، جوسپارلى جانە تۇراقتى نەگىزدە شەشىلۋدە"، – دەدى ءىىم قارجىمەن قامتاماسىز ەتۋ دەپارتامەنتىنىڭ باستىعى رۇستەم تۇرسىنبايەۆ.

ماسەلەن، بىلتىر شىلدە ايىنان باستاپ بارلىق زەينەتاقى جيناعىن تۇرعىن ءۇي جاعدايىن جاقسارتۋ جانە ەم الۋ ءۇشىن شەشىپ الۋعا مۇمكىندىك بەرىلدى. زەينەتكەرلەردىڭ نەگىزگى بولىگى وسى قۇقىقتارىن پايدالانىپ ۇلگەردى. قازىرگى ۋاقىتتا ەڭبەك جانە حالىقتى الەۋمەتتىك قورعاۋ مينيسترلىگى 1998 جىلدان كەيىن قىزمەتكە قابىلدانعان جانە 2016 جىلعا دەيىن قىزمەتتەن بوساتىلعان زەينەتكەرلەردىڭ زەينەتاقىسىن يندەكستەۋدىڭ قۇقىقتىق ماسەلەسىن پىسىقتاۋدا. بۇل زاڭ جوباسىن بيىل 26 اقپاندا رەسپۋبليكالىق بيۋدجەت كوميسسياسى ماقۇلدادى. سىزدەر كوتەرىپ وتىرعان بازالىق زەينەتاقى ماسەلەسى دە شەشىلۋدە.

"ەڭبەك جانە حالىقتى الەۋمەتتىك قورعاۋ مينيسترلىگى 2016 جىلعا دەيىن جانە ودان كەيىن قىزمەتتەن بوساتىلعان زەينەتكەرلەردىڭ زەينەتاقىسىنداعى ديسبالانستى جويۋ ءۇشىن ءتۇرلى تاسىلدەردى قاراستىرۋدا. ىشكى ىستەر مينيسترلىگى ءوز تاراپىنان بارلىق قاجەتتى ەسەپتەردى ۇسىنىپ وتىر. ءىىم ءوزىنىڭ زەينەتكەرلەرىنە قۇرمەتپەن قارايتىنىن جانە ولاردىڭ الەۋمەتتىك جاعدايىن جاقسارتۋعا بەلسەندى قاتىساتىنىن اتاپ ءوتۋ قاجەت"، – دەدى ءىىم قارجىمەن قامتاماسىز ەتۋ دەپارتامەنتىنىڭ باستىعى رۇستەم تۇرسىنبايەۆ.


ۇسىنىلعان
سوڭعى جاڭالىقتار
x