Ishki ister ministrligi barsha ata-anaǵa úndeý jasady, dep habarlaidy Dalanews.kz.
“Qurmetti ata-analar! Osy jyldyń segiz aiynda politsiia esirtki taratýǵa qatysqany úshin 30 kámeletke tolmaǵan balany ustady. Esirtki jasyrýmen ainalysatyn 14 jastaǵy jasóspirimder de kezdesedi. Olar esirtki qylmysynyń jekelegen túrleri boiynsha eresektermen birdei qylmystyq jaýapkershilikke tartylady. Politsiia qyzmetkerleri barlyq oqý oryndarynda quqyqtyq túsindirý jumystaryn júrgizedi. Jyl basynan beri 725 myń adamdy qamtityn 9738 túrli profilaktikalyq is-shara ótkizildi.
Basty nazarda joǵary synyp oqýshylary jáne ata-analarynan jyraqta táýelsiz ómirdi bastaǵan 1-2 kýrs stýdentteri. Politsiia kóbine bolyp qoiǵan faktilermen jumys jasaidy. Al ustalǵan jasóspirimder úshin quqyqtyq saldar týyndaidy. Osyǵan bailanysty biz sizderdi balalaryńyzben olardyń barlyq áreketteriniń quqyqtyq saldary týraly sóilesýge shaqyramyz. Jasóspirimderdiń ómirine barynsha qatysyńyz. Eger olar zańsyz áreketke tartylsa, sizge aitýdan qoryqpaýy kerek”, - delingen úndeýde.
Balalaryńyzdyń ortasyn bilip, olar paidalanatyn internet-resýrstardy baqylaýyńyz qajet.
“Jasóspirimniń zattaryndaǵy kez kelgen dári-dármek qaptamalaryna, folgaǵa, shyny tútikterge, tamshýyrlarǵa nazar aýdaryńyz. Munyń bári sintetikalyq esirtkini qoldanýǵa arnalǵan qural bola alady. Eger jasóspirimniń úlgerimi kúrt tómendep, sabaqqa barmaýy artyp, qarym-qatynas ainalasy ózgerse, bul ata-analardyń kúdigin týǵyzýy tiis. Esirtkini qoldanýdyń janama belgileri kóńil-kúidiń jii ózgerýi, ashýlanshaqtyq, apatiia bolýy múmkin.
Jasóspirimniń esirtki taratýmen ainalysatynynyń taǵy bir belgisi – kóp aqsha, qymbat zattardy satyp alýy. Eger balanyń telefonynda, messendjerlerde geolokatsiialary bar belgiler, esirtki jasyrylǵan jerlerdiń fotosýretteri, úi qabyrǵalarynda, stendterindegi basqa da jazbalar bolsa, bul da kúdik týǵyzýy kerek. Esterińizge sala keteiik, esirtki qylmystary úshin qylmystyq jaýapkershilik 16 jastan, al qylmystardyń jekelegen quramy boiynsha 14 jastan bastalady”, – dedi IIM esirtki qylmysyna qarsy is-qimyl departamenti bastyǵynyń orynbasary Baqytjan Ámirhanov.
