ىشكى ىستەر مينيسترلىگى بارشا اتا-اناعا ۇندەۋ جاسادى، دەپ حابارلايدى Dalanews.kz.
“قۇرمەتتى اتا-انالار! وسى جىلدىڭ سەگىز ايىندا پوليسيا ەسىرتكى تاراتۋعا قاتىسقانى ءۇشىن 30 كامەلەتكە تولماعان بالانى ۇستادى. ەسىرتكى جاسىرۋمەن اينالىساتىن 14 جاستاعى جاسوسپىرىمدەر دە كەزدەسەدى. ولار ەسىرتكى قىلمىسىنىڭ جەكەلەگەن تۇرلەرى بويىنشا ەرەسەكتەرمەن بىردەي قىلمىستىق جاۋاپكەرشىلىككە تارتىلادى. پوليسيا قىزمەتكەرلەرى بارلىق وقۋ ورىندارىندا قۇقىقتىق ءتۇسىندىرۋ جۇمىستارىن جۇرگىزەدى. جىل باسىنان بەرى 725 مىڭ ادامدى قامتيتىن 9738 ءتۇرلى پروفيلاكتيكالىق ءىس-شارا وتكىزىلدى.
باستى نازاردا جوعارى سىنىپ وقۋشىلارى جانە اتا-انالارىنان جىراقتا تاۋەلسىز ءومىردى باستاعان 1-2 كۋرس ستۋدەنتتەرى. پوليسيا كوبىنە بولىپ قويعان فاكتىلەرمەن جۇمىس جاسايدى. ال ۇستالعان جاسوسپىرىمدەر ءۇشىن قۇقىقتىق سالدار تۋىندايدى. وسىعان بايلانىستى ءبىز سىزدەردى بالالارىڭىزبەن ولاردىڭ بارلىق ارەكەتتەرىنىڭ قۇقىقتىق سالدارى تۋرالى سويلەسۋگە شاقىرامىز. جاسوسپىرىمدەردىڭ ومىرىنە بارىنشا قاتىسىڭىز. ەگەر ولار زاڭسىز ارەكەتكە تارتىلسا، سىزگە ايتۋدان قورىقپاۋى كەرەك”، - دەلىنگەن ۇندەۋدە.
بالالارىڭىزدىڭ ورتاسىن ءبىلىپ، ولار پايدالاناتىن ينتەرنەت-رەسۋرستاردى باقىلاۋىڭىز قاجەت.
“ءجاسوسپىرىمنىڭ زاتتارىنداعى كەز كەلگەن دارى-دارمەك قاپتامالارىنا، فولگاعا، شىنى تۇتىكتەرگە، تامشۋىرلارعا نازار اۋدارىڭىز. مۇنىڭ ءبارى سينتەتيكالىق ەسىرتكىنى قولدانۋعا ارنالعان قۇرال بولا الادى. ەگەر ءجاسوسپىرىمنىڭ ۇلگەرىمى كۇرت تومەندەپ، ساباققا بارماۋى ارتىپ، قارىم-قاتىناس اينالاسى وزگەرسە، بۇل اتا-انالاردىڭ كۇدىگىن تۋعىزۋى ءتيىس. ەسىرتكىنى قولدانۋدىڭ جاناما بەلگىلەرى كوڭىل-كۇيدىڭ ءجيى وزگەرۋى، اشۋلانشاقتىق، اپاتيا بولۋى مۇمكىن.
ءجاسوسپىرىمنىڭ ەسىرتكى تاراتۋمەن اينالىساتىنىنىڭ تاعى ءبىر بەلگىسى – كوپ اقشا، قىمبات زاتتاردى ساتىپ الۋى. ەگەر بالانىڭ تەلەفونىندا، مەسسەندجەرلەردە گەولوكاسيالارى بار بەلگىلەر، ەسىرتكى جاسىرىلعان جەرلەردىڭ فوتوسۋرەتتەرى، ءۇي قابىرعالارىندا، ستەندتەرىندەگى باسقا دا جازبالار بولسا، بۇل دا كۇدىك تۋعىزۋى كەرەك. ەستەرىڭىزگە سالا كەتەيىك، ەسىرتكى قىلمىستارى ءۇشىن قىلمىستىق جاۋاپكەرشىلىك 16 جاستان، ال قىلمىستاردىڭ جەكەلەگەن قۇرامى بويىنشا 14 جاستان باستالادى”، – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.
