ىشكى ىستەر مينيسترلىگى الماتى وبلىسىندا اۋقىمدى وپەراسيا جۇرگىزدى، دەپ حابارلايدى Dalanews.kz.
شۋ قالاسىنان الماتى وبلىسىنا "باقىلاناتىن جەتكىزۋ" ادىسىمەن جۇرگىزىلگەن ارنايى وپەراسيانىڭ ناتيجەسىندە قاراساي اۋدانىنىڭ "تۇرار باقشاسى" ەلدىمەكەنىندە جاسىرىن ەسىرتكى زەرتحاناسىنىڭ قىزمەتى توقتاتىلدى.
سينتەتيكالىق ەسىرتكىلەردى ءوندىرۋ جانە تاراتۋمەن اينالىسقان قىلمىستىق سحەمانى كورشى ەلدىڭ ەكى ازاماتى ۇيىمداستىرعان. جەدەل ءىس-شارالار بارىسىندا زاڭسىز اينالىمنان 11 كەلىدەن استام سينتەتيكالىق "مەفەدرون" ەسىرتكىسى تاركىلەندى. ناتيجەسىندە اينالىمعا قۇنى 1،6 ملن اقش دوللارىن قۇرايتىن شامامەن 35 مىڭ ءبىر رەتتىك دوزانىڭ تۇسۋىنە جول بەرىلمەدى.
سونىمەن قاتار زەرتحاناعا جۇرگىزىلگەن ءتىنتۋ بارىسىندا 20 ليتر جانە 115 كگ پسيحوتروپتىق زات، سونداي-اق ەكى توننادان استام پرەكۋرسور تاركىلەندى. ولاردى وڭدەۋ ارقىلى 120 كگ سينتەتيكالىق ەسىرتكى دايىنداۋ جوسپارلانعان. قىلمىستىق ورتاعا 17،5 ملن اقش دوللارى كولەمىندە زالال كەلتىرىلدى.
"ۇستالعاندار ۋاقىتشا ۇستاۋ يزولياتورىنا قامالدى. بۇل باعىتتاعى جۇمىس جالعاسۋدا"، - دەدى ءىىم ەسىرتكى قىلمىسىنا قارسى ءىس-قيمىل كوميتەتى ءتوراعاسىنىڭ مىندەتىن اتقارۋشى دانيار مەيىرحان.
