بىرىككەن اراب امىرلىكتەرىندە IBA باسقارۋىمەن بوكستان ەرلەر اراسىنداعى الەم چەمپيوناتى ءوتىپ جاتىر. ونداعى قازاقستان مەن رەسەي بوكسشىسى اراسىندا وتكەن جەكپە-جەك داۋعا ۇلاستى، دەپ حابارلايدى Dalanews.kz
دۋبايدا 2–13 جەلتوقسان ارالىعىندا ۇيىمداستىرىلعان بۇل ءدۇبىرلى دودادا قازاقستان نامىسىن قورعاۋ ءۇشىن 13 سپورتشى ساپارعا اتتانعان. جارىستىڭ التىنشى كۇنىندە 80 كەلى سالماقتا جۇدىرىقتاساتىن وتانداسىمىز ەراسىل جاقپەكوۆ رينگكە كوتەرىلدى. ەراسىل ءتۋرنيردىڭ 1/16 كەزەڭىنە ەش قيىندىقسىز ءوتىپ، ءۇشىنشى اينالىمدا رەسەيلىك سپورتشى دجامبۋلات بيجاموۆپەن كۇش سىناستى.
كەزدەسۋدىڭ ءۇشىنشى راۋندىندا وتانداسىمىز قارسىلاسىنا بىرنەشە ءدال سوققى باعىتتاپ، ونى ەسەڭگىرەتكەن بولاتىن. ءتىپتى رينگتەگى تورەشى نوكداۋن ەسەپتەپ، جەكپە-جەكتىڭ باسىمدىعىن ەراسىلعا بەردى. سوعان قاراماستان قازىلار القاسى جەكپە-جەكتى 2:3 ۇپاي سانىمەن بيجاموۆتىڭ پايداسىنا شەشتى.
بۇل شەشىم جانكۇيەرلەر اراسىندا ۇلكەن داۋ تۋدىرىپ، الەۋمەتتىك جەلىلەردە قىزۋ تالقىلانۋدا. كورەرمەندەر ەراسىلدىڭ ايقىن باسىمدىلىق تانىتقانىن ايتىپ، قازاقستاندىق سپورتشىنىڭ قىسىم كورگەنىن العا تارتۋدا. ال IBA باسشىلىعى بۇل جاعدايعا بايلانىستى ازىرگە ەشقانداي تۇسىنىكتەمە بەرگەن جوق.
وسى وقيعا كوپتەگەن سۇراقتاردى اشىق كۇيىندە قالدىردى:
قازاقستاندىق بوكسشىعا قاساقانا ادىلەتسىزدىك جاسالدى ما؟
بۇل شەشىمگە اسسوسياسيا باسشىسى، قۇمار ويىندارمەن اتى شىققان ۋمار كرەملوۆتىڭ ىقپالى بار ما؟
ايتا كەتەيىك، سوڭعى جىلدارى ءتۇرلى داۋ-دامايعا تولى شەشىمدەرىمەن داڭقى شىققان IBA ۇيىمداستىراتىن تۋرنيرلەرگە اقش، ۇلىبريتانيا، نيدەرلاندى، اۆستراليا، جاڭا زەلانديا سەكىلدى قۇرامالار بويكوت جاريالاپ، قاتىسۋدان باس تارتقان.
بەلگىلى بولعانداي، IBA جۇيەسىندەگى كۇماندى شەشىمدەر تالاي سپورتشىنىڭ ساعىن سىندىرىپ، كوپتەگەن قۇرامالاردىڭ ناتيجەلەرىن جوققا شىعارعان. وسى ولقىلىقتار سالدارىنان بوكس وليمپيادالىق سپورت تۇرلەرىنىڭ قاتارىنان شىعىپ قالۋ قاۋپىنە دە تاپ بولدى.
ابىروي بولعاندا، جاڭادان قۇرىلعان “WORLD BOXING” اسسوسياسياسى حالىقارالىق وليمپيادا كوميتەتىمەن سەرىكتەستىك ورناتىپ، سپورتتىڭ بولاشاعىنا تونگەن ءقاۋىپتىڭ الدىن الدى. قازىرگى تاڭدا الەمدىك بوكس قاۋىمداستىعىن باسقارۋعا تاجىريبەسى مول، وتانداسىمىز – ايگىلى بوكس شەبەرى گەناديي گەناديەۆيچ گولوۆكين تاعايىندالعانى سپورت جانكۇيەرلەرىن ەرەكشە ۇمىتتەندىرىپ وتىر.
