سۋرەتتەگى كۇلىمدەگەن اسەل ايتپايەۆا ەكى اپتا بۇرىن گرۋزياعا جۇمىسقا اتتانعان. 26 جاستاعى بويجەتكەندى تۋىسى كولىك تاسىمالدايتىن كومپانيانىڭ ءىس-قاعازدارىن جۇرگىزۋگە شاقىرىپتى. جەكە ءۇي، جالاقى مەن كولىك بەرەمىز دەگەنگە سەنگەن اسەل، تەز ارادا قۇجاتتارىن جيناستىرىپ، شەتەلگە اتتانعان. ءبىراق، 5-مامىردا تۋىستارى ونىڭ تبيليسيدە 8ء-شى قاباتتان قۇلاپ، مەرت بولعانىن ەستىپتى.
اينا ايتپايەۆا، مارقۇمنىڭ اپكەسى:
سوڭعى رەت ول قۇربىسىنا 4ء-شى مامىردا تۇنگى 3-تە "تەلەگرام" جەلىسى ارقىلى اۋديو جازبا جىبەرگەن. ءبىراق، ول قۇربىسى ۇيىقتاپ جاتقاسىن، تەك تاڭەرتەڭ تىڭداپتى. "تەلەگرامنان" ەشقاشان جازبايتىن، تەك "WhatsApp" كومەگىمەن حابارلاساتىن.
قۇربىسىنا جىبەرگەن دىبىستىق جازبادا بەسو ەسىمدى ازامات اسەلمەن تىلدەسكەنىن ەستۋگە بولادى. ول بىرەسە جاس قىزعا عاشىق ەكەنىن، بىرەسە ونىڭ الداعانىن ايتىپ، قوقان-لوقى كورسەتكەنى دە جازىلعان.
گرۋزيا پروكۋراتۋراسى بەسو توردۋا ەسىمدى ازاماتتىڭ ۇستالىپ، ەكى ايعا قاماۋعا الىنعانىن حابارلادى.
قۇزىرلى ورگانداعىلار وعان "زورلىق-زومبىلىق" جاسادى جانە "وز-وزىنە قول جۇمساۋعا" ماجبۇرلەدى دەگەن ايىپ تاعۋدا. وتانداسىمىزدىڭ وسى 57 جاستاعى ازاماتتىڭ جالداپ تۇرعان ۇيىنەن قۇلاعانى دا انىقتالعان. ال، اينا ايتپايەۆا اسەلدىڭ ولىمىنە تاعى 3 ادامنىڭ قاتىسى بار، دەيدى. ونىڭ اراسىندا جۇمىسقا شاقىرعان تۋىسىن دا اتادى.
اينا ايتپايەۆا، مارقۇمنىڭ اپكەسى:
– ءبىز مۇراتتىڭ قازاقستانعا شۇعىل تۇردە قاشقانىن ەستىدىك. ونى پوليسيا بولىمىنە ەكى رەت شاقىرتقانىمەن، قاماماپتى. ول پوليسەيلەرگە كەرىسىنشە "سەندەردىڭ الدىلارىڭدا ەسەپ بەرمەيمىن" دەپ اكىرەڭدەگەن. اۋديوجازبادا ونىڭ دا اسەلدى زورلاعانى انىق ايتىلعان.
وزگە ەلدە جۇمباق جاعدايدا كوز جۇمعان اسەلدىڭ اپكەسى ەكى ويلى. ول ءسىڭىلىسىن كۇدىكتىلەر نە جەزوكشەلىككە ماجبۇرلەدى، نە قانداي دا قۇجاتقا قول قويدىرماق بولعان دەيدى.
ال، قىزىنان ايىرىلىپ، قان جۇتقان اسەلدىڭ اناسى ايسۇلۋ ايتپايەۆا گرۋزياعا بۇگىن جەتتى. ول مۇردەنى تانۋ مەن سوت-مەديسينالىق زەرتتەۋلەرگە قاتىسپاق. ازاماتشا قىزىن كۇدىكتى اۆتوكولىككە ايىرباستاۋى مۇمكىن دەگەندى دە مالىمدەگەن. ءبىز مارقۇمنىڭ تانىستارىن دا سوزگە تارتتىق.
انارگۇل احمەتوۆا، مارقۇمنىڭ قۇربىسى:
اسەل اياق استىنان جۇمىسقا كەلمەي كەتتى. ماعان بۇل كۇدىكتى كورىندى. ويتكەنى ونىڭ جاۋاپكەرشىلىگى جوعارى بولاتىن. سوسىن تىك مىنەزدى ەدى. ونىڭ وز-وزىنە قول جۇمساعانىنا سەنبەيمىن.
گرۋزيانىڭ اقپارات كوزدەرى قولعا تۇسكەن بەسو توردۋانىڭ ايىبى دالەلدەنسە، 10 جىلعا باس بوستاندىعىنان ايىرىلاتىنىن جازۋدا. سوت وتىرىسى 23-مامىردا باستالماق. ىستە زورلىق-زومبىلىق ارەكەتتەرى بولعان سوڭ، ول جابىق تۇردە وتەدى دەگەن دە اقپارات بار. ال، جاپ-جاس قىزدىڭ جاقىندارى ونى جۇمىسقا شاقىرىپ، كەيىننەن ولىمىنە قاتىسى بار تۋىسىن دا جاۋاپقا تارتۋدى سۇرايدى. سونداي-اق ول ءىس حالىقارالىق دەڭگەيدە بولعان سوڭ، پرەزيدەنت پەن ەلدەگى قۇزىرلى ورگان باسشىلارىنان كومەك سۇرادى.
https://youtu.be/qJ9JLSWhsn4
